به‌پێی هه‌واڵی کوردپرێس به‌ گێڕانه‌وه‌ له‌ ڕۆیتێرز: ئه‌م گرووپه‌ سه‌ربازییه‌ی سه‌ربه‌ ئه‌لقاعیده‌ له‌ نوێژی هه‌ینی حه‌وته‌ی ڕابردوویدا به‌ گاڵته‌ و سوکایه‌تی کردن به‌ پێشنیاره‌ میلیۆن دۆلارییه‌کانی ئه‌مه‌ریکا بۆ به‌ده‌ستهێنانی زانیاری له‌سه‌ر به‌رپرسانی ئه‌لقاعیده‌ ڕایگه‌یاند: هه‌ر که‌س حه‌شارگه‌ی باراک ئۆباما ئاشکرا بکات 10 وشتر وه‌کوو خه‌ڵات وه‌رده‌گرێت و هه‌ر که‌سیش زانیاری گرینگ له‌سه‌ر جێ و شوێنی هیلاری کلینتۆن پێمان بدات ئه‌وا خه‌ڵاتی 10 مریشک و 10 که‌ڵه‌باب پێشکه‌شی ده‌کرێت.

ڕۆژی سێ شه‌ممه‌ وه‌زاره‌تی ده‌ره‌وه‌ی ئه‌مه‌ریکا، پێنج میلیۆن دۆلار خه‌ڵاتی بۆ به‌ده‌ستهێنانی زانیاری گرینگ له‌سه‌ر هه‌ریه‌ک له‌ "خه‌لف" و سێ هاوڕێ دیکه‌ی دیاریکرد، جگه‌ له‌وه‌ش بۆ زانیاری گرینگ له‌سه‌ر ئه‌حمه‌د عه‌بدی ئۆ محه‌مه‌د، دامه‌زرێنه‌ری گرووپی ئه‌لشه‌باب له‌ سومالی 7 میلیۆن خه‌ڵات دیاریکراوه‌.

ئه‌لقاعیده‌ له‌ مانگی فێبریوێری/ شوباتی ڕابردوودا ڕایگه‌یاند: گرووپی ئه‌لشه‌باب که‌ پێشتر له‌ لایه‌ن ئه‌مه‌ریکاوه‌ خرابووه‌ لیستی گرووپه‌ تیرۆریسته‌کانه‌وه‌ ڕۆیشتۆته‌ ڕێزی هێزه‌کانی ئه‌لقاعیده‌‌.

شیاوی ئاماژه‌یه‌ زۆربه‌ی ناوچه‌کانی وڵاتی سومالی له‌ ژێر کۆنترۆڵ و ده‌سه‌ڵاتی گرووپی ئه‌لشه‌بابدایه‌.