چیرۆکی سه‌رهه‌ڵدانی داعشیزم له‌ نێو کورده‌کاندا/ ئه‌لێکساندر ملیگرۆ- هیچنز و ڕه‌نج عه‌لائه‌ددین
به‌شی وتار/ جیهان- له‌ درێژایی مێژوودا بۆ گرووپه‌ جیهادییه‌کان ئاشکرا بووه‌ که‌ لایه‌نگرێکی زۆریان له‌ نێوان فه‌رهه‌نگی کوردی نییه‌. فه‌رهه‌نگێک که‌ به‌ بۆنه‌ی چه‌ندین سه‌ده‌ شه‌ڕی نه‌ته‌وه‌خوازانه‌ی سێکوولار له‌ دژی ڕژێمه‌ عه‌ره‌بییه‌کان پێناسه‌ کراوه‌ به‌ڵام ئه‌وان به‌شدارییێکی مێژووییان له‌م ناوچه‌یه‌ هه‌یه‌.
کوردپرێس: به‌رپرسێکی باڵای هه‌واڵگری کوردی عێراق به‌ دڵنیاییه‌وه‌ به‌ ئێمه‌ی ڕاگه‌یاند: "لێره‌ چه‌ندین ده‌یه‌ جیهادخوازی بووه‌ و داعشیش وه‌کوو ئه‌وان شکست ده‌درێت." کورده‌کان له‌باره‌ی مه‌ترسییێک که‌ ده‌وڵه‌تی ئیسلامی بۆ سه‌ر سنووره‌کانی هه‌رێمی کوردستان دروستی کردووه‌ متمانه‌یێکی تایبه‌ت به‌ خۆیان هه‌یه‌. پاش له‌ مه‌ترسی بوونی سنووره‌کانی هه‌رێمی کوردستان له‌لایه‌ن داعشه‌وه‌، له‌ مانگی ئه‌گێستی ساڵی 2014 هێزه‌ کوردییه‌کانی پێشمه‌رگه‌ شکستیان به‌و گرووپه‌ هێنا.
به‌ مه‌به‌ستی تێگه‌یشتنی باشتر له‌ داعش و شه‌ڕی دژ به‌م گرووپه‌، ئێمه‌ دوو حه‌وته‌ له‌ هه‌رێمی کوردستان بووین. لێکۆڵینه‌وه‌کانی ئێمه‌ بریتی له‌ گفتوگۆ له‌گه‌ڵ به‌رپرسه‌ ئه‌منییه‌ کوردییه‌کان، فه‌رمانده‌کانی پێشمه‌رگه‌، ئه‌فسه‌رانی هه‌واڵگری و زیندانیانێکی کورد بوو که‌ چووبوونه‌ ناو ڕیزه‌کانی داعشه‌وه‌. ئێمه‌ له‌باره‌ی بارودۆخێک که‌ ئه‌و که‌سه‌ی له‌ خانوو، بنه‌ماڵه‌ و دۆستانی خۆی دوور کردبووه‌وه‌ و په‌لکێشی خه‌لافه‌تی به‌ناوبانگی داعشی ده‌کرد، زانیارییێکی زۆرمان وه‌ده‌ستهێنا.
به‌ ڕێنمایی هێزه‌کانی پێشمه‌رگه‌ سه‌ردانی ناوچه‌ی "تازه‌"مان کرد، ناوچه‌یێک به‌ده‌ر له‌ که‌رکووک که‌ یه‌کێک له‌ به‌ره‌کانی پێشه‌وه‌ی شه‌ڕی دژ به‌ داعش له‌ عێراق وێنا ده‌کرێت. له‌ ڕواڵه‌تدا فه‌رمانده‌ کوردییه‌کان ئارام و هێور بوون. سه‌رۆکی بنکه‌ی ئه‌و شوێنه‌ به‌ ئێمه‌ی ڕاگه‌یاند که‌ له‌ کاتی ده‌ستپێکردنی هێرشی ئاسمانی به‌ سه‌رکردایه‌تی ویلایه‌ته‌ یه‌کگرتووه‌کانی ئه‌مریکا له‌ ساڵی 2014، داعش نه‌یتوانیوه‌ هیچ جۆره‌ هێرشێکی جیدی له‌م ناوچه‌یه‌ ئه‌نجام بدات.
ناوبراو زیادی کرد: "هه‌موومان ده‌یبینین که‌ ژماره‌ی هێرشه‌ خۆمپاره‌ییێکانی داعش زۆر که‌مه‌، ته‌نیا به‌و بۆنه‌وه‌ که‌ وه‌بیری ئێمه‌ی بهێننه‌وه‌ که‌ له‌و شوێنه‌دا‌ن." هه‌ندێ جار، داعش پشتی به‌ به‌کارهێنانی چه‌ندین خۆمپاره‌ی پڕ له‌ گازی کولور و گازی خه‌رده‌ل به‌ستووه‌. حه‌وته‌یه‌ک پێش له‌ سه‌فه‌ری ئێمه‌، ناوچه‌ی تازه‌ کرابووه‌ ئامانج که‌ له‌و هێرشه‌دا سه‌دان که‌س بریندار بوون. ئه‌م هێرشه‌ سه‌ره‌ڕای نیگه‌رانییێک که‌ دروستی کرد، زیاتر له‌ هه‌ر شتێکی دیکه‌ نیشانه‌ی نائۆمیدی زۆری ئه‌م گرووپه‌ بوو.
به‌م حاڵه‌شه‌وه‌، داعش ته‌نیا سه‌رهه‌ڵدانێکی تیرۆریستی که‌ هه‌ڕه‌شه‌ له‌سه‌ر سنووره‌کانی هه‌رێمی کوردستان ده‌کات، نییه‌. ئه‌م گرووپه‌ کێشه‌یێکی ناوخۆییشه‌ و داموده‌زگاکانی ئاسایشی ناوخۆیی حکوومه‌تی ناوچه‌یی کوردستان (KRG) بۆ ڕێگری له‌ هێرشه‌کانی داعش له‌ ناو خاکی خۆی زۆر به‌ سه‌ختی کاری کردووه‌ و ئه‌ندامانی کورد و عه‌ره‌ب (و ته‌نانه‌ت، ئه‌و جۆره‌ که‌ به‌ ئێمه‌ وترا شه‌ڕڤانانی بیانی ڕۆژئاوا)ی قۆڵبه‌ست و گرووپی گرینگ و سه‌ره‌کی لۆجستیکی و ڕاکێشانی هێزی ئه‌م گرووپه‌ی له‌ناو بردووه‌.
ئیسلامگه‌رایان و کورده‌کان
له‌ درێژایی مێژوودا بۆ گرووپه‌ جیهادییه‌کان ئاشکرا بووه‌ که‌ لایه‌نگرێکی زۆریان له‌ نێوان فه‌رهه‌نگی کوردی نییه‌. فه‌رهه‌نگێک که‌ به‌ بۆنه‌ی چه‌ندین سه‌ده‌ شه‌ڕی نه‌ته‌وه‌خوازانه‌ی سێکوولار له‌ دژی ڕژێمه‌ عه‌ره‌بییه‌کان پێناسه‌ کراوه‌ به‌ڵام ئه‌وان به‌شدارییه‌کی مێژووییان له‌م ناوچه‌یه‌ هه‌یه‌. گرووپه‌ جیهادییه‌کانی کوردستان له‌ نێوان گرووپه‌ جیابووه‌کان له‌ بزووتنه‌وه‌ ئیسلامگه‌را کورده‌ میانه‌ڕه‌وه‌کان سه‌ریان هه‌ڵداوه‌. یه‌کێک له‌ یه‌که‌مین بزووتنه‌وه‌کان بزووتنه‌وه‌ی ئیسلامی کوردستان (IMK) بوو. ئه‌م بزووتنه‌وه‌ له‌ ساڵی 1987 له‌لایه‌ن ژماره‌یه‌ک له‌ به‌رهه‌ڵستکارانی ئیسلامگه‌رای عێراق پێکهات که‌ له‌گه‌ڵ دیکتاتۆری به‌عسی سه‌دام حسێن شه‌ڕیان ده‌کرد. هه‌ندێ له‌ ئه‌ندامانی ئه‌م بزووتنه‌وه‌ له‌ ماوه‌ی ده‌ستدڕێژی ڕووسیا له‌ ئه‌فغانستان مه‌شقی سه‌ربازییان بینی و شه‌ڕیان کردبوو.
بزووتنه‌وه‌ی ئیسلامی کوردستان و ئیسلامگه‌رایانی کوردی دیکه‌ به‌ شێوه‌یێکی نه‌ریتی په‌نا بۆ ڕۆژهه‌ڵاتی شوێنێک ده‌به‌ن که‌ به‌ هه‌رێمی کوردستان ده‌ناسێندرێت و بنکه‌یه‌کی به‌هێزیان له‌ هه‌ڵه‌بجه‌ هه‌یه‌ که‌ له‌ ڕووی ئایینییه‌وه‌ پارێزگایه‌کی موحافیزه‌کار له‌ هه‌رێمی کوردستانه‌. هه‌روه‌ها ئه‌م شوێنه‌ ئه‌گه‌ری په‌یوه‌ندی ئه‌م گرووپه‌ی له‌گه‌ڵ پشتیوانانی خۆی له‌ ئێران ده‌سته‌به‌ر ده‌کرد که‌ له‌و کاته‌دا گیرۆده‌ی شه‌ڕی 8 ساڵه‌ له‌گه‌ڵ عێراق بوون.
پارێزگای هه‌ڵه‌بجه‌ شوێنێک که‌ سه‌دام تێیدا چه‌کی کیمیایی له‌ ساڵی 1988 به‌کارهێنا و به‌ بێ به‌زه‌ییێکی ته‌واو بووه‌هۆی گیانله‌ده‌ستدانی نزیک به‌ 5 هه‌زار کورد، به‌ باشی ناسێندراوه‌. جێگه‌ی سه‌رسووڕمان نییه‌ که‌ ئه‌م بۆردومانه‌ کاریگه‌رییه‌کی به‌رچاوی له‌سه‌ر حه‌شیمه‌تی ئه‌م ناوچه‌یه‌ دانا و بزووتنه‌وه‌ی ئیسلامی کوردستان به‌ هه‌لقۆستنه‌وه‌ له‌و بابه‌ته‌ جیهادی دژ به‌ ده‌وڵه‌تی عێراق ڕاگه‌یاند. له‌ سه‌ره‌تای ده‌یه‌ی 1990، هێشتاکه‌ بزووتنه‌وه‌ی ئیسلامی کوردستان له‌لایه‌ن دوژمنانی سه‌دام یارمه‌تییێکی فێرکاری، دارایی و لۆجستیکی وه‌رده‌گرت.
ئیسلامگه‌رایانی ئه‌ندامی بزووتنه‌وه‌ی ئیسلامی کوردستان له‌ دژی ئامانجه‌کانی PUK و PDK له‌ ناوچه‌ چه‌ندین هێرشیان ئه‌نجام دا. ئه‌گه‌رچی شه‌ڕێکی ناو به‌ ناو له‌ نێوان کورده‌ سێکوولاره‌کان و IMK ڕووی دا به‌ڵام به‌مزووانه‌ PDK و PUK چوونه‌ ناو شه‌ڕێکی ناوخۆییه‌وه‌. له‌ ڕاستیدا هه‌موو ته‌رکیزی ئه‌م دوو پارته‌ له‌ نێوان ساڵانی 1994 بۆ 1998 له‌سه‌ر ئه‌م شه‌ڕه‌ بوو. له‌ کۆتایی ئه‌و شه‌ڕه‌دا بزووتنه‌وه‌ی ئیسلامی کوردستان چووه‌ ڕیزی حکوومه‌تی سێکوولاری هه‌رێمی کوردستانه‌وه‌. کارێک که‌ بووه‌هۆی تووڕه‌بوونی ئه‌ندامانی سه‌ره‌کی ئه‌و حزبه‌ و بووه‌هۆی پێکهاتنی یه‌که‌مین گرووپی سه‌له‌فی جیهادی له‌م وڵاته‌ی ناوچه‌که‌دا.
گه‌وره‌ترین گرووپ له‌ نێوان ئه‌م گرووپه‌ سه‌له‌فییه‌ جوندولئیسلام بوو که‌ له‌ دوایین ڕۆژانی ساڵی 1990 ئۆردووگایه‌کی مه‌شقپێکردنی سه‌ربازی و ئایدیۆلۆژیکی له‌ ناوچه‌ی هه‌ڵه‌بجه‌ دروست کرد به‌م هیوایه‌ی که‌ به‌ستێن بۆ شه‌ڕێکی سه‌له‌فی جیهادی له‌ عێراق بڕه‌خسێنێت. ئه‌م گرووپه‌ پێش له‌ ساڵی 2001 ناوی خۆی بۆ ناوی ئه‌نسارولئیسلام گۆڕا و هه‌ندێ یارمه‌تی له‌ ئه‌لقاعیده‌ وه‌رده‌گرت. له‌ سه‌رده‌مێکی وابوو که‌ ئه‌م گرووپه‌ سه‌ره‌نجی ئه‌بوو موسه‌عێب زه‌رقاوی بنیاتدانه‌ری سه‌ره‌کی ئه‌لقاعیده‌ له‌ عێراقی به‌ره‌و لای خۆی ڕاکێشا. ناوبراو باکووری عێراقی به‌ گیانپه‌نایێکی ئه‌من و کاریگه‌ر بۆ به‌هێزتربوونه‌وه‌ی بزووتنه‌وه‌ی خۆی جوندولشام بینی که‌ پاش هێرشی 2001 ئه‌وه‌ی له‌ ئه‌فغانستان دامه‌زراندبوو. ئه‌نسارولئیسلام پاش هێرشی ساڵی 2003 بۆ سه‌ر عێراق، و به‌ یارمه‌تی زه‌رقاوی، بۆ یه‌کێک له‌ چه‌ندین ڕێکخراوی جیهادی گۆڕا که‌ دژ به‌ هێزه‌ ڕۆژئاواییه‌کان و کوردستان ئۆپه‌راسیۆنی جیهادی ئه‌نجام ده‌دا. خراپترین هێرشی ئه‌م گرووپه‌ له‌ کوردستانی عێراق له‌ ساڵی 2004 ڕووی دا که‌ به‌ بۆنه‌ی ئه‌م ته‌قینه‌وه‌ خۆکوژییه‌ له‌ ئۆتۆمبێلێکی بۆمبڕێژکراو 109 که‌س و له‌وان سامی عه‌بدولڕه‌حمان جێگری ئه‌و کاته‌ی سه‌رۆک وه‌زیرانی کوردستان کوژران.
ڕیشه‌کانی داعش لێره‌دا‌یه‌. بۆ به‌رپرسانی کوردستان، ئه‌م گرووپه‌ ته‌نیا به‌شێک له‌ دوایین پاشماوه‌ی گرووپێکه‌ که‌ چه‌ندین جار ده‌فرایه‌تی خۆی بۆ ده‌ستپێکردنی چالاکی دووباره‌ و ڕێکخستنی دووباره‌ له‌ ناوچه‌که‌ نیشان داوه‌. شه‌ڕی درێژخایه‌نی کورده‌کان له‌گه‌ڵ جیهادگه‌رایان به‌م مانایه‌یه‌ که‌ داموده‌زگا ئه‌منی و سه‌ربازییه‌کانی هه‌رێمی کوردستان له‌ شه‌ڕ و شکستدانی گرووپێکی وا تواناییه‌کی زۆر باشیان هه‌یه‌. ڕه‌نگه‌ ئه‌م ڕاستییه‌ تا ئاستێک هۆکاری متمانه‌به‌خۆی سه‌رجه‌م ئه‌و به‌رپرسانه‌ ڕوون بکاته‌وه‌ که‌ له‌گه‌ڵیان گفتوگۆمان ئه‌نجام دا.
داعش له‌ عێراق زیاتر له‌ 40 له‌سه‌د و له‌ سووریا نزیک به‌ 20 له‌سه‌دی ناوچه‌کانی ژێر کۆنتڕۆڵی له‌ ده‌ست داوه‌. له‌ مانگه‌کانی پاش هێرشی مانگی نۆڤێمبێر له‌ پاریسدا، داعش له‌ زیاتر له‌ 7 شار و شارستانی گه‌وره‌ پاشه‌کشێ کردووه‌. به‌رپرسانی سه‌ربازی ویلایه‌ته‌ یه‌کگرتووه‌کان له‌ کوردستان به‌ ئێمه‌یان وت که‌ تۆڕی سه‌ره‌کی و ڕێبه‌ری ئه‌و گرووپه‌ له‌لایه‌ن هێزی هاوپه‌یمانانی نێوده‌وڵه‌تی دژه‌داعشه‌وه‌ به‌ ته‌واوه‌تی له‌ناو چووه‌. هێزی هاوپه‌یمانان به‌شدارییه‌کی به‌رچاوی له‌ ئاسمان و زه‌وی بووه‌ و له‌گه‌ڵ هێزه‌ خۆجێیه‌کان وه‌کوو هێزه‌کانی پێشمه‌رگه‌ هاوکاری ده‌کات.
له‌ مانگی مه‌ی ساڵی 2015، داعش نه‌یتوانیوه‌ ئۆپه‌راسیۆنێکی سه‌رکه‌وتووانه‌ له‌ کوردستانی عێراق ئه‌نجام بدات. به‌م حاڵه‌شه‌وه‌، جێگه‌یه‌ک بۆ خۆشحاڵی له‌ئارادا نییه‌ چونکه‌ گرووپی داعش که‌ له‌ سه‌رانسه‌ری ناوچه‌که‌ په‌ره‌ی سه‌ندووه‌ به‌ ڕیشه‌ جیهادییه‌ مێژووییه‌کان له‌م ناوچه‌یه‌ به‌ستراوه‌ و له‌وه‌ سوود و قازانج ده‌بات. به‌ وته‌ی به‌رپرسان، له‌ ئێستادا 450-400 ئه‌ندامی کوردی داعش له‌ ناو حکوومه‌تی هه‌رێمی کوردستان و یان له‌ ناو ڕیزه‌کانی داعش هه‌‌ن که‌ ده‌توانن بۆ پاراستن و مانه‌وه‌ی ئه‌م گرووپه‌ یارمه‌تی بده‌ن.
هۆکاری سه‌ره‌کی بوونی ئه‌م تۆڕه‌ ئه‌وه‌یه‌ که‌ داعش که‌ له‌و ناوچه‌ خاکسته‌رییه‌ له‌ نێوان مافیایه‌ک و گرووپێکی سه‌ربزێو چالاکی ده‌کات هێشتاکه‌ ده‌توانێت له‌ توێژی هه‌ژار وه‌کوو هه‌لێک که‌ڵک وه‌ربگرێت. به‌رپرسێکی باڵای ئه‌منی ناوخۆیی ڕوونی کرده‌وه‌: "ئیزن بده‌ن نموونه‌یه‌ک بێنمه‌وه‌. داعش ده‌چێته‌ لای شۆفێرێک له‌ سووریا یان عێراقه‌وه‌ که‌ بژێوی ژیانی ناوبراو به‌ هاتوچۆکردن له‌ ناوچه‌کانی ژێر کۆنتڕۆڵی داعش بۆ کوردستان به‌ستراوه‌، ئاشکرایه که‌ ئه‌م شۆفێره‌ له‌ به‌ره‌وڕووبوونه‌وه‌ له‌گه‌ڵ ئه‌وه‌ی که‌ ببێته‌ په‌یامبه‌ری داعشه‌وه‌ و ئه‌ندامانی بنه‌ماڵه‌که‌ی بکوژرێن، بژارده‌ی یه‌که‌م هه‌ڵده‌بژێرێت." ئه‌مه‌ ته‌نیا به‌شێک له‌ تۆڕێکی لۆجستیکی به‌ربڵاوتره‌ که‌ ئه‌م گرووپه‌ توانیویه‌تی دروستی بکات. جێگه‌ی سه‌رسووڕمان نییه‌ که‌ ئه‌و گرووپه‌ به‌ شێوه‌یه‌کی به‌ربڵاو له‌ ئینتێرنێت و تۆڕه‌ کۆمه‌ڵایه‌تییه‌کان که‌ڵکی وه‌رگرتووه‌ و بۆ به‌کارهێنانی هێزه‌ کوردییه‌کان له‌ نێوان چه‌ندین که‌س له‌ گه‌نجانی لاواز و هه‌ستۆکی ناوچه‌که‌ له‌ فه‌یسبووک که‌ڵک وه‌رده‌گرێت.
کورده‌کانی داعش
هۆکاری چوونی کورده‌کان بۆ ناو ڕیزه‌کانی داعش جۆراوجۆره‌ و له‌ بنه‌ڕه‌تدا له‌گه‌ڵ ئه‌و هۆکارانه‌ی که‌ له‌سه‌ر چوونی هاوتا عه‌ره‌به‌ عێراقییه‌کانیان بۆ ناو ڕیزه‌کانی داعش کاریگه‌ری داناوه‌ یه‌کسان نین. زۆربه‌ی عه‌ره‌به‌کان له‌ ناڕه‌زایه‌تی ده‌ربڕین به‌ ده‌وڵه‌تی زۆرینه- شیعه‌ی به‌غدا که‌ به‌ بۆچوونی ئه‌وان فیرقه‌یی بووه‌ و داعش (و پێش له‌وه‌ ئه‌لقاعیده‌ له‌ عێراق)یش ئه‌وه‌ی به‌ دژه‌- سوننه‌ ناساندووه‌، چوونه‌ته‌ ناو ڕیزی داعشه‌وه‌. ئه‌م جۆره‌ لێدوانانه‌ له‌ نێوان زۆربه‌ی کورده‌کانی عێراق که‌ تا ئاستێکی زۆر به‌ بۆنه‌ی ناکۆکی نێوان شیعه‌ و سوننه‌ له‌ ناوچه‌کانی دیکه‌ی وڵات پێکه‌وه‌ یه‌کده‌نگ بوونه‌، زۆر پڕبایه‌خ نییه‌. ئه‌گه‌رچی بێگومان نموونه‌ی ئێمه‌ له‌ ئه‌ندامانی کوردی داعش زۆر بچووکتر له‌وه‌یه‌ که‌ بکرێ به‌ ده‌ره‌نجامێکی گشتگیر بگه‌یێت، به‌م حاڵه‌شه‌وه‌ گفتوگۆکانی ئێمه‌ له‌گه‌ڵ ئه‌وان به‌ تێگه‌یشتنێکی باشتر له‌ چۆنیه‌تی کارکردنی ئه‌م گرووپه‌ و ئه‌وه‌ی که‌ ئه‌م گرووپه‌ له‌ چ که‌سانێک که‌ڵک وه‌رده‌گرێت یارمه‌تی ده‌دات.
یه‌که‌مین دیداری ئێمه‌ له‌گه‌ڵ ئاراز بوو (ناوی سه‌رجه‌م زیندانیانی گۆڕدراوه‌)، زیندانییه‌ک که‌ له‌ دواهه‌مین ڕۆژانی مێرمنداڵیدایه‌. ته‌نیا دوو حه‌وته‌ پاش به‌کارهێنانی فه‌یسبووک ئه‌ندامانی داعش په‌یوه‌ندییان له‌گه‌ڵ ناوبراو گرت و ناوبراویان برده‌ ناو تۆڕه‌ کۆمه‌ڵایه‌تییه‌کانی خۆیانه‌وه‌. ئاراز وه‌کوو گه‌نجێکی تازه‌کار و لاواز له‌ ناو ئینتێرنێتدا، ئامانجێکی گونجاو بۆ به‌کارهێنان له‌لایه‌ن داعشه‌وه‌ بوو.
له‌ کاتێکدا که‌ له‌ ناوبراو پرسیارمان کرد که‌ داعش چۆن ده‌ستی به‌ ناوبراو گه‌یشتووه‌، به‌ ئێمه‌ی وت که‌ به‌ بۆنه‌ی مه‌یلی به‌ ئیسلام چه‌ندین وێنه‌ی له‌ ئایه‌تی قورئان و هێمای ئیسلامی له‌سه‌ر هه‌ژماری تایبه‌تی خۆی دانابوو. هه‌روه‌ها وێنه‌ی پرۆفایله‌که‌ی وێنه‌یه‌ک له‌ مزگه‌وتی "قودس" له‌ ئۆرشه‌لیم بوو. ئه‌م خاڵانه‌ سه‌ره‌نجی ئه‌ندامانی داعشی به‌ره‌و لای خۆی ڕاکێشا و له‌ ئینتێرنێتدا له‌گه‌ڵی په‌یوه‌ندییان گرت و پێکه‌وه‌ گفتوگۆیان کرد که‌ بۆیان ئاشکرا بکرێته‌وه‌ که‌ دوورنواڕی ناوبراو بۆ چوونه‌ ڕیزی ئه‌و گرووپه‌ تا چ ڕاده‌یه‌ک ڕاستبینانه‌یه‌.
به‌ وته‌ی ئاراز، له‌ ماوه‌یه‌کی سێ مانگه‌دا، په‌یوه‌ندییه‌ ئینتێرنێتییه‌کانی داعش توانی قه‌ناعه‌ت به‌ ناوبراو بێنێت به‌ پڕۆژه‌ ئارمانج گه‌رایانه‌کانی ئه‌و گرووپه‌ و بڕیاری دا به‌وه‌ی که‌ بچێت بۆ شاری مووسڵ که له‌و کاته‌دا‌ له‌ژێر کۆنتڕۆڵی داعشدا بوو‌. ئه‌گه‌رچی ناوبراو ژیانێکی زۆر باش و په‌یوه‌ندییه‌کی شیاوی له‌گه‌ڵ بنه‌ماڵه‌که‌یدا بوو، به‌م حاڵه‌شه‌وه‌ ڕازی بوو بنه‌ماڵه‌که‌ی به‌ بۆنه‌ی به‌سه‌رهاتخوازی و ئه‌ندامێتی له‌و شته‌ی که‌ داعش ئه‌وه‌ی وه‌کوو یه‌کێک له‌ گرینگترین بزووتنه‌وه‌ گرینگه‌کان له‌ مێژووی ئیسلام به‌ ئه‌ندامانی نیشان ده‌دا، به‌جێبێڵێت. "ئه‌وان به‌ منیان ڕاگه‌یاند که‌ له‌ کۆمه‌ڵگای خۆیاندا شوێنێک، پێگه‌ و به‌ختی شه‌ڕکردن له‌ ڕێگای خودا ده‌ده‌ن." ناوبراو دڵنیا بووه‌وه‌ که‌ کوردستان گه‌نده‌ڵه‌ و گیرۆده‌بوون له‌ سیاسه‌تی نه‌ته‌وه‌خوازانه‌ بایه‌خێکی که‌متری هه‌یه‌ و ئه‌وه‌ له‌ حاڵێکدایه‌ که‌ ویلایه‌ته‌ یه‌کگرتووه‌کانی ئه‌مه‌ریکا به‌ هێرشکردنه‌ سه‌ر وڵاتی موسڵمانان و داگیرکردنی ئه‌و وڵاتانه‌ هێشتاکه‌ سووکایه‌تی به‌ موسڵمانان ده‌کات. له‌ خه‌لافه‌تی داعشدا پێشینه‌ و کاری ئه‌ندامان گرینگایه‌تییه‌کی نه‌بوو. "ئه‌وان وتیان که‌ ئێمه‌ هه‌موومان له‌گه‌ڵ یه‌کتر به‌رانبه‌رین چوونکه‌ هۆکارێک هه‌موومانی له‌ پاڵ یه‌کتر داناوه‌."
له‌ ناوبراومان پرسی که‌ چۆن متمانه‌ی به‌ هه‌ندێ که‌س کردووه‌ که‌ به‌ ئه‌گه‌ری زۆره‌وه‌ هه‌رگیز چاوی به‌وان نه‌که‌وتووه‌؟ ناوبراو به‌و شێوه‌یه‌ به‌ ئێمه‌ی ڕاگه‌یاند که‌ هیچ ئه‌زموونێکی له‌ ڕابردوودا له‌گه‌ڵ گرووپه‌ جیهادییه‌کان نه‌بووه‌ و له‌ ڕواڵه‌تدا هۆکارێکی که‌م بۆ سه‌ره‌نجڕاکێش بوونی ئه‌و بزووتنه‌وه‌یه‌‌ بوو. به‌م حاڵه‌شه‌وه‌، وه‌کوو ئه‌ندامێکی نوێ له‌ فه‌یسبووکدا دۆستانێکی زۆری بۆ په‌یوه‌ندی گرتن له‌گه‌ڵیان نه‌بوو. ئاراز به‌ ئێمه‌ی وت که‌ پێش له‌ ڕه‌زامه‌ندی ده‌ربڕین له‌گه‌ڵ ئه‌ندامێتی له‌ داعشدا به‌ به‌کارهێنانی کورته‌په‌یام له‌ تۆڕه‌ کۆمه‌ڵایه‌تییه‌کان له‌گه‌ڵ سێ که‌سی جیاواز قسه‌ی کردووه‌. له‌ ماوه‌یه‌کی کورتدا په‌یوه‌ندییه‌ک دروست بوو، به‌ شه‌وقه‌وه‌ ده‌یگه‌ڕێنێته‌وه‌ که‌ چۆن یه‌کتریان به‌ "برا" بانگ ده‌کرد. به‌م حاڵه‌شه‌وه‌، په‌یوه‌ندییه‌ سه‌ره‌تاییه‌کانیان له‌باره‌ی شێوازه‌کانی شه‌ڕ و بۆمبنانه‌وه‌ی خۆکوژی ناوبراوی ڕازی نه‌کرد: "ئه‌و شته‌یان که‌ به‌ منیان ده‌وت قبووڵم نه‌کرد، من ڕازی نه‌بووم."
به‌م حاڵه‌شه‌وه‌، په‌یوه‌ندییه‌کان درێژه‌ی بوو و به‌ دوای چه‌ندین مانگ له‌گه‌ڵیان په‌یوه‌ندی دۆستانه‌ی بوو. ئه‌وان چه‌ندین چیرۆکیان له‌باره‌ی قاره‌مانێتی، شه‌هیدبوون و ژیانی نوێ به‌ شێوه‌یه‌ک که‌ ناوبراو له‌ خه‌لافه‌ت ده‌یبێت، به‌ویان نیشان دا. به‌ناوبراو هه‌مبه‌ر به‌ "شه‌یتانه‌کانی شیعه‌" و موسڵمانانی هاوئایینی سوننه‌ که‌ له‌ ئایدیۆلۆژیای داعش په‌یڕه‌وی ناکه‌ن هۆشداری درا به‌ڵام به‌ شێوه‌یه‌کی جیدی بابه‌ته‌ ئایینییه‌کان نه‌خرایه‌ به‌ر باس و لێکدانه‌وه‌.
ناوبراو هه‌رگیز هه‌ستی به‌وه‌ نه‌کرد که‌ ناچار کراوه‌ بۆ ئه‌وه‌ی په‌یامی ئه‌وان قبووڵ بکات و وێده‌چێت که‌ له‌سه‌ر ئه‌و شێوه‌یه‌ کار کرابوو: "ئه‌وان به‌ منیان ڕانه‌گه‌یاند [ئه‌بووبه‌کر] به‌غدادی [ڕێبه‌ری ئێستای داعش]ت قبووڵ بێت، به‌ڵام به‌ منیان ڕاگه‌یاند بوون به‌ په‌یڕه‌وی ئه‌وان چ به‌رژه‌وه‌ندییه‌کی هه‌یه‌... له‌ درێژایی باسه‌کانی ئێمه‌دا به‌ شێوه‌یه‌کی جیدی بابه‌ته‌ ئایینییه‌کان نه‌خرایه‌ به‌ر باس و لێکدانه‌وه‌. ئه‌وان بۆ منیان ڕوونیان کرده‌وه‌ که‌ قورئان ڕێنما بۆ هه‌موو لایه‌نه‌کانی ژیانی ئێمه‌یه‌ و ئه‌وه‌ی که‌ یاسا و ڕێساکانی خه‌لافه‌ت له‌ قورئاندا ده‌رهێنراوه‌، له‌لایه‌ن که‌سانێکی گه‌نده‌ڵه‌وه‌ دیاری نه‌کراوه‌ و ئه‌وه‌ی که‌ ئه‌م یاسا و ڕێسایانه‌ ئاسمانی و له‌ سه‌ره‌وه‌ی دیکه‌ی ئایینه‌کانن. به‌ ئاوڕدانه‌وه‌ی له‌وه‌ی که‌ ئاراز ته‌نیا تووشی بابه‌ته‌ گشتییه‌کان له‌باره‌ی ئیسلامه‌وه‌ هاتبوو به‌ڵام له‌ ده‌ره‌نجامدا کۆچکردن بۆ شه‌ڕ له‌ ڕێگای ئیسلامی قبووڵ کرد. به‌م حاڵه‌شه‌وه‌، له‌ کاتێکدا که‌ ئاماده‌بوو خانووی خۆی به‌ مه‌به‌ستی چوون به‌ره‌و ناوچه‌کانی ژێر ده‌سه‌ڵاتی داعش به‌جێبێڵێت له‌لایه‌ن به‌رپرسانی کورده‌وه‌ که‌ چالاکییه‌کانی ناوبراویان له‌ ژێر چاودێریدا بوو، ده‌ستگیر کرا."
ئه‌و پڕۆسه‌یه‌ به‌ ته‌واوه‌تی له‌ ئینتێرنێتدا ئه‌نجام درا، له‌ حاڵێکدا که‌ زۆربه‌ی لێکۆڵینه‌وه‌کانی هاوپه‌یوه‌ند به‌ توندڕه‌وخوازی ئانلاین له‌سه‌ر گرینگایه‌تی په‌یوه‌ندی ئافلاین و په‌یوه‌ندی فیزیکی جه‌خت ده‌که‌ن و هاوکات چه‌ندین تایبه‌تمه‌ندییه‌کی به‌رچاویش له‌باره‌ی ئه‌و یاسایه‌ هه‌یه‌. له‌ هه‌ندێ جاردا، هێز و کارتێکه‌ری تۆڕه‌ کۆمه‌ڵایه‌تییه‌کان سه‌لماندوویه‌تی که‌ ئه‌م تۆڕه‌ بۆ قه‌ناعه‌ت پێهێنانی شه‌ڕڤانان له‌ داهاتوودا به‌سه‌. زۆربه‌ی ئه‌و که‌سانه‌ش که‌ گفتوگۆیان له‌گه‌ڵ کراوه‌ له‌ ڕێگای فه‌یسبووکه‌وه‌ بوونه‌ته‌ ئه‌ندامی داعش و له‌ واتس ئاپ و تێلێگرامدا (نه‌رم ئامێرێکی مه‌سێنجر به‌ پراکتیکی ڕه‌مزدانانی "سێکرێت چه‌ت" که‌ پێگه‌یه‌کی جه‌ماوه‌ری زۆری له‌ نێوان پشتیوانانی داعش له‌ سه‌رانسه‌ری جیهاندا هه‌یه‌) بۆ په‌یوه‌ندی گرتن له‌گه‌ڵ هێزه‌کان و ڕاوێژکارانی داعش که‌ڵکیان وه‌رگرتبوو.
بۆ ئه‌ندامانی داعش، ئه‌ندام وه‌رگرتن له‌ تۆڕه‌ کۆمه‌ڵایه‌تییه‌کان به‌ شێوه‌ی ئانلاین به‌ ته‌واوه‌تی تێچووییه‌کی نییه‌. به‌پێی نووسراوه‌کانیان له‌ میدیا کۆمه‌ڵایه‌تییه‌کان ئه‌وان ده‌توانن شه‌ڕڤانانی به‌هێز که‌ له‌ ته‌نیشت ناوچه‌کانی ژێر ده‌سه‌ڵاتی داعشدان، بدۆزنه‌وه‌ تا جێگه‌یه‌ک که‌ بتوانن تۆڕی ئینتێرنێتی خۆیان په‌ره‌پێده‌ده‌ن. چالاکی له‌ ناوچه‌کانی ژێر ده‌سه‌ڵاتی داعش به‌و مانایه‌یه‌ که‌ هیچ هه‌ڕه‌شه‌یه‌ک به‌ بۆنه‌ی چالاکی له‌و ناوچانه‌ هه‌ڕه‌شه‌یه‌ک بۆ سه‌ر ئه‌وان به‌ ئه‌ژمار نه‌یێت. ئه‌گه‌ر به‌رپرسانی ده‌وڵه‌تی چاودێری له‌سه‌ر چالاکی ئه‌و ئه‌ندامانه‌ی داعش بکه‌ن که‌ ده‌یانه‌وێت ته‌ڤلی ئه‌و گرووپه‌ بن، هیچ زانیارییه‌کی به‌ پێچه‌وانه‌ی یاسا له‌باره‌ی پێگه‌ یان شوناسی ڕاسته‌قینه‌ی په‌یوه‌ندییه‌ ئانلاینه‌کانی داعشیان له‌ به‌رده‌ستدا نییه‌.
به‌ پێچه‌وانه‌ی ئاراز، عه‌لی زیندانییه‌کی دیکه‌ که‌ په‌یوه‌ندییه‌کی درێژخایه‌نی له‌گه‌ڵ تۆڕه‌ کوردییه‌ جیهادییه‌کان ببوو و ژماره‌یه‌ک له‌ دۆستانی بوونه‌ ئه‌ندامی داعش. پاش ئه‌وه‌ی که‌ یه‌کێک له‌ دۆستانی ناوبراو له‌ کاتی شه‌ڕکردن بۆ داعش له‌ ساڵی 2015 له‌ عێراق کوژرا، عه‌لی چالاکییه‌کانی ده‌ستپێکرد. عه‌لی پاش ماوه‌یه‌کی کورت وێنه‌یه‌ک له‌ هاوڕێیه‌که‌ی له‌گه‌ڵ په‌یامێک له‌ تۆڕی کۆمه‌ڵایه‌تی فه‌یسبووک دانا که‌ ناوبراو "له‌ به‌رگری له‌ خه‌لافه‌ت شه‌هید بوو" و به‌ بۆنه‌ی کوژران له‌ مانگی ڕه‌مه‌زاندا که‌وته‌ به‌ر ڕه‌حمه‌تی خودا. به‌ وته‌ی ناوبراو، کوژرانی هاوڕێیه‌که‌ی، بووه‌هۆی ئه‌وه‌ی که‌ "بۆ یه‌که‌مین جار ئایدیای ته‌ڤل بوون به‌ داعش من به‌ره‌و لای خۆی ڕابکێشێت."
په‌یامه‌کانی ناوبراو سه‌ره‌نجی ئه‌ندامانی ئانلاینی داعشی به‌ره‌و لای خۆی ڕاکێشا و زۆر له‌ ڕێگای فه‌یسبووک و تێلێگرامه‌وه‌ له‌گه‌ڵیان په‌یوه‌ندی گرت. ئه‌گه‌رچی ناوبراو هیچ فێرکارییه‌کی فه‌رمی له‌باره‌ی ئیسلامه‌وه‌ نه‌بوو به‌ڵام له‌ هه‌موو ژیانی گه‌وره‌ساڵیدا خۆی به‌ موسڵمانێکی پراگماتیک ده‌زانی. پاش ئه‌وه‌ی که‌ ژماره‌یه‌ک له‌ که‌سانی ده‌وروبه‌ری چوونه‌ ڕیزه‌کانی داعش، داعش بووه‌ دوورنواڕێکی سه‌ره‌نجڕاکێش بۆ ناوبراو.
ناوبراو به‌ ئێمه‌ی وت له‌ گفتوگۆ له‌گه‌ڵ هاوڕێیان و ئه‌ندامانی ئانلاینی داعش به‌و ده‌ره‌نجامه‌ گه‌یشتووه‌ که‌ ئه‌م گرووپه‌ ئیسلامی به‌ شێوازێکی سه‌ره‌کی و باشترین شێوه‌ جێبه‌جێ ده‌که‌ن.
کاتێک که‌ له‌وم پرسی که‌ چۆن ته‌ڤلی ئه‌و گرووپه‌ بووه‌ که‌ یه‌کێک له‌ به‌هێزترین دوژمنانی خه‌ڵکی کورد دێته‌ ئه‌ژمار، ڕوونی کرده‌وه‌ که‌ چلۆن "له‌لایه‌ن که‌سانێکه‌وه‌ که‌ پێشتر ده‌یانمناسی فریوم خوارد؛ ئه‌و کوردانه‌ی که‌ ته‌ڤلی خه‌لافه‌تی داعش بوون‌ و له‌و شوێنه‌دا په‌یوه‌ندییان له‌گه‌ڵ من گرت و هاوڕێیانێک که‌ به‌رده‌وام له‌گه‌ڵیان په‌یوه‌ندیم بوو. دۆستایه‌تی من له‌گه‌ڵ ئه‌و که‌سانه‌ی که‌ ده‌یانمناسی و ئایه‌ته‌کان [چه‌ندین ئایه‌ت له‌ قورئان] و حه‌دیس [له‌باره‌ی لێدوان و کاره‌کانی حه‌زره‌تی محه‌مه‌د(د.خ)] کاریگه‌ری له‌سه‌ر من دانا و منیان ڕازی کرد که‌ بچمه‌ ڕیزی داعشه‌وه‌."
ئه‌و دۆستانه‌ی که‌ پێشتر ته‌ڤلی داعش بوون دیدارێکیان له‌گه‌ڵ یه‌کێک له‌ ئه‌ندامانی ئه‌و گرووپه‌ له‌ کوردستان ئه‌نجام دا. له‌و کۆبوونه‌وه‌دا، داوا له‌ ناوبراو کرا له‌گه‌ڵ ژماره‌یه‌ک له‌ ئه‌ندامانی نوێ سه‌ردانی مووسڵ بکات به‌ڵام ناوبراو شک و گومانی بوو و حه‌زی ناکرد بنه‌ماڵه‌که‌ی به‌جێبێڵێت. ئه‌ندامانی داعش که‌ ده‌رفه‌تێکیان بۆ په‌ره‌پێدانی گرووپی خۆیان له‌ ناو حکوومه‌تی هه‌رێمی کوردستان وه‌ده‌ست هێنابوو داوایان له‌ ناوبراو کرد له‌ خانووه‌که‌ی بمێنێته‌وه‌ و چاوه‌ڕوانی فه‌رمانێکی زیاتر بێت. به‌ پێچه‌وانه‌ی ئارازی گه‌نج و که‌سێک که‌ منداڵێکی نه‌بوو و ئاماده‌ی سه‌ردانکردنی مووسڵ بوو، عه‌لی پابه‌ندی بنه‌ماڵه‌که‌ی بوو.
کاتێک که‌ له‌ومان پرسی که‌ بۆچی بوون له‌گه‌ڵ بنه‌ماڵه‌‌که‌ی پێ خۆشتر بوو تاکوو کۆچکردن، وه‌ڵامی دایه‌وه‌: "چونکه‌ ئه‌وان ئه‌و به‌خته‌یان به‌ من دا بۆ ئه‌وه‌ی که‌ له‌ شوێنێک که‌ ده‌ژیم به‌شێک له‌ خه‌لافه‌تی ئه‌وان بم؛ پێویست نه‌بوو سه‌ردانی مووسڵ بکه‌م و نه‌مده‌ویست بنه‌ماڵه‌که‌م به‌جێبێڵێم." ئه‌ندامانی نوێ داعش پاره‌یان به‌و دا.
ناوبراو وتی: "به‌ڵام ئه‌مه‌ ئه‌نگێزه‌ی سه‌ره‌کی من نه‌بوو" ناوبراو که‌ له‌ ئێستادا ئیدعا ده‌کات که‌ وازی له‌ ڕوانگه‌ توندڕه‌وه‌کانی هێناوه‌، ئاشکرای کرد که‌ "من به‌ ئیسلامێک که‌ ئه‌وان به‌ منیان ناساندبوو‌ و باوه‌ڕم به‌ خه‌لافه‌ت و به‌غدادی بوو، به‌ڵام چیتر باوه‌ڕم به‌وان نییه‌. ته‌نانه‌ت ئه‌وکاته‌ش شک و گومانم به‌وان بوو."
هه‌روا که‌ به‌رپرسێکی کوردی بواری هه‌واڵگری بۆ ئێمه‌ ڕوونی کرده‌وه‌ که‌ داعش له‌ ناو هه‌رێمی کوردستاندا چه‌ندین که‌سی هه‌واڵگر وه‌کوو به‌شێک له‌ تۆڕی لۆجستیکی خۆی به‌ خزمه‌ت وه‌رده‌گرێت. ناوبراو به‌ ئێمه‌ی وت: "ئه‌وان داوایان له‌ من ده‌کرد بۆ ئه‌وه‌ی جانتاکان کۆبکه‌مه‌وه‌ و یارمه‌تی به‌و شۆفێرانه‌ بده‌م که‌ له‌ مووسڵ و شاره‌کانی دیکه‌وه‌ سه‌ردانی کوردستان ده‌که‌ن." لانیکه‌م سێ جار، له‌گه‌ڵ شۆفێری ئه‌و لۆرییانه‌ی که‌ وه‌کوو په‌یامنێری داعش کاریان ده‌کرد دیدارم کرد. ئه‌وان جانتاگه‌لێکی پڕ له‌ چه‌ک و جیهازاتی سه‌ربازییان له‌ شوێنانه‌ دیاریکراوه‌کان بۆ که‌سانی دیکه‌ به‌جێده‌هێشت تاکوو ئه‌و که‌سه ‌جانتاکه‌ هه‌ڵبگرێت و له‌ دووره‌وه‌ تماشای ده‌کرد بۆ ئه‌وه‌ی له‌ گواستنه‌وه‌ی ئه‌و جانتایانه‌ دڵنیا بێته‌وه‌.
به‌م حاڵه‌شه‌وه‌، دوایین شتێک که‌ ناوبراو ڕاده‌ستی کرد شتێکی جیاواز بوو: بۆمبێکی ده‌ستکردی گه‌وره‌ بوو که‌ ده‌بوا له‌ کاتی ڕێوڕه‌سمی پیرۆزی شیعه‌کان له‌ ڕۆژی عاشوورا له‌ مزگه‌وتی شیعه‌کانی گه‌ڕه‌کی خۆی له‌ شاری سلێمانی به‌جێبهێشتبایه‌. به‌ وته‌ی عه‌لی، به‌ ته‌واوه‌تی ئامانجه‌که‌ ئاشکرا بوو: "مزگه‌وتی شیعه‌کان هه‌میشه‌ قه‌ره‌باڵغ بوو و ئه‌وان مورته‌دن و له‌ ڕووی ئایینییه‌وه‌ ئامانجێکی مه‌شرووع ئه‌ژمار ده‌کرێن." هاوکات حه‌زی ده‌کرد که‌ په‌شیمانی خۆی نیشان بدات و وتی: "ئه‌وکات به‌ دروستی بیرم نه‌ده‌کرده‌وه‌ و ئه‌وان کاریگه‌رییان له‌سه‌ر من دانابوو" هه‌رچه‌ند که‌ نامومکین بوو بزانین که‌ ئایا هه‌ستیارییه‌کانی ڕاسته‌قینه‌ بوون‌ یان بۆ ئه‌وه‌ی که‌ له‌گه‌ڵی ئێمه‌ قسه‌ی ده‌کرد وابوو. هه‌ڵبه‌ت بڕیاری کۆتایی ناوبراو له‌ ئه‌نجام نه‌دانی ئه‌و هێرشه‌ نیشان ده‌دات که‌ ئه‌و تا ڕاده‌یه‌ک په‌شیمان بۆته‌وه‌. ناوبراو به‌ دانانی ئه‌و بۆمبه‌ له‌ خانووی خۆی به‌ جانتایه‌ک که‌ پێدرابوو چووه‌ شوێنی ئاماژه‌پێکراو و ترسی له‌وه‌ بوو که‌ ڕاوێژکارانی داعش ئه‌ویان له‌ژێر چاودێری دانابێت. هیوادار بوو بۆ ئه‌وه‌ی به‌ بۆنه‌ی بارودۆخی ئه‌منی توند بتوانێت ئه‌وان ڕازی بکات که‌ ئه‌و بۆمبدانه‌رییه‌ ئه‌نجام نه‌ده‌ن. ئه‌مجار‌ ناوبراو زیاده‌له‌ڕاده‌ سه‌ره‌نجی هێزه‌ ئه‌منییه‌ کوردییه‌کانی به‌ره‌و لای خۆی ڕاکێشا و به‌ نزیک بوونه‌وه‌ به‌ مزگه‌وت ده‌ستگیر کرا.
به‌سه‌رهاتی عه‌لی له‌گه‌ڵ بارودۆخی ئێستای چۆنیه‌تی ئه‌ندامبوونی خه‌ڵک له‌ ناو گرووپه‌ تیرۆریستییه‌کان هاوڕێژییه‌کی زۆری هه‌یه‌. ناوبراو له‌ژێر کاریگه‌ری پێکهاته‌یه‌ک له‌ باوه‌ڕی ئایینی خۆی و به‌شداریی له‌ تۆڕێکی دۆستانه بوو‌ که‌ په‌یوه‌ندییه‌کی زۆری له‌گه‌ڵ داعش بوو و بووه‌هۆی ئه‌وه‌ی که‌ ناوبراو بۆ ته‌ڤل بوون به‌ داعش هان بدرێت. ئه‌گه‌رچی بێگومان چالاکییه‌ ئانلاینه‌کانی ناوبراویش کاریگه‌ر بوون به‌ڵام دوور له‌ چاوه‌ڕوانی بوو له‌ ئه‌گه‌ری ئه‌ندام نه‌بوونی دۆسته‌که‌ی له‌و گرووپه‌ و کوژرانی عه‌لی ته‌ڤلی داعش ببوایه‌.
تێگه‌یشتن و دیاریکردنی چیرۆکێکی ئاشکرا له‌ دوایین زیندانییه‌ک که‌ له‌گه‌ڵ ناوبراو دیدارمان کرد دژوارترین کاری ئێمه‌ بوو. وێده‌چێت ناوبراو حه‌ز ده‌کات که‌ ڕووداوه‌کان به‌ شێوه‌یه‌ک ڕابگه‌یێنێت که‌ خۆی به‌ بێتاوان نیشان بدات و به‌رپرسانی ئه‌منی کورد به‌رده‌وام قسه‌کانی ئه‌ویان ده‌پچڕاند بۆ ئه‌وه‌ی ڕاستی قسه‌کانی ناوبراو ئاشکرا بێت. به‌ پێچه‌وانه‌ی دیتران، جومعه‌ دانش و مه‌یلێکی که‌م سه‌باره‌ت به‌ داعش و ئایدیۆلۆژیای ئه‌و گرووپه‌‌ نیشانی ده‌دا و ئیدعای ده‌کرد که‌ به‌ بۆنه‌ی نه‌زانی و گه‌یشتن به‌ به‌رژه‌وه‌ندی دارایی ته‌ڤلی داعش ببوو.
جومعه‌ که‌ له‌و کاته‌دا کرێکارێکی بێکار بوو به‌ بۆنه‌ی زاواکه‌یه‌وه‌ له‌گه‌ڵ پیاوێک ئاشنا بوو که‌ له‌ ڕواڵه‌تدا ده‌یویست کارێک بۆ ناوبراو بدۆزێته‌وه‌. جومعه‌ ئیدعای کرد که‌ دواتر ئاگادار بووه‌وه‌ که‌ ئه‌م پیاوه‌ ده‌ستوپه‌یوه‌ندی داعش بووه‌. ئۆتۆمبێلێکی نوێ به‌ ناوبراو درا که‌ ده‌یتوانی وه‌کوو ته‌کسی له‌و ئۆتۆمبێله‌ که‌ڵک وه‌ربگرێت و به‌ ئێمه‌ی وت نه‌یده‌توانی ئه‌و پێشنیاره‌ ڕه‌ت بکاته‌وه‌. جگه‌ له‌وه‌، داوا له‌ ناوبراو کرا زانیاری بۆ داعش کۆبکاته‌وه‌. شۆفێرانی ته‌کسی ده‌توانن تایبه‌تمه‌ندییه‌کی جۆراوجۆریان بۆ ئه‌و گرووپه‌ ببێت، له‌وانه‌ به‌ بێ ئه‌وه‌ی که‌ که‌سێک شک و گومانی به‌وان بێت چه‌ندین شوێن بۆ ڕفاندنی خه‌ڵک و هێرش دیاری بکه‌ن. ئه‌گه‌رچی ناوبراو به‌شداریی له‌ هه‌ریه‌ک له‌و چالاکییانه‌ی ڕه‌ت کرده‌وه‌ به‌ڵام به‌رپرسانی کورد به‌ ئێمه‌یان ڕاگه‌یاند که‌ ناوبراو زانیارییه‌کانی هاوپه‌یوه‌ند به‌ شوێنی هێشتنه‌وه‌ی زیندانیانی گرینگ و شوێنه‌ هه‌ستیاره‌کانی دیکه‌ی شاره‌ کوردنشینه‌کانی به‌ داعش داوه‌.
به‌ وته‌ی جومعه‌، ناوبراو دوو مانگ پاش یه‌که‌مین په‌یوه‌ندی و له‌ کاتێکدا که‌ داوایان له‌ ناوبراو کرد بۆ ئه‌وه‌ی ئۆتۆمبێلێکی نوێ هه‌ڵبژێرێت ئاگادار بووه‌وه‌ که‌ په‌یوه‌ندی له‌گه‌ڵ داعش هه‌یه‌. "به‌ هاوڕێتی سێ یان چوار پیاو چووینه‌ شوێنێک بۆ ئه‌وه‌ی ئۆتۆمبێلێک بێنین. له‌ کاتێکدا که‌ گه‌یشتینه‌ ئه‌و شوێنه‌ ئه‌وان به‌ منیان ڕاگه‌یاند "ئێمه‌ له‌ ئه‌ندامانی داعشین و ئێمه‌ ده‌مانه‌وێت له‌و ئۆتۆمبێله‌ بۆ ئه‌نجامدانی ئۆپه‌راسیۆنێکی بۆمبدانه‌ری که‌ڵک وه‌ربگرین." ناوبراو ئیدعا ده‌کات له‌و شوێنه‌ "له‌وان نائۆمید بووم و به‌وانم ڕاگه‌یاند که‌ بچن و ئه‌وه‌ی که‌ من هیچ کارێکم له‌گه‌ڵ ئه‌واندا نییه‌. من له‌ چاره‌نووسی خۆم و بنه‌ماڵه‌که‌م ده‌ترسام و به‌وانم ڕاگه‌یاند که‌ ئه‌گه‌ر ئیزن به‌ من بده‌ن بچم و له‌گه‌ڵ هیچ که‌سێک له‌وباره‌وه‌ قسه‌ ناکه‌م." ناوبراو خۆی وه‌کوو یه‌کێک له‌ قوربانیانی لاوازی دووڕوویی داعش به‌ ئێمه‌ نیشان دا و پێداگری ده‌کرد که‌ "من نه‌خوێنده‌وارم و ده‌مه‌ویست به‌و ئۆتۆمبێله‌ کار بکه‌م و فریوی پاره‌م خواردووه‌. له‌و کاته‌وه‌ که‌ ئاگادار بووم ئه‌وان له‌ ئه‌ندامانی داعشن داوام له‌وان کرد که‌ واز له‌ من بێنن. من ئه‌وانم به‌جێهێشت به‌ڵام دواتر ده‌ستگیر کرام." به‌رپرسانی کورد ئه‌م ئیدعایه‌ی ناوبراویان ڕه‌ت کرده‌وه‌ و هه‌ندێ به‌ڵگه‌ له‌ به‌رده‌ستیاندا بوو که‌ خوشک و ژماره‌یه‌ک له‌ ئه‌ندامانی دیکه‌ی بنه‌ماڵه‌ی ناوبراو له‌ ئه‌ندامانی داعش له‌ عێراقن و ئه‌م به‌ڵگانه‌ ده‌ریده‌خات که‌ چۆن زاواکه‌ی جومعه‌ توانیویه‌تی ناوبراو له‌گه‌ڵ تۆڕی داعش له‌ کوردستان ئاشنا بکات.
ڕیوایه‌ته‌کانی چیرۆکی ناوبراو پڕ له‌ گومان بوو و نامومکین بوو بکرێ وێنه‌یه‌کی ڕوون له‌ چۆنیه‌تی په‌یوه‌ندی جومعه‌ له‌گه‌ڵ داعش بدۆزرێته‌وه‌. به‌ هه‌ر حاڵ، چیرۆکی جومعه‌ (هه‌رچه‌ندیش گوماناوی) و که‌سانێکی دیکه‌ که‌ له‌گه‌ڵیاندا قسه‌مان ده‌کرد یارمه‌تی ئێمه‌ی دا بۆ ئه‌وه‌ی تێگه‌یشتنێکی که‌م له‌ چۆنیه‌تی چالاکی داعش له‌ هه‌رێمی کوردستان و ئه‌نگێزه‌ی کورده‌کان بۆ چوونه‌ ناو ڕیزی ئه‌م گرووپه‌مان ببێت.
شه‌ڕ بۆ سه‌ربه‌خۆیی
چیرۆکی ئه‌ندامانی داعش له‌ کوردستان ده‌بوا دژواری کێشه‌کانی هه‌رێم به‌ ئێمه‌ نیشان بدات. هیچ شوێنێکی پیرۆز نییه‌ و هه‌ر که‌س ده‌بێ ئاگاداری ئه‌و به‌ڵێنانه‌ی بێت که‌ دیتران به‌ ناوبراوی ده‌ده‌ن. هیچ هۆکار یان تێئۆرییه‌کی یه‌که‌ ناتوانێت چۆنیه‌تی دروست بوونی توندڕه‌وی شی بکاته‌وه‌ و ڕێبازی هه‌ر که‌سێکی تایبه‌ت به‌ خۆی بووه‌ و له‌ ژێر کاریگه‌ری چه‌ندین هۆکاری تاکه‌که‌سی و هه‌روه‌ها بیانییه‌.
له‌ ڕاستیدا، ده‌کرێ ماوه‌یه‌کی زۆر بۆ دۆزینه‌وه‌ی هۆکاری گۆڕینی خه‌ڵک به‌ تیرۆریست دابنرێت له‌ حاڵێکدا که‌ ڕه‌نگه‌ ده‌بێ پرسیارێکی زۆر ڕوونتر له‌ خۆمان بپرسین: بۆچی نا؟ ئه‌گه‌ر ئێمه‌ بتوانین به‌ تێگه‌یشتنێکی باشتر له‌ هۆکاره‌کانی خۆڕاگری که‌سێک له‌ به‌رانبه‌ر وه‌ڵامدانه‌وه‌ به‌ توندوتیژی جیهادییه‌کان بگه‌یێن، زانستی خۆمان له‌باره‌ی دیارده‌ی داعش زۆر به‌رز کردۆته‌وه‌.
به‌ ئاوڕدانه‌وه‌ له‌ نزیکبوونه‌وه‌ی کوردستان به‌ ناوچه‌ی ژێر کۆنتڕۆڵی داعش و ئه‌م ڕاستییه‌ که‌ زۆربه‌ی کورده‌کانی عێراق سوننه‌ن، ژماره‌ی ئه‌و کوردانه‌ی که‌ چوونه‌ته‌ ناو ڕیزی داعشه‌وه‌ زۆر که‌من. ناکرێ به‌ دڵنیاییه‌وه‌ پرسیار بکرێت که‌ بۆچی کورده‌کان به‌ پێچه‌وانه‌ی دراوسێیه‌ عه‌ره‌به‌کانی خۆیان، سه‌لماندوویانه‌ که‌ له‌ به‌رانبه‌ر مه‌یل به‌ جیهادیگه‌ری جیهانی خۆڕاگرییه‌کی زیاتریان نیشان داوه‌. یه‌کێک له‌ وه‌ڵامه‌کان ئه‌وه‌یه‌ که‌ شه‌ڕی کورده‌کان بۆ مانه‌وه‌ و سه‌ربه‌خۆیی، فه‌رهه‌نگ و شوناسێکی دروست کردووه‌ که‌ نه‌ته‌وه‌خوازی و نه‌ک ئایین ئه‌وه‌ پێناسه‌ ده‌کات. به‌م حاڵه‌شه‌وه‌، هه‌روا که‌ لێکۆڵینه‌وه‌کانی ئێمه‌ نیشان ده‌دات داعش ته‌نانه‌ت لێره‌دا خۆی بۆ ژماره‌یه‌کی به‌رچاو له‌ خه‌ڵک به‌ سه‌ره‌نجڕاکێش نیشان داوه‌. دۆزینه‌وه‌ بۆ وه‌ڵامی ئه‌و پرسیارانه‌ درێژه‌ی ده‌بێت.
 
سه‌رچاوه‌: فارن ئێفرز
وه‌رگێڕان له‌ فارسییه‌وه‌: سروور خدری

کۆدی بابه‌ت: 65718  |  به‌روار: ۱۳۹۵/۹/۳  |  کاتژمێر: 13 : 48

FaceBook   Twitter   Delicious   Digg   Buzz   Google Bookmarks   ˜áæÈ  
ناردنی بۆچوون
ناو و شۆره‌ت:
ئیمه‌یل:
بۆچوون:
بۆچوونی نێردراو‬
هه‌واڵی پێوه ندیدار
دوایین هه‌واڵه‌کان
گرفتی سنوورنشینانی ئازەربایجانی ڕۆژئاوا تاوتووێ کرا
بازاڕ بوورسی ئەستەنبۆڵ کەوتۆتە ژێر کاریگەریی ڕیفراندۆمی هەرێم
بیست و نۆهەمین فستیڤاڵی شانۆگەری پارێزگای کرماشان کۆتایی پێهات/ سەرکەوتووان بۆ فستیڤاڵی فەجر ناسێندران
١٠٠٠ ملیارد تمەن قەرزی کارڕەخسێنی تەرخانی پارێزگای کوردستان دەکرێت
سنە نازناوی دووهەمی پێشبڕکێیەکانی هەندباڵی تازەلاوانی ناوچەی ٤ی ئێرانی مسۆگەر کرد/ ڕاکەری بانەیی لە پلەی دووهەمی ڕاکردنی ئۆمێدی وڵات وەستا
گوژمەی کەرتی گەشتیاری کرماشان لە سەدا 80 بەرز کرایەوە
فرۆکەکانی سوپای تورکیا باکووری عێراقیان بۆردومان کرد
کۆڕبەندی نێونەتەوەیی "زەکریای ڕازی" له کرماشان بەڕێوه دەچێت
ڕیفراندۆمی سەربەخۆیی هەرێم پڕاتیگی پڕۆژەی ئیسرائیلە
قەدەغەی هاتوچۆ لە ٤٦ گوند و گەڕەکی پارێزگای ئامەد ڕاگەیێندرا
تورکیا، سووریا و ئێران لە دژی جودایی خوازان هاوپەیمانییەک پێک بێنن
دەرهێنەرێکی سنەیی خەڵاتی باشترین دەرهێنەری مسۆگەر کرد
بەشداری پرۆسەی ڕیفراندۆم نابین
پووتین بۆ دیدار لە گەڵ ئەردۆغان سەردانی تورکیا دەکات
فوئاد مەعسووم و یان کۆبیچ جەختیان کردەوە لە چارەسەرکردنی کێشەکانی نێوان هەرێم و بەغدا
ئیمکانات