ئه‌ندامێکی دیکه‌ی پارتی دیموکراتیکی گه‌لان زیندانی کرا/ ژماره‌ی نوێنه‌رانی زیندانیکراوی HDP بۆ 14 نوێنه‌ر به‌رز بوویه‌وه‌

به‌شی تورکیا- به‌ ده‌ستگیرکردنی نوێنه‌ری مووش له‌ په‌رله‌مانی تورکیا، ژماره‌ی نوێنه‌رانی زیندانیکراوی پارتی دیموکراتیکی گه‌لان بۆ 14 نوێنه‌ر به‌رز بوویه‌وه‌.

به‌پێی هه‌واڵی کوردپرێس به‌ گێڕانه‌وه‌ له‌ تایم تورک، دادگه‌یێک له‌ مووش حوکمی زیندانی بۆ بۆرجو چه‌لیک ئۆزکان نوێنه‌ری مووش له‌ په‌رله‌مانی تورکیا و سه‌ر به‌ پارتی دیموکراتیکی گه‌لان به‌ تۆمه‌تی ئه‌ندامێتی له‌ گرووپه‌ تیرۆریستییه‌کان ده‌رکردووه‌. ناوبراو ماوه‌یێک پێش ئێستا بۆ زیندانی تیپی Fی مووش گوازرایه‌وه‌.
به‌ زیندانی بوونی بۆرجو چه‌لیک ئۆزکان، ژماره‌ی نوێنه‌رانی زیندانیکراوی پارتی دیموکراتیکی گه‌لان بۆ 14 که‌س به‌رز بوویه‌وه‌.
سه‌لاحه‌ددین ده‌میرتاش، فیگن یۆکسکداغ، ئێدریس بالۆکه‌ن، له‌یلا بیرلیک، سه‌لما ئیرماک، نۆرسل ئایدۆغان، عه‌بدوڵڵا زه‌یدان، گوڵسه‌ر یێڵدرم، فه‌رهاد ئینجۆ، نیهاد ئاکدۆغان، چاغلار ده‌میرل، بسیمه‌ کۆنجا و ئایهان بیلگن نوێنه‌رانێکن که‌ پێشتر زیندانی کرابوون.
 
کۆدی هه‌واڵنێر: 60103