ئه‌شواق جاف تایبەت بە "کوردپرێس"گوتی: سبه‌ینێ،"مەسعوود بارزانی" سه‌رۆکی هه‌رێمی کوردستان له‌گه‌ڵ نوێنه‌رانی کورد له‌ به‌غدا کۆده‌بێته‌وه‌ و له‌و کۆبوونه‌وه‌یه‌شدا باس له‌دواین گۆڕانکارییه‌ سیاسیه‌کانی ئێستای عێراق ده‌کرێت.

زیاتر گوتی: هه‌رچه‌نده‌ خودی سه‌رۆکی هه‌رێم به‌باشی ئاگاداری بارودۆخی ئێستای عێراقه‌ به‌ڵام له‌م کۆبوونه‌وانه‌شدا که‌ بۆجاری سێیه‌مه‌ ساز ده‌کرێت له‌سه‌ره‌تادا گوێ له‌ نوێنه‌رانی کورد ده‌گرێت، له‌کۆتایی کۆبوونه‌وه‌که‌ش به‌یاننامه‌یه‌ک ده‌رده‌کرێت.
پاش نیوه‌ڕۆی‌ رۆژی ٢٦ی ئه‌یپرێڵ/ ٧ی گوڵان، "موقته‌دا سه‌در" سه‌رۆکی‌ ڕه‌وتی‌ سه‌در له‌سه‌ر بانگهێشتی ڕه‌سمی "مه‌سعوود بارزانی" سه‌رۆکی‌ هه‌رێم، گه‌یشته‌ شاری‌ هه‌ولێر و له‌لایه‌ن بارزانییه‌وه‌، پێشوازی لێکرا و دواتر ده‌ستیان به‌کۆبوونه‌وه‌ کرد.
رێگه‌نه‌دان به‌ نووری مالیکی بۆ ئه‌وه‌ی نه‌توانێ بۆ جاری‌ سێیه‌م خۆی‌ بۆ سه‌رۆکایه‌تی حکوومه‌تی عێراق هه‌ڵبژێرێت گرنگترین ته‌وه‌ری گفتوگۆی نێوان سه‌در و بارزانی ڕاگه‌یێندراوه‌.
پاش کۆبوونه‌وه‌ی له‌گه‌ڵ سه‌رۆکی هه‌رێم، سه‌رۆکی ڕه‌وتی سه‌در کۆنگره‌یه‌کی ڕۆژنامه‌وانی سازکرد و له‌ ١٨خاڵدا جه‌ختی له‌سه‌ر چه‌ند بابه‌تێک کرد که‌ به‌ بۆچوونی‌ ئه‌و ده‌توانن چاره‌سه‌ری‌ قه‌یرانی ئێستای‌ عێراق بکه‌ن.
له‌ خاڵه‌ پێشنیارکراوه‌کانی موقته‌دا سه‌در باس له‌وه‌کراوه‌؛ "پێویسته‌ حکوومه‌تی عێراق به‌هێزبێت و هه‌موو لایه‌ک تێیدا به‌شداربن و ته‌ئکید له‌سه‌ر یه‌کگرتویی خاکی عێراق بکرێته‌وه‌."
ئه‌م وتانه‌ی سه‌در له‌سه‌ر یه‌کگرتووی خاکی عێراق له‌ حاڵێکدایه‌ که‌ بارزانی له‌ ماوه‌ی ڕابردوودا به‌رده‌وام هه‌ڕه‌شه‌ی جیابوونه‌وه‌ی کوردستان له‌و وڵاته‌ی  کردووه‌ و له‌ دوایین لێدوانی هاوپێوه‌ند به‌م مه‌سه‌له‌وه‌ دوێنێ 25ی مانگ‌ هه‌ڕه‌شه‌ی ئه‌نجامدانی ڕیفراندۆم له‌ کوردستانی کرد له‌ مانگی ئه‌یلولی داهاتوودا، ئه‌گه‌ر کێشه‌ و قه‌یرانه ‌سیاسییه‌کان له‌ عێراقدا چاره‌سه‌ر نه‌کرێن.
 موقه‌دا سه‌در هه‌روه‌ها باسی له‌ پرسی نه‌وت کرد و ڕایگه‌یاند:"نه‌وتی عێراق بۆ گه‌لی‌ عێراقه‌ و که‌س ناتوانێت تاکڕه‌وی‌ به‌سه‌ره‌وه‌ بکات."
پێشتریش ڕه‌وتی سه‌در سه‌رپشک بوون له‌ داهاتی نه‌وتی عێراقی به ‌مافی هه‌موو هاووڵاتییه‌کی کورد زانیبوو و جه‌ختی کردبوو که‌ حکوومه‌تی عێراق له‌و بواره‌دا مافی نییه‌ ڕێگری  له‌ کورد بکات.
له‌ خاڵه‌کانی موقته‌دا سه‌در که‌ ئه‌مڕۆ ڕایگه‌یاند، هێرش کراوه‌ته‌‌ سه‌ر ئیسرائیل و ته‌ئکیدی له‌وه‌ کراوه‌‌ که‌ ئه‌و ڕژێمه‌ "له‌ عێراقدا جێگه‌ی‌ نییه‌."
ماوه‌یه‌که‌ پرسی بوونی کۆمپانیا و ده‌ستوپێوه‌نده‌کانی ئیسرائیل له‌ خاکی هه‌رێمی کوردستان، ڕۆژه‌ڤی ده‌زگاکانی ڕاگه‌یاندن و ناوه‌نده‌ سیاسییه‌کانی عێراق و هه‌رێم و ناوچه‌که‌یه‌.
هه‌ندێ له‌ به‌رپرسانی هه‌رێم له‌وان "فوئاد مه‌عسووم" سه‌رۆکی فراکسیۆنی هاوپه‌یمانی کوردستانی له‌ په‌رله‌مانی عێراق به‌ ته‌واوه‌تی ئه‌م پاگه‌ندیانه‌ ڕه‌ت کردۆته‌وه‌.
ده‌سته‌ی سیاسی ڕه‌وتی سه‌در له‌ 24ی ئه‌م مانگه‌دا ئاشکرایکرد له‌لایه‌ن سه‌رۆکی هه‌رێمی کوردستانه‌وه‌ نامه‌یه‌کیان پێگه‌یشتوه‌ بۆ کۆبونه‌وه‌یه‌کی ڕاوێژکاری له‌ مانگی ئایاری داهاتوودا بۆ تاوتوێکردنی قه‌یرانی سیاسی له‌ وڵاتدا.
سه‌رۆکی ڕه‌تی سه‌در له‌ ماوه‌ی چه‌ند مانگی دواییدا که‌ قه‌یرانی سیاسی له‌ عێراق گه‌یشتۆته‌ لووتکه‌، به‌رده‌وام پشتگیریی لایه‌نی کوردی کردووه‌ و هێرشی توندی کردۆته‌ سه‌ر سه‌رۆک وه‌زیران که‌ ئه‌م هه‌ڵوێستانه‌ بۆته‌ هۆی سوپاسگوزاری سه‌رۆکی هه‌رێم له‌و ڕه‌وته‌ و سه‌رۆکایه‌تییه‌که‌ی.