مامۆستا فایه‌ق بێکه‌س شاعیری ره‌خنه‌ کۆمه‌ڵایه‌تییه‌کان
به‌شی فه‌رهه‌نگ و هونه‌ر- بێکه‌س وه‌کوو ره‌خنه‌گرێکی کۆمه‌ڵگا زامه‌کان پیشان ده‌دات و به‌گژ خۆی و کۆمه‌ڵگاکه‌یدا ده‌چێته‌وه‌ که‌ چیتر سرت و سڕی واز لێبێنن و شێرانه‌ به‌خۆیاندا بچنه‌وه‌. له‌م روانگه‌وه‌ ده‌کرێت مامۆستا بێکه‌س به‌ مارتین لۆسه‌ره‌وه‌ بشوبهێنین.
کوردپرێس:
ئیتتیفاقێ گه‌ر نه‌که‌ى، له‌م جه‌هله‌ خۆت ڕزگار نه‌که‌ى
پاشه‌ڕۆژت قه‌ڵپه‌ به‌خوا عه‌یش و نۆشیت زارییه‌‏
راسته‌ بێکه‌س نابێته‌ مارتن لۆسه‌رى کورد، نه‌ کوردستان ئه‌مه‌ریکایه‌ و نه‌ کۆمه‌ڵگه‌ى کوردى کۆمه‌ڵگه‌که‌ى مارتین لۆسه‌ره‌، لۆسه‌ر دژى کۆیلایه‌تیى ڕه‌شپێسته‌کان​، دژى نادادى، دژى زوڵمى که‌نیسه‌، شۆڕشێکى نه‌رم و ناتوندوتیژى به‌رپاکرد، له‌ وڵاتێکى خاوه‌ن ده‌ستوور و مافى مه‌ده‌نى و وڵاتێک که‌ نیشتمانى زۆرێک له‌ فه‌یله‌سووف و لێکۆڵه‌ره‌ ئازادیخوازه‌کان بووه‌، نه‌ک هه‌ر ئه‌وه‌، له‌و وڵاته‌ بووه‌ داواکردن و جێبه‌جێکردنى مافه‌کانى مرۆڤ، تا ڕاده‌یه‌کى زۆر چووه‌ته‌ پێشێ، به‌ڵام له‌و پێناوه‌شدا کوژرا.
مه‌به‌ستم له‌ مارتین لۆسه‌ر کینگه‌ (Martin Luther King j r) که‌ له‌ 29ى مانگى 1ى 1929ز له‌ ئه‌تڵه‌نتا له‌ وڵاته‌ یه‌کگرتووه‌کانى ئه‌مه‌ریکا له‌دایک بووه‌. له‌ 4ى نیسانى 1968 له‌ ته‌مه‌نى 39 ساڵیدا له‌ مێمفیز (Memphis) هه‌ر له‌ ئه‌مه‌ریکا کوژراوه‌ (Assassinated)، له‌و ته‌مه‌نه‌ که‌مه‌یدا مارتین لۆسه‌ر کینگ، کارى زۆرى کرد، چالاکیى به‌رده‌وامى هه‌بوو، بزووتنه‌وه‌که‌یشى به‌ (بزووتنه‌وه‌ى مافه‌ مه‌ده‌نییه‌کان) و (بزووتنه‌وه‌ى ئاشتى) ناسرابوو. هه‌ر له‌و پێناوه‌شدا خه‌ڵاتى نۆبڵى ئاشتى له‌ ساڵى 1964، واتا چوار ساڵ پێش کوشتنى، پێ به‌خشرا، ئه‌وه‌ش له‌به‌ر (به‌ره‌نگاربوونه‌وه‌ى ڕه‌گه‌زپه‌رستى و نایه‌کسانى به‌ شێوازى ناتوندوتیژ). دواى کوژرانیشى چه‌ندان خه‌ڵاتى دیکه‌ى پێ به‌خشرا، گرنگترینیان مێدالیاى سه‌رۆکایه‌تى بۆ ئازادى له‌ ساڵى 1977ز، خه‌ڵاتى مێدالیاى زێڕى کۆنکریسى ساڵى 2004 (سایت و کتێبى شه‌هیدانى مافه‌کانى مه‌ده‌نى (Civil Rights Martyrs) (.
به‌ڵام بێکه‌س کێیه‌؟ من لێره‌دا بێکه‌س وه‌ک ( تاکه‌که‌س یان هاووڵاتى) ناناسێنم، ئه‌وه‌ش مه‌به‌ستى من نییه‌، به‌ڵکوو بێکه‌س وه‌ک نه‌ته‌وه‌، وه‌ک وڵات، وه‌ک کۆمه‌ڵگه‌، وه‌ک شوێنى رۆشنبیر و ئاستى تێگه‌یشتنى گشتیم مه‌به‌سته‌، له‌و ڕووه‌وه‌ بێکه‌س کێیه‌؟
بێکه‌س سه‌ر به‌ کام کۆمه‌ڵگه‌یه‌ که‌ له‌گه‌ڵ کۆمه‌ڵگه‌که‌ى مارتن لۆسه‌ر گینگ به‌راوردى که‌ین؟ ئه‌وه‌ بۆ ئێوه‌ جێ ده‌هێڵم، چونکه‌ من چه‌ند له‌و بابه‌ته‌م کۆڵییه‌وه‌ بێ هیوا و بێ هیواتر ده‌بووم. ئه‌وه‌ى بابه‌ته‌که‌شمى به‌و ڕێیه‌دا برد دوو هۆ بوون، که‌ هه‌ردووکیان په‌یوه‌ندییان به‌ بێکه‌سه‌وه‌ هه‌یه‌:
یه‌که‌م: شیعرێکى بێکه‌س خۆیه‌تى که‌ داوا ده‌کات (خوایه‌ لۆسه‌رێک بنێرى)، باوه‌ڕم وایه‌ که‌ بێکه‌س هه‌م زانیاریى له‌سه‌ر لۆسه‌ر هه‌بووه‌ و هه‌م رووحیه‌تى ڕه‌خنه‌گرتنى کۆمه‌ڵایه‌تیى بێکه‌سى ده‌وڵه‌مه‌ندتر کردووه‌، که‌ دواتر باسى ده‌که‌م.
دووه‌م: ڕه‌خنه‌کانى بێکه‌س له‌ دیارده‌ کۆمه‌ڵایه‌تییه‌کانى ناو خودى نه‌ته‌وه‌که‌ى خۆى، ئه‌گه‌ر ئه‌وه‌ش بزانین که‌ به‌شێکى دیارى چالاکییه‌ گرنگه‌کانى لۆسه‌ر له‌و کاته‌دا بووه‌ که‌ بێکه‌س له‌وپه‌ڕى جۆشوخرۆشى خۆیدا بووه‌.
بێکه‌س و ره‌خنه‌ى سیاسى
بێکه‌س یه‌که‌م شاعیره‌ که‌ به‌و شێوه‌ راسته‌وخۆ و ئازایانه‌ و کاریگه‌رانه‌ ره‌خنه‌ى کۆمه‌ڵایه‌تى و سیاسى له‌ خودى کورد ده‌گرێ. ئه‌و باوه‌ڕى وایه‌ که‌ ده‌بێ راسته‌وخۆ نه‌خۆشییه‌که‌ دیار بکرێ و ده‌ستى بخرێته‌ سه‌ر، تا چاره‌سه‌ر بکرێ. راسته‌ شاعیرى ره‌خنه‌گرى دیکه‌ى زۆر گرنگمان هه‌ن، قانیع نموونه‌یه‌کى دیاره‌، رۆڵى گرنگى له‌ رووبه‌ڕووبوونه‌وه‌ى جه‌ور و سته‌مدا هه‌بووه‌، ئه‌زموونى ژیانى خۆى که‌ ده‌وڵه‌مه‌نده‌، کردووه‌ته‌ ئاوێنه‌ى گه‌له‌که‌یشى، سه‌رده‌مێکى درێژ شیعرى (قوڕ به‌سه‌ر ئه‌و میلله‌ته‌ى هیواى به‌ به‌ندیخانه‌یه‌) وێردى سه‌ر زارى لاوان بوو.
بێکه‌س له‌ شاردا ژیاوه‌ و راسته‌وخۆ ره‌خنه‌ى توندى له‌و دیاردانه‌ گرتووه‌ که‌ له‌گه‌ڵ رووحى دادپه‌روه‌رى و رێڕه‌وى شارستانیدا ناگونجێن.
هه‌موو شیعرێکى بێکه‌س روحیه‌تى ره‌خنه‌گرتنى تێدایه‌، بۆیه‌ ره‌خنه‌گرتن به‌سه‌ر هه‌موو شیعره‌کانیدا بڵاو بووه‌ته‌وه‌، ئه‌وه‌نده‌ى ڕه‌خنه‌ له‌ناو شیعره‌ سیاسییه‌کانىدا ڕه‌نگى داوه‌ته‌وه‌، که‌ پێش ئه‌وه‌ى ئه‌و شیعرانه‌ وه‌ک شیعرى به‌رگرى ته‌ماشا بکرێن ڕه‌خنه‌ى سیاسین و ئاڕاسته‌ى میلله‌ته‌که‌ى خۆى کردووه‌. هه‌ر له‌ یه‌که‌م شیعریدا که‌ له‌ دیوانه‌که‌ى بڵاو بووه‌ته‌وه‌، ده‌رده‌ قووڵه‌کانى کورد ده‌خاته‌ به‌رچاو (قه‌ومى کورد ئه‌مڕۆ که‌ دائیم وا له‌ حاڵى حه‌سره‌ته‌... باعیسى فیتنه‌ و فه‌ساد و دوودڵیى ناو میلله‌ته‌...\ دیوانى بێکه‌س.لا 53)
ئه‌و به‌شه‌ى دیوانه‌که‌ى که‌ له‌ژێر ناوى (کوردایه‌تی)دایه‌، له‌ بیست شیعر پێکدێت، نۆ شیعریان به‌ته‌واوى بۆ ڕه‌خنه‌ى سیاسى له‌ خودى میلله‌ته‌که‌ى ته‌رخان کراوه‌. شیعره‌کانى (ئه‌ى وه‌ته‌ن مه‌فتوونى تۆم، دارى ئازادى، قه‌ومى کورد، بۆ شه‌هیدانى 19ى حوزه‌یران، بیست و حه‌وت ساڵه‌، بۆ شێخ مه‌حموود جه‌وده‌ت) ئه‌و شیعرانه‌م وه‌ک به‌رگرى و ستاییشى نیشتمان و سروودى ئازادى پۆلێن کردووه‌. شیعره‌کانى دیکه‌ى ئه‌و به‌شه‌ به‌تایبه‌تى (فیکرى سه‌رکه‌وتن، ئامۆژگارى بۆ میلله‌ت، وه‌فدى کوردستان، ئه‌ى کورد به‌سیه‌تى، ده‌ردى ده‌روون، سه‌ده‌ى بیسته‌مه‌، چاو به‌ست) ئه‌و شیعرانه‌ن که‌ بێکه‌س ڕاسته‌خۆ ره‌خنه‌ى توندى له‌ گه‌له‌که‌ى خۆى گرتووه‌، ده‌رده‌ قووڵه‌کانى ده‌ستنیشان کردووه‌، که‌ تائێستا کورد به‌ ده‌ستیانه‌وه‌ ده‌ناڵێنێ.
هه‌ر کاتێک ئه‌و شیعرانه‌ى بێکه‌س ده‌خوێنمه‌وه‌، سروشتى کۆمه‌ڵى کورده‌واریی ئه‌وده‌م ده‌هێنمه‌ به‌رچاو، ده‌شێ ئه‌و وێنانه‌ى وه‌ک ئه‌رشیفیش ماون یارمه‌تیمان بده‌ن بۆ زیاتر تێگه‌شتنى که‌سایه‌تیى تاکى کورد، گرنگترین ئه‌و که‌لوپه‌لانه‌ى که‌ هه‌میشه‌ له‌گه‌ڵیان بووه‌، کیسه‌ى تووتن، ته‌سبیح، گۆچان، هه‌ندێ جار تفه‌نگ و فیشه‌کدان. به‌ دیوى گشتیدا واتا له‌ ده‌وروپشتى چه‌ند دوکان و خانوویه‌کى قوڕ، عه‌ره‌بانه‌ى ئه‌سپ، یان تراکتۆر و جێب. ڕاسته‌ ئێستا وێنه‌کان گۆڕاون، که‌لوپه‌له‌ که‌سییه‌کان بوونه‌ ئایفۆن و ئایپاد و کۆمپیته‌ر و ئه‌نته‌رنێت، که‌لوپه‌له‌ گشتییه‌کان بوونه‌ مۆڵى گه‌وره‌ و خانووى ئه‌لیکۆبۆن و شووشه‌به‌ند، مۆنیکا و هه‌مه‌ر و زۆر جار جاکوار و لیمۆزین، پرسیاره‌که‌ى من ئه‌وه‌یه‌: بۆچى هه‌موو شته‌کان گۆڕان و کۆمه‌ڵگه‌ له‌ رووى عه‌قڵییه‌وه‌ چه‌قى؟ نه‌ک پرسیاره‌کانى بێکه‌س، نه‌ک ڕه‌خنه‌کانى وه‌ک خۆى ماون، به‌ڵکوو جورئه‌تى پرسیارکرنه‌که‌ش که‌م بووه‌ته‌وه‌، نه‌ک هیچ هاندانێک نییه‌ بۆ پرسیارکردن، به‌ڵکوو زه‌مینه‌ى هێرش بۆ سه‌ر ماناى پرسیاره‌کان فراوانتره‌. ئه‌رێ که‌س پرسیارى ئه‌وه‌ى کردووه‌؟ ئه‌رێ ئێستا (که‌سایه‌تیى بێکه‌س)ئاسا نه‌ له‌ رووى شیعره‌وه‌، به‌ڵکوو له‌ رووى فیگه‌رى کۆمه‌ڵایه‌تییه‌وه‌ بۆچ هه‌ڵناکه‌وێ؟ که‌ هه‌یه‌ و هه‌ڵده‌که‌وێ بۆچى بوارى ده‌رکه‌وتنیان نییه‌؟ ئایا هه‌یکه‌لى که‌سایه‌تیى کوردى گۆڕاوه‌ و جیناتى شێوازێکى تازه‌ى وه‌رگرتووه‌، یان پانتایى کۆمه‌ڵایه‌تى به‌ جارێک داگیر کراوه‌ و بووه‌ته‌ یه‌ک ره‌نگ؟ ئه‌وه‌ بابه‌تێکه‌ چه‌ند په‌یوه‌ندیى به‌ ره‌خنه‌کانى بێکه‌سه‌وه‌ هه‌یه‌، سه‌د ئه‌وه‌نده‌ په‌یوه‌ندیى به‌ بونیادى کۆمه‌ڵایه‌تیى کورد و بنه‌ماکانى پرسیارکردن و سه‌رچاوه‌ فکرییه‌کانى کۆمه‌ڵگاوه‌ هه‌یه‌. من ته‌نیا داوا له‌ ئێوه‌ ده‌که‌م تا بوار ده‌بێ و به‌درێژى ئه‌و بابه‌ته‌ به‌سه‌ر ده‌که‌مه‌وه‌، با هه‌موومان بیر له‌ (سه‌رچاوه‌ فکرییه‌کانى) کۆمه‌ڵگه‌ى کوردى بکه‌ینه‌وه‌، چین و کوێن؟ وردتر، کۆمه‌ڵگه‌ى کوردى پشت به‌ چ سه‌رچاوه‌یه‌کى فکرى ده‌به‌ستێ بۆ گه‌شه‌ى مه‌عریفه‌ و زانستى؟ بۆ گۆڕینى ستایلى ژیان؟ بۆ..و بۆ؟
شیعره‌ سیاسییه‌کانى بێکه‌س سه‌رچاوه‌یه‌کى زیندوون بۆ تێگه‌یشتن له‌ بێکه‌س و ئاستى بیرکردنه‌وه‌ى ده‌وروبه‌رى و ره‌خنه‌کانیشى. هه‌ر له‌و ڕێگایه‌وه‌ ده‌رده‌ قووڵه‌کانی کۆمه‌ڵگه‌که‌شى دیار کردووه‌.
شیعرى (فکرى سه‌رکه‌وتن) نمایشێکى سه‌رکه‌وتووى بیرکردنه‌وه‌ى گشتى له‌لایه‌ک و ره‌خنه‌که‌ى بێکه‌س نیشان ده‌دات له‌لایه‌کى دیکه‌وه‌. چۆن؟ ئاوا ده‌ست پێده‌کات (فکرى سه‌رکه‌وتن به‌بێ شک، ئه‌ى ڕه‌فیقان غیره‌ته‌) بێکه‌س ده‌مارى کوردى خێڵه‌کى ده‌ناسێت و ده‌زانێ (غیره‌ت) چ کاریگه‌رییه‌کى گرنگى له‌ ژیانیاندا هه‌یه‌. بۆ سه‌رکه‌وتن به‌ غیره‌ته‌وه‌ ده‌به‌ستێته‌وه‌، له‌دواى یه‌ک دێڕ له‌ جووڵاندنى غیره‌تیان، زله‌یه‌کى زۆر به‌هێزیان لێ ده‌دات:
قه‌ومى کورد ئه‌مڕۆ که‌ دائیم وا له‌ حاڵى حه‌سره‌ته‌
باعیسى فیتنه‌ و فه‌ساد و دوودڵیى ناو میلله‌ته‌. (دیوانى بێکه‌س، لاپه‌ڕه‌..53)
به‌ڵام ئه‌و مارتن لۆسه‌ره‌ى کورد باز به‌سه‌ر شێرانى میلله‌تدا نادات و داوایان لێ ده‌کات (فیکرى وه‌حشه‌ت) لابده‌ن، من نازانم بێکه‌س بێئاگایانه‌ یان به‌ئاگایانه‌وه‌ ئه‌و کاره‌ ده‌روونییه‌ پڕ بایه‌خه‌ى له‌گه‌ڵ گه‌له‌که‌ى کردووه‌، به‌ڵام نیشانه‌که‌ى پێکاوه‌. با دێڕه‌که‌ بنووسینه‌وه‌:
قه‌ومى کورد، شێرانى میلله‌ت! فیکرى وه‌حشه‌ت لابده‌ن
وه‌ختى تێکۆشینه‌ ئه‌مڕۆ، رۆژى عیلم و سه‌نعه‌ته‌
شێر ڕه‌مزى ئازایه‌تییه‌، وه‌ک له‌ شیکردنه‌وه‌که‌ى سیفینکسدا ده‌بینین، ڕه‌مزى ده‌سه‌ڵات و به‌رگریشه‌، ڕه‌مزى وه‌حشییه‌تیشه‌ وه‌ک پادشاى دارستان. لاى بێکه‌س چۆن؟ به‌ هه‌مان شێوه‌ ڕه‌مزى ئازادییه‌، ڕه‌مزى به‌رگرى و فیداکارییه‌، به‌ هه‌ڵکه‌وت نییه‌ له‌ هه‌مان نیوه‌دێڕى که‌ شێرانى میلله‌تى تێدایه‌، وشه‌ى (وه‌حشه‌ت)ى به‌کارهێناوه‌، ئه‌و شێرێکى ده‌وێت که‌ (فکرى وه‌حشه‌ت لابده‌ن)، به‌ڵام که‌س نکۆڵى له‌وه‌ ناکات که‌ شێر وه‌ک سروشتى خۆى (وه‌حشییه‌) که‌ کێوییه‌. بۆیه‌ ئه‌و ڕاسته‌وخۆ پێیان ده‌ڵێ ده‌بێ شێرانى میلله‌ت وه‌حشى بوون واز لێ بێنن، چوونکه‌ (ڕۆژى عیلم و سه‌نعه‌ته‌). ئه‌و شاعیره‌ى دارى ئازادى ده‌نووسێ، هه‌موو ئازادییه‌ک به‌ خۆی ده‌دات، یه‌که‌م جار به‌رامبه‌ر گه‌له‌که‌ى خۆى ئه‌وجار نه‌یاره‌کانى، له‌و ئازادى به‌خۆدانه‌ چه‌ند کۆمه‌ڵگه‌ ده‌خاته‌ ژێر پرسیاره‌وه‌، ئه‌وه‌نده‌ش شوێنى خۆى ئه‌و وه‌ک باوکێک و وه‌ک کاره‌کته‌رێکى کۆمه‌ڵایه‌تى ده‌خاته‌ مه‌ترسییه‌وه‌، ئه‌وه‌ش گۆڕانکارییه‌کى قووڵ له‌ بیرکرنه‌وه‌ى گشتیدا به‌رامبه‌ر به‌ خۆى دروست ده‌کات، با ئه‌و گۆڕانکارییه‌ نه‌شچووبێته‌ قاڵبێکى گوتاره‌وه‌، به‌ شێوه‌یه‌کى هه‌ستپێکراو و ڕاسته‌وخۆ رێک نه‌خرابێ. بۆ ئه‌وه‌ى مه‌به‌سته‌که‌م روونتر بێته‌وه‌، ئه‌و کاته‌ى ئاڕاسته‌ى ره‌خنه‌کانى بێکه‌س له‌سه‌ر دوو ئاستى جیاواز فۆڕمى خۆیان وه‌رده‌گرن، یه‌که‌میان ڕه‌خنه‌گرتن له‌ نه‌یاران و دوومیان ڕه‌خنه‌گرتن له‌ میلله‌ته‌که‌ى خۆى، بۆیه‌ دوژمنه‌کانیش له‌ دوو به‌ره‌وه‌ رووبه‌ڕووى ده‌بنه‌وه‌، به‌ره‌ى یه‌که‌مى دوژمنه‌که‌ى دیار و ئاشکرایه‌ و خۆى ناشارێته‌وه‌، دژى ده‌وه‌ستێته‌وه‌ و تانه‌ى لێ ده‌دات و له‌ وه‌زیفه‌ فه‌سڵى ده‌کات و زیندانى ده‌کات و دارکارى و ئیهانه‌ى ده‌کات، ئه‌ویش به‌وپه‌ڕى له‌خۆبوردنه‌وه‌ به‌رگه‌ ده‌گرێت و ملکه‌چ ناکات و به‌سه‌ریاندا هاوار ده‌کات. به‌ره‌ى دووه‌مى دوژمنه‌کانى یان گونجاوتر بڵێین (نه‌یاره‌کانى) له‌ناو کۆمه‌ڵگه‌ى خۆیدایه‌، هاوسێ و سیاسى و مه‌لاى ناو شاره‌که‌ى خۆى بوون، موحافیزکار و بازرگان و ته‌قریرنووس، پۆلیسه‌کانى ئه‌خلاق و ژن بوون.
به‌ ڕاده‌یه‌ک له‌و وڵاته‌ ده‌وڵه‌مه‌نده‌ نانێکى شه‌ره‌فمه‌ندانه‌ بۆ بێکه‌س ده‌به‌نه‌ پشتى شێر. ئه‌وه‌ چاره‌نووسى شاعیرێکه‌ که‌ دارى ئازدى ده‌نووسێ و بۆ خۆیشى ئه‌زموونى ئه‌وپه‌ڕى ئازادى ده‌کات له‌ شیعره‌کانیدا. که‌ جارێ ته‌نیا له‌ شیعرى (فیکرى سه‌رکه‌وتن)دا بمێنینه‌وه‌، ته‌نیا بۆ ڕاچڵه‌کاندانى کۆمه‌ڵگه‌ى کوردى پشت به‌ فه‌رهه‌نگ و وشه‌کانى ئه‌و شیعره‌ ده‌به‌ستم، ده‌بینین به‌ چ وشه‌گه‌لێک کۆمه‌ڵگه‌که‌ى خۆى داغ ده‌کات، به‌و مه‌به‌سته‌ى هه‌ستیان بجووڵێنێ و له‌ چاره‌ڕشیى خۆیان به‌ئاگایان بێنێ، ئه‌و وشه‌گه‌له‌ى به‌ره‌وڕوو کردوونه‌وه‌ (فیتنه‌وه‌ و فه‌ساد، بێ عیلم و بێ سنعه‌ت، له‌ژێر پێى ئه‌جنه‌بى و بێ قیمه‌ت! سووک و بێ ناونیشان، ده‌رد و زیلله‌ت). هێمنترین دێڕیش که‌ له‌و شیعردا نووسیویه‌تى، دوا دێڕه‌، ئه‌و دێڕه‌ش رووى له‌ خه‌ڵکى گشتى نییه‌ و روو له‌و که‌سانه‌یه‌ که‌ تا ڕاده‌یه‌ک ناڕازین و به‌ جۆڕێک له‌ سیسته‌مى سیاسى و کۆمه‌ڵایه‌تی نیگه‌رانن، به‌ڵام دیسان به‌ زمانى ڕه‌خنه‌ روویان تێ ده‌کات:
هه‌وڵ و تیکۆشین به‌ ته‌نیا هه‌ر به‌ده‌م که‌ڵکى نییه‌
گرمه‌ گرمى هه‌ورى بێ باران نیشانه‌ى زه‌یقه‌ته‌
ئه‌و ئاگره‌ى ده‌روونى بێکه‌سى ته‌نیوه‌ته‌وه‌ و میلله‌تى (بێ خه‌به‌ر) لێى بێ ئاگایه‌، له‌ شیعرى (ئامۆژگارى بۆ میلله‌ت.. دیوانى بێکه‌س، لاپه‌ڕه‌: 54) ده‌گاته‌ لووتکه‌. (کورده‌ تا که‌ى بێ خه‌به‌ر بى؟ نووستنت بێ عارییه‌)، ئه‌م شیعره‌ یه‌کێکه‌ له‌ شیعره‌ هه‌ره‌ برینداره‌کانى بێکه‌س، ئه‌ونده‌ له‌ قووڵایى گه‌له‌که‌یه‌وه‌ دێته‌ گۆ، خۆى به‌ به‌رپرسیار ده‌زانێ. لێره‌ په‌نا بۆ وانه‌گوتنه‌وه‌ ده‌بات، نموونه‌ دێنێته‌وه‌ و مێژوو ده‌کاته‌ به‌ڵگه‌، ره‌خنه‌ ده‌گرێت و چاره‌سه‌ر داده‌نێ، ره‌خنه‌کانى (نووستنت بێ عارییه‌، دواکه‌تنت.. بێ کارییه‌، ئه‌سیرى، عه‌بدى، جارییه‌. جه‌هل، قه‌ڵب) ئامۆژگارى ده‌کات و وانه‌ ده‌ڵێته‌وه‌ (تاکه‌ى بێ خه‌به‌ر بی، سه‌یرى ئه‌و قه‌ومانه‌که‌، ئیتیفاقێ گه‌ر نه‌که‌ى، رێى نه‌زانى به‌ربده‌.)
هه‌موو شیعرێکى سیاسیى بێکه‌س ره‌خنه‌ى تونده‌ له‌ نه‌ته‌وه‌که‌ى، هه‌موو شیعرێکیشى شایانى لێ وردبوونه‌وه‌ و لێکۆڵینه‌وه‌ى هه‌مه‌لایه‌نه‌، به‌ڵام کورد نه‌ک ئه‌و کاره‌ى نه‌کردووه‌، هه‌رگیز عیبره‌تیشى له‌ شیعره‌کانى وه‌رنه‌گرتووه‌، جورئه‌تى ئه‌وه‌ى نه‌بووه‌ به‌ تووڕه‌بوونێکیش وه‌ڵامى بداته‌وه‌. ته‌نیا گه‌ر یه‌که‌م دێڕى شیعرى (ده‌ردى ده‌روون) جارێکى دیکه‌ بخوێنینه‌وه‌، که‌ ده‌ڵێ:
کورد ئه‌به‌د ناگاته‌ مه‌قسه‌د نۆکه‌رى بێگانه‌یه‌
دوودڵن، پیسن له‌گه‌ڵ یه‌ک، بۆیه‌ وا بێ لانه‌یه‌
میله‌تێکن بۆ نه‌مانى یه‌کترى هه‌ر هه‌ولأ ئه‌ده‌ن
داخه‌که‌م ورد و درشتى شێت و شه‌یداى ئانه‌یه‌
سێ وشه‌ى یه‌که‌م وه‌ک مۆرک و تاپۆ به‌ به‌رى یه‌کتردا بڕاون (کورد، ئه‌به‌د، ناگات)، ئه‌وه‌ چ گه‌لێکه‌ دواى تێپه‌ڕینى نزیکه‌ى سه‌د ساڵ به‌سه‌ر نووسینى ئه‌م شیعره‌دا هێشتا بۆ یه‌ک تاکه‌ جار و هیچ نه‌وه‌یه‌ک به‌ مه‌به‌ستى شکانى ئاوڕى له‌ ته‌لیسمى ئه‌و شیعره‌ ناداته‌وه‌. ئه‌و ئه‌به‌ده‌ى کورد تا چه‌ندی دى (ناگاته‌ مه‌قسه‌د)!. دوو دێڕه‌که‌ى دیکه‌ش هیچ ڕاڤه‌یه‌ک هه‌ڵناگرێ و وه‌ک ئه‌وه‌ى ئه‌وڕۆ نووسیبێتى وایه‌.
...

کۆدی بابه‌ت: 68126  |  به‌روار: ۱۳۹۵/۱۱/۷  |  کاتژمێر: 9 : 37

FaceBook   Twitter   Delicious   Digg   Buzz   Google Bookmarks   ˜áæÈ  
ناردنی بۆچوون
ناو و شۆره‌ت:
ئیمه‌یل:
بۆچوون:
بۆچوونی نێردراو‬
هه‌واڵی پێوه ندیدار
دوایین هه‌واڵه‌کان
لۆبیگه‌ریی کورده‌کان له‌ ئه‌مریکا بۆ ڕاکێشانی پاڵپشتی له‌ ڕیفراندۆم
حیساب بۆ به‌غدا ناکه‌ین و ڕیفراندۆم ده‌که‌ین
حکوومه‌تی به‌غدا: گشتپرسیی کوردستان له‌ داهاتووشدا به‌ڕێوه‌ نه‌چێت
مکووڕین سه‌ربه‌خۆییی هه‌رێمی کوردستان ڕابگه‌یێنین
داواکاریی ڕیاز له‌ هه‌ولێر بۆ وازهێنان له‌ به‌ڕێوه‌چوونی گشتپرسی
فه‌لاح مسته‌فا: سوورین له‌سه‌ر ئه‌نجام دانی ریفراندۆمی سه‌ربه‌خۆیی
پێشمەرگە بەشداریی ئۆپەراسیۆنی کۆنترۆڵ کردنەوەی حەویجە ناکات
کۆمپانیای نەوتیی «شیڤرۆن»ی ئەمریکا لە هەرێمی کوردستان چالاک دەبێتەوە
مەسعوود بارزانى سه‌ردانى ماڵى مام جه‌لالى کرد
Operasyona navçeya Hewîceyê dest pê kir
Kurdistanê Tirkiye şermezar kir
Erdoxên ji bo şagirtên ku diçin derveyê welat got: Hemû dibin sîxur
کورده‌کانی عێراق بۆ هه‌ڵوه‌شاندنه‌وه‌ی ڕیفراندۆم گوشاری زۆریان له‌سه‌ره‌
ئەمریکا بە توندی دژی ڕیفراندۆم دەوەستێتەوە
ئۆپه‌راسیۆنی ئازادکردنی حه‌ویجه‌ به‌ فه‌رمانی سه‌رۆک­وه‌زیرانی عێراق ده‌ست­پێده‌کات
ئیمکانات