دوایین هه‌واڵه‌کان سه‌باره‌ت به‌ سه‌لاحییه‌تی ناودێرانی سه‌رۆک کۆماری

به‌شی هه‌ڵبژاردن- وته‌بێژی شۆرای نیگابان ڕایگه‌یاند: سه‌رله‌به‌یانیی ڕۆژی پێنجشه‌ممه‌ کۆبوونه‌وه‌یێکی نائاسایی له‌ شۆرای نیگابان به‌ڕێوه‌ده‌چێت و ئه‌گه‌ر لێکدانه‌وه‌ی دۆسیه‌ی ناودێره‌کان له‌ هه‌مان ڕۆژدا کۆتایی پێبێت ئاکامی لێکدانه‌وه‌که‌ش هه‌مان ڕۆژ ڕاده‌گه‌یێندرێت.

به‌پێی هه‌واڵی کوردپرێس، عه‌باسعه‌لی که‌دخودایی وته‌بێژی شۆرای نیگابان له‌ به‌شی هه‌واڵی 21ی ناوه‌ندی ده‌نگ و ڕه‌نگدا ئاماژه‌ی به‌ کۆبوونه‌وه‌ی پێنجه‌مین ڕۆژی شۆرای نیگابان له‌سه‌ر لێکدانه‌وه‌ی سه‌لاحییه‌تی کاندیده‌کانی سه‌رۆک کۆماری وتی: دانیشتنی چوارشه‌ممه‌ به‌ڕێوه‌چوو ئه‌گه‌ر بتوانین کۆتایی به‌ کاره‌که‌ بهێنین ڕۆژی پێنجشه‌ممه‌ ئاماره‌که‌ به‌ هاووڵاتیان و هه‌موو میدیاکان ڕاده‌گه‌یێنین ئه‌گه‌رنا پێنج ڕۆژی دووهه‌م -که‌ یاساییه‌- به‌ مه‌به‌ستی لێکدانه‌وه‌ی سه‌لاحییه‌تی کاندیده‌کان نوێ ده‌کرێته‌وه‌.
ناوبراو زیادی کرد: دۆسیه‌کان به‌ڵگه‌ی پێویستیان بۆ هێنراوه‌ته‌وه‌ و ئه‌ندامانی شۆرای نیگابان جه‌خت له‌سه‌ر ئه‌وه‌ ده‌که‌نه‌وه‌ که‌ ڕه‌وتی لێکدانه‌وه‌ی دۆسیه‌کان به‌ وردی ئه‌نجام ده‌بێت هه‌ر به‌و بۆنه‌شه‌وه‌ ڕۆژی پێنجشه‌ممه‌ دانیشتنێکی نائاساییمان ده‌بێت و ئه‌گه‌ر لێکدانه‌وه‌ی دۆسیه‌کانیش تا ڕۆژی پێنجشه‌ممه‌ ئاکامه‌که‌ی دیاری بکرێت به‌ هه‌مووانی ڕاده‌گه‌یێنین.
وته‌بێژی شۆرای نیگابان سه‌باره‌ت به ڕه‌وتی ڕاگه‌یاندنی ئاکامی لێکدانه‌وه‌کان له‌ پێنج ڕۆژی دووهه‌مدا جه‌ختی کرد: هیچ پێویست ناکات هه‌موو ئه‌و پێنج ڕۆژه‌ی پێوه‌ ته‌رخان بکه‌ین. له‌ ماوه‌ی یه‌ک یان دوو ڕۆژی داهاتوودا ئاکامه‌که‌ ڕاده‌گه‌یێنین.
که‌دخودایی سه‌باره‌ت به‌ هه‌ندێ ده‌نگۆی ڕه‌تبوونه‌وه‌ی سه‌لاحییه‌تی هه‌ندێک له‌ کاندیده‌کان وتیشی: هیچ له‌و هه‌واڵانه‌ به‌ فه‌رمی ناناسرێن. ئاکام و هه‌واڵی ده‌رچوو له‌ شۆراوه‌ ده‌بێت له‌لایه‌ن منه‌وه‌ یان له‌لایه‌ن پێوه‌ندییه‌ گشتییه‌کانی شۆرای نیگابانه‌وه‌ ڕابگه‌یێندرێت و هه‌موو ئه‌و ده‌نگۆیانه‌ ڕه‌ت ده‌که‌ینه‌وه‌.
 
کۆدی هه‌واڵنێر: 60103