سه‌رچاوه‌یه‌کی ئاگادار له‌ پارێزگای که‌رکووک بۆ "کوردپرێس" ڕاگه‌یاند: سه‌ره‌ڕای ناڕه‌زایه‌تی هه‌ندێ لایه‌نی ئیداری له‌ که‌رکووک، نووری مالیکی بڕیاری داوه‌ کۆبوونه‌وه‌ی ئه‌نجومه‌نی وه‌زیرانی عێراق ئه‌مڕۆ له‌ شاری که‌رکووک به‌ڕێوه‌ببات.

کۆبوونه‌وه‌ له‌گه‌ڵ به‌رپرسان و فه‌رمانگه‌ حکوومییه‌کانی که‌رکووک له‌ به‌رنامه‌کانی دیکه‌ی نووری مالیکییه‌ بۆ سه‌ردانکردنی ئه‌مڕۆی بۆ ئه‌و پارێزگا.

به‌ گوێره‌ی وته‌ی ئه‌و سه‌رچاوه‌یه‌ ماوه‌ی چه‌ند ڕۆژێکه‌ هێزێکی زۆر به‌ره‌و شاری که‌رکووک جووڵێندراوه‌ به‌ ئامانجی پارێزگاری کردن له‌ ئاسایشی ئه‌و پارێزگایه‌‌ له‌ کاتی سه‌ردانکردنی ئه‌نجومه‌نی وه‌زیران.

پێشتریش بڕیار بوو دانیشتنی ئه‌نجومه‌نی وه‌زیرانی عێراق به‌ سه‌رۆکایه‌تی مالیکی له‌ که‌رکووک به‌ڕێوه‌بچێ که‌ هه‌ر دوو ئه‌نجومه‌نی پارێزگا و ئیداره‌ی پارێزگا ناڕه‌زایه‌تییان ده‌ربڕی.

"نه‌جمه‌ددین که‌ریم" پارێزگاری که‌رکووک له‌ هه‌ڵوێستێکدا له‌ به‌رانبه‌ر ئه‌م بڕیاره‌ی ده‌وڵه‌تی عێراق بۆ به‌ڕێوه‌بردنی کۆبوونه‌وه‌ له‌ که‌رکووک ڕایگه‌یاند که‌ بۆچی بڕیارێکی له‌م چه‌شنه‌ به‌تایبه‌ت له‌ سه‌ر که‌رکووک دراوه‌ که‌ خۆی له‌و ناوچانه‌ ده‌بینێته‌وه‌ که‌ مادده‌ی 140 ده‌یانگرێته‌وه‌ و کێشه‌ و ناکۆکی تایفی له‌سه‌ریه‌تی.

شیاوی ئاماژه‌یه‌ که‌ پێشتریش ئه‌نجومه‌نی وه‌زیرانی عێراق سه‌ردانی پارێزگای به‌سره‌یان کرد و کۆبوونه‌وه‌یه‌کیان له‌وێ ڕێکخست.

پارێزگای که‌رکووک به‌ دووه‌مین پارێزگا له‌ عێراق دێت که‌ بڕیاره‌ کۆبوونه‌وه‌ی ئه‌نجومه‌نی وه‌زیران له‌وێ به‌ڕێوه‌ بچێ.