عەبادی لە جێبەجێکردنی ڕێککەوتنەکەی نێوان هەولێر و بەغدا بەرپرسیارە

به‌شی عێراق و هه‌رێمی کوردستان- ڕاوێژکارێکی سەرۆکایەتیی هەرێمی کوردستان ڕایگەیاند، سەرۆک وەزیرانی عێراق لە جێبەجێکردنی ڕێککەوتنەکەی نێوان حکوومەتی هەرێمی کوردستان و حکوومەتی عێراق بەرپرسیارە.

 به‌پێی هه‌واڵی کوردپرێس به‌گێڕانه‌وه‌ له‌ ماڵپه‌ڕی باسنیوز، کیفاح مەحموود ڕاوێژکاری سەرۆکایەتیی هەرێمی کوردستان، ڕایگەیاند: ”ڕێککەوتنەکانی نێوان هەولێر و بەغدا ساڵانێکە پشتگوێ دەخرێ یانیش بەغدا جێبەجێکردنی ڕادەگرێت، بەڵام ئەم ڕێککەوتنەی کۆتایی کە لە نێوان هەولێر و بەغدا لەبارەی نەوت هەیە، ماوە و پێش‌خستنیشی تێدا دەکرێت.
ناوبراو زیادی‌کرد: هەرێمی کوردستان و بەغداش پێویستییان بە جێبەجێکردنی ئەو ڕێککەوتنە هەیە، بۆ ئەوەی قەبارەی ناکۆکییەکانی نێوان هەردوولا کۆنتڕۆڵ بکرێت.
کیفاح مەحموود ئەوەشی ئاشکرا کرد: حەیدەر عەبادی، سەرۆک‌وەزیرانی عێراق، لە جێبەجێکردنی ڕێککەوتنەکە بەرپرسیارە، حکوومەتی عەبادی لە چارەسەرکردنی کێشەکانی لەگەڵ هەولێر و چاکسازی و ئازادکردنەوەی مووسڵدا لەبەردەم تاقیکردنەوەدایە کە ئەگەر لەو پرسانەدا سەرکەوتووبێت، ڕەنگە عەبادی لە کۆتاییدا بە هۆی هاریکارییەکانی لەگەڵ هەرێمی کوردستان سەرکەوتوو بێت.
 بەپێی ڕێککەوتنەکەی نێوان هەولێر و بەغدا، دەبووایە لە سەرەتای ساڵی 2015ەوە، هەرێمی کوردستان مانگانە 150 هەزار بەرمیل نەوتی کێڵگە نەوتییەکانی ناو هەرێمی کوردستان و 300 هەزار بەرمیل نەوتی کێڵگەکانی کەرکووک، ڕادەستی کۆمپانیای بە بازاڕکردنی نەوتی عێراق (سۆمۆ) بکات، لە بەرامبەردا بەغدا 17٪ی بودجەی گشتیی عێراق بۆ هەرێمی کوردستان بنێرێت، بەڵام تەنیا 5 مانگی یەکەمی ئەو ساڵە ڕێککەوتنەکە بەشێکی لێ جێبەجێ کرا و دواتر حکوومەتی هەرێمی کوردستان ڕای‌گەیاند کە حکوومەتی عێراق بەهۆی ئەوەی کەمتر لە نیوەی شایستە داراییەکانی هەرێمی کوردستان دەنێرێت و لە فڕۆکەخانەش بڕی 10%ی ئەو پارەیە کەم دەکرێتەوە کە بۆ هەرێمی کوردستان تەرخان کراوە، ڕادەستکردنی نەوتی بە کۆمپانیای سۆمۆ ڕاگرت و بڕیاری دا ڕاستەوخۆ نەوتی هەرێمی کوردستان بفرۆشێت.