پێوه‌ندی تورکیا له‌گه‌ڵ پێکدادانی نێوان کورده‌کان له‌ شه‌نگال/ فه‌هیم تاشتکین
به‌شی وتار/ جیهان- تورکیا به‌هۆی سیاسه‌تی بێ په‌روای ده‌ره‌وه‌ی خۆی له‌م ساڵانه‌ی دواییدا په‌یوه‌ندییێکی سه‌رسوورهێنه‌ری له‌گه‌ڵ هه‌ندێک له‌ دراوسێکانی پێکهێناوه‌. ئێستاکه‌ وه‌کوو سه‌رکرده‌ی وڵاتێکی سه‌ربه‌خۆ مامه‌ڵه‌ له‌گه‌ڵ که‌سایه‌تییه‌ به‌رجسته‌کانی کوردستانی عێراق ده‌کات.
کوردپرێس: به‌ وته‌ی ئایدین سلجن سه‌رکۆنسووڵی پێشووی تورکیا له‌ هه‌ولێر، کاتێک که‌ مه‌سعوود بارزانی سه‌رۆکی هه‌رێمی کوردستان (KRG) سه‌ردانی تورکیای ده‌کرد له‌ ئه‌سته‌نبۆڵ پێشوازی لێکرا نه‌ک له‌ ئه‌نقه‌ره‌ پێته‌ختی تورکیا. ئه‌و کۆبوونه‌وانه‌ی له‌گه‌ڵ ناوبراو به‌ڕێوه‌چوون له‌ شوێنی که‌م بایه‌خدا به‌ڕێوه‌چوو نه‌ک له‌ کۆشکه‌کاندا. ئاڵای کوردستان هه‌رگیز له‌ کۆبوونه‌وه‌کاندا هه‌ڵنه‌کرا. کۆبوونه‌وه‌کان به‌ زمانی عه‌ره‌بی به‌ڕێوه‌چوون نه‌ به‌ زمانی کوردی. به‌ مه‌به‌ستی پیشاندانی ئه‌وه‌ی که‌ کۆبوونه‌وه‌که‌ نافه‌رمییه‌ هیچ که‌سایه‌تییێک کراوه‌تی نه‌به‌ستبوو. به‌ کورتی هه‌موو جۆره‌ هه‌نگاوێک هه‌ڵگیرا بۆ ئه‌وه‌ی که‌س نه‌توانێت ئه‌و کۆبوونه‌وانه‌ به‌ مانای کۆبوونه‌وه‌یێکی فه‌رمی له‌پێناو به‌ فه‌رمی ناسینی کوردستان شرۆڤه‌ بکات.
ئه‌مڕۆ که‌ بارزانی وه‌کوو سه‌رکرده‌ی وڵاتێکی گرینگ پێشوازی لێده‌کرێت و ئاڵای کوردستان له‌ ته‌نیشت ئاڵای تورکیا ده‌شه‌کێته‌وه‌. له‌ دوایین سه‌فه‌ری مه‌سعوود بارزانی 27ی فێبریوێری مێنۆی ڕێوڕه‌سمی فه‌رمی له‌ ئه‌نقه‌ره‌ به‌ زمانی کوردی له‌ چاپ درا. ئه‌وه‌ش له‌ حاڵێکدایه‌ که‌ تورکیا له‌ ناوخۆ و ده‌ره‌وه‌ی وڵاته‌که‌ی له‌گه‌ڵ کورده‌کاندا شه‌ڕ ده‌کات. په‌یوه‌ندی ئه‌و وڵاته‌ له‌گه‌ڵ بارزانی به‌ گوێره‌ی به‌رژه‌وه‌ندی ئابووری به‌ تایبه‌ت نه‌وت و گه‌ڵاڵه‌ی ئه‌نقه‌ره‌ بۆ که‌ڵک وه‌رگرتن له‌ کورده‌کان دژ به‌ کورده‌کانه‌.
ئێستاکه‌ ماوه‌یێکه‌ بارزانی له‌ ڕێگای ئه‌نجومه‌نی نیشتمانیی کوردی سووریا (KNC) و پێشمه‌رگه‌ی ڕۆژئاواوه‌ (ناوه‌ فه‌رمییه‌که‌ی سیسته‌می فیدڕاڵ- دیموکراتیکی باکووری سووریایه‌) به‌ دوای ئه‌وه‌وه‌یه‌ هاوسه‌نگیی ده‌سه‌ڵات له‌گه‌ڵ حزبی سیاسی پێشکه‌وتووی ڕۆژئاوا (PYD) و لقی سه‌ربازیی ئه‌و پارته‌ واتا یه‌کینه‌کانی پاراستنی گه‌ل (YPG) پێکبهێنێت. تورکیا چاوه‌ڕوانی ئه‌وه‌ له‌ بارزانی ده‌کات پارتی قه‌ده‌غه‌کراوی کرێکارانی کوردستان (په‌که‌که‌) له‌ شه‌نگال بکاته‌ ده‌ره‌وه‌. تورکیا نیگه‌رانی ئه‌وه‌یه‌ په‌که‌که‌ شه‌نگال بکاته‌ سه‌نگه‌رێکی سه‌ربازی بۆ ئاسانکردنه‌وه‌ی ده‌ستپێڕاگه‌یشتنی خۆی له‌ نێوان سووریا و عێراق.
پاش دوایین سه‌فه‌ری بارزانی بۆ تورکیا کورده‌کانی سووریا که‌ له‌لایه‌ن پارتی دیموکراتی کوردستان (KDP) به‌ ناوی پێشمه‌رگه‌ی ROJ پێکهاتوون 2ی مارچ نێردراونه‌ته‌ شه‌نگال. یه‌کینه‌ ئێزدییه‌کانی به‌رخۆدانی شه‌نگال (YBS) له‌ عێراق که‌ له‌لایه‌ن په‌که‌که‌وه‌ مه‌شقیان پێکراوه‌ ئیزنی چوونه‌ژووره‌وه‌ بۆ شه‌نگالیان به‌وان نه‌داوه‌. شه‌ڕ و پێکدادان ڕووی دا و هه‌ردوولا خه‌ساریان به‌رکه‌وت.
به‌ گوێره‌ی ئه‌و زانیارییانه‌ی له‌لایه‌ن عه‌لی داغلی ڕۆژنامه‌وانی چالاک به‌ ئه‌لمانیتۆر دراوه‌ پێکدادانه‌کان کاتێک ڕووی دا که‌ شۆفڵی نێردراو له‌لایه‌ن پێشمه‌رگه‌ی ROJه‌وه‌ ده‌ستی کرد به‌ هه‌ڵکه‌ندنی خه‌نده‌ق له‌ نێوان خانه‌سۆر و سینۆنه‌. تاقمێک له‌ ژنانی ناوچه‌که‌ هه‌وڵیان دا به‌ر به‌ کاری شۆفڵه‌کان بگرن. ژنه‌کان به‌ تووڕه‌ییه‌وه‌ گوتیان: ئه‌وان متمانه‌یان به‌ پێشمه‌رگه‌ نییه‌ و پرسیاریان کرد بۆچی ئه‌وان له‌و شوێنانه‌ی که‌ داعشی لێ نییه‌ چاڵ و خه‌نده‌ق ده‌که‌نن. ئه‌وان ده‌یانه‌ویست بزانن ئه‌م شۆفڵانه‌ بۆچی نانێردرێنه‌ به‌ره‌ی پێشه‌وه‌ی شه‌ڕی مووسڵ.
3ی مارچ ئه‌م ته‌نگه‌ژه‌یه‌ بوو به‌ شه‌ڕ و پێکدادانی دوو لایه‌ن. له‌ ماوه‌ی چه‌ند کاتژمێردا شه‌ڕه‌که‌ کوژایه‌وه‌ به‌ڵام ته‌نگه‌ژه‌که‌ به‌رده‌وام بوو. له‌ ماوه‌ی ئاگربڕدا پێشمه‌رگه‌کان ئۆتۆمبێل و که‌ره‌سته‌ی زیاتریان هێنا و هێزه‌کانی خۆیانیان بۆ نزیک به‌ 500 که‌س زیاد کرد. هێزه‌کانی YBS ئه‌م زیادبوونی هێزانه‌ به‌ مانای ڕاگه‌یاندنی شه‌ڕ لێکده‌ده‌نه‌وه‌ و به‌ پێشمه‌رگه‌کانی ROJی ڕاده‌گه‌یێنن که‌ ئیزنی ئه‌وان ناده‌ن تێبپه‌ڕێن. داغلی گوتی: پێشمه‌رگه‌کانی ROJ ده‌یانه‌وێت خانه‌سۆر کۆنتڕۆڵ بکه‌ن و بیکه‌نه‌ بنکه‌یێکی سه‌ربازی بۆ خۆیان و پێوه‌ندیی ئه‌وان له‌گه‌ڵ شه‌نگال و سنووری ڕۆژئاوا (واتا ناوچه‌ کوردنشینه‌کانی سووریا) داببڕن. له‌ ناوه‌ندی شاری شه‌نگال و سینۆنه‌ هێزه‌کانی YBS وه‌کوو هێزی پێشمه‌رگه‌ی عێراق سه‌یته‌ره‌ و وێستگه‌ی پشکنینیان له‌ده‌ستدایه‌. YBS خانه‌سۆری له‌ کۆنتڕۆڵدایه‌. له‌ نێوان شه‌نگال و سینۆنه‌ ناوه‌ندێکی بچووکی پۆلیسی عێراق و دوو که‌تیبه‌ی میلیشیا شیعه‌کان (حه‌شدی شه‌عبی) نزیک به‌ گوندی عه‌ره‌ب نشینی ماندێلا نیشته‌جێن. نزیک به‌ 100 بۆ 130 که‌س له‌ هێزه‌کانی پاراستنی گه‌ل (HPG) -سه‌ر به‌ په‌که‌که‌- له‌ شه‌نگالدا نیشته‌جێ بوونه‌ تاکوو پشتیوانی له‌ YBS بکه‌ن. ئه‌و جاده‌یه‌ی ده‌ڕواته‌ خانه‌سۆر به‌ مه‌به‌ستی پێوه‌ندی نێوان شه‌نگال و ناوچه‌ی ڕۆژئاوا زۆر ستراتژیکه‌. سه‌رچاوه‌ خۆجێیه‌کان پێیانوایه‌ هه‌م هێزه‌کانی پێشمه‌رگه‌ی عێراقی و هه‌م فه‌رمانبه‌رانی هه‌واڵگریی تورکیاش له‌ نێوان پێشمه‌رگه‌کانی ROJدا ده‌بیندرێن.
ئازاد باریس کۆمه‌ڵناسی به‌ناوبانگی ئێزدی به‌ بۆنه‌ی دۆخی ناله‌باری ئێستاکه‌وه‌ ڕه‌خنه‌ له‌ پارتی دیموکرات و هه‌روه‌ها په‌که‌که‌ش ده‌گرێت.
باریس به‌ ئه‌لمانیتۆری ڕاگه‌یاند: زۆرینه‌ی ئێزدییه‌کان مه‌منوونی YPG و HPGه‌ن. زۆرینه‌ی ئێزدییه‌کان پاش ئه‌و ڕووداوه‌ی ساڵی 2014 ڕووی دا چیدی متمانه‌یان به‌ پارتی دیموکراتی کوردستان نه‌ماوه‌. "پاش هێرشی داعش بۆ شه‌نگال هێزه‌کانی پێشمه‌رگه‌ ساڵی 2014 ئه‌و شاره‌یان به‌جێهێشت و هه‌زاران ئێزدی به‌ ده‌ستی داعش قه‌تلوعام کران." ئێزدییه‌کان هه‌روه‌هاش هه‌مبه‌ر ڕوانگه‌ی ئایینی سوننه‌ی پێشمه‌رگه‌کانیش نیگه‌رانن به‌ڵام هه‌ندێک له‌وان به‌هۆی سیاسی یان ئابوورییه‌وه‌ هاوکاریی پارتی ده‌که‌ن. سه‌ره‌ڕای ئه‌مه‌ش یه‌که‌یێکی ئێزدی به‌ سه‌رکردایه‌تی قاسم شه‌شۆ له‌لایه‌ن پارتییه‌وه‌ پشتیوانی ده‌کرێت. ئه‌وان پرسیار ده‌که‌ن: کورده‌کانی تورکیا له‌ شه‌نگال چی ئه‌که‌ن؟ له‌ ڕێگای ئه‌م پرسیاره‌وه‌ YBS هان ده‌ده‌ن. ڕێژه‌ی غه‌یره‌ ئێزدییه‌کان له‌ چاو ئێزدییه‌کان و له‌ نێوان هێزه‌کانی YBSدا نزیک به‌ 5 له‌سه‌ده‌.
ناوبراو زیادیشی کرد: هه‌ندێک له‌وان له‌ شوێنی‌تر وه‌کوو هانۆفێری ئه‌ڵمانیاوه‌ هاتوون به‌ڵام به‌ ڕه‌گه‌ز هه‌ر شه‌نگالین. ساڵی 2014 سه‌دان که‌س له‌ ئێزدییه‌کان گه‌ڕاونه‌ته‌وه‌ شه‌نگال تاکوو زێد و مه‌ڵبه‌ندی خۆیان بپارێزن. ئێوه‌ ناتوانین به‌ ئاسانی ئه‌و هێزه‌ هه‌ڵبوه‌شێننه‌وه‌ و بیانکه‌نه‌ ده‌ره‌وه‌. هه‌ندێکیان خه‌ڵکی شه‌یهانلین. ده‌وڵه‌تی ناوه‌ندی عێراق وه‌کوو هێزێکی یاسایی به‌ فه‌رمیان ده‌یانناسێت و مووچه‌یان ده‌داتێ. ئێستاکه‌ نزیک به‌ 3500 که‌سن. هه‌موو ئێزدییێک مافی ئه‌وه‌ی هه‌یه‌ زێد و مه‌ڵبه‌ندی خۆی بپارێزێت. پرسی سه‌ره‌کی ئه‌و که‌سانه‌ن که‌ یارمه‌تی ئه‌و هێزانه‌ ده‌ده‌ن (واتا هێزه‌کانی لایه‌نگری ئاپۆ ڕێبه‌ری په‌که‌که‌). دژبه‌ره‌کانیان ده‌ڵێن: هیچ جێگه‌یه‌ک بۆ ئایدیۆلۆژیای لایه‌نگری ئاپۆ له‌م مه‌ڵبه‌نده‌دا نییه‌.
بارزانی جاروبار ڕایده‌گه‌یێنێت که‌ ڕێگه‌ نادات پێکدادان له‌ نێوان کورده‌کاندا ڕوو بدات. ناردنی پێشمه‌رگه‌ی ROJ له‌ جێگه‌ی پێشمه‌رگه‌ی عێراق بۆ شه‌نگال دوژمنایه‌تی نێوان ئێزدییه‌کانی لایه‌نگری ئاپۆ و کورده‌کانی سووریای لێکه‌وته‌وه‌. هه‌ندێک ده‌ڵێن بارزانی له‌ ڕێگای ئه‌م تاکتیکه‌وه‌ ئه‌توانێت ئیدعا بکات به‌ڵێنه‌که‌ی خۆی له‌پێناو پێشگرتن له‌ پێکدادانی ناوخۆی ده‌سته‌به‌ر کردووه‌ چوونکه‌ نه‌یهێشتووه‌ خودی پارتی له‌و بابه‌ته‌دا ده‌ستێوه‌ردان بکات به‌ڵام پێشمه‌رگه‌کانی ROJ نکۆڵی له‌وه‌ ناکه‌ن که‌ فه‌رمانه‌کانیان ڕاسته‌وخۆ له‌ بارزانی و فه‌رمانده‌ی گشتی هێزی پێشمه‌رگه‌ وه‌رده‌گرن.
باریس گوتی: ئه‌م دۆخه‌ -که‌ ئێزدییه‌کانی پشتیوانیکراوی پارتی، ئێزدییه‌کان و لایه‌نگری په‌که‌که‌ و خودی په‌که‌که‌ش ده‌خاته‌ به‌ر پرسیاره‌وه‌- به‌ گوێره‌ی دوو ستراتژی سه‌ره‌کی پشتڕاست ده‌بێته‌وه‌: یه‌که‌م ئه‌وه‌ی ستراتژی ئاشکرای هاندانی خه‌ڵکی ناوچه‌که‌ بۆ به‌ره‌نگاربوونه‌وه‌ له‌گه‌ڵ یه‌کتر له‌ئارادایه‌. پارتی هه‌رگیز له‌ ڕاستیدا ئێزدییه‌کانی به‌ بۆنه‌ی ئایینه‌که‌یانه‌وه‌ قبووڵ نه‌کردووه‌. ئێزدییه‌کان هه‌رگیز هه‌ستیان به‌ ئاسایش و ئه‌منییه‌ت نه‌کردووه‌. ئه‌گه‌ر دووفاقی و چه‌ندفاقی بکه‌وێته‌ ناو ئێزدییه‌کانه‌وه‌ ئه‌وا ده‌سه‌ڵاتی پارتی له‌ ناوچه‌که‌ ئاسانتر ده‌که‌وێته‌ گه‌ڕ. دووهه‌م ئه‌وه‌ی ئه‌وان به‌و مه‌به‌سته‌ی زه‌بر له‌ کورده‌کانی تورکیا بده‌ن کورده‌کانی سووریا به‌کار ده‌هێنن. ئه‌وان به‌رده‌وام گوتوویانه‌ و ده‌ڵێن YBS هێزێکی بیانییه‌. ئێمه‌ نامانه‌وێت ئه‌و تۆمه‌تانه‌ ڕه‌ت بکه‌ینه‌وه‌ که‌ تورکیا کاریگه‌ری به‌ سه‌ر ئه‌و پڕۆسه‌یه‌دا بووه‌ به‌ڵام ده‌بێ له‌ بیریشمان بێت ئایا تورکیا ئه‌وه‌ی ده‌وێت یان خێر. بارزانی نه‌ک هه‌ر بوونی په‌که‌که‌ له‌ ناوچه‌که‌ هه‌ڵناگرێت به‌ڵکوو دژ به‌ به‌رگری ئێزدییه‌کان له‌ خۆیان و ئارمانجه‌کانیشیانه‌. پارتی هیچ کات شه‌ریکی ڕه‌نج و ئازاری ئێمه‌ نه‌بووه‌ و هه‌رگیزیش گوێ بۆ داواکارییه‌کانی ئێمه‌ ناگرێت. ئه‌وان ته‌نانه‌ت ئه‌مڕۆش گوێ له‌ ئێمه‌ ناگرن. ئه‌و که‌سه‌ی فه‌زلی وه‌حشییێک وه‌کوو داعش به‌ سه‌ر کورده‌کاندا ده‌نێت و هێرش ده‌کاته‌ سه‌ر نیشتمانی ئێمه‌ هه‌میشه‌ به‌ر نزای ئێزدی ده‌که‌وێت.
ساڵی 2014 پاش ئه‌وه‌ی هێزه‌کانی پێشمه‌رگه‌ی پارتی له‌ مه‌یدانی شه‌ڕ دژ به‌ داعشدا کشانه‌وه‌ و په‌که‌که‌ بووه‌ به‌رپرسی پاراستنی ئێزدییه‌کان، ئایدیۆلۆژیای لایه‌نگری ئاپۆ له‌پڕ بووه‌ گرینگترین ڕێکخراوی سیاسی و سه‌ربازی ناوچه‌که‌. لقی سه‌ربازی په‌که‌که‌ واتا HPG پێشڕه‌وییه‌کانی داعشی له‌ کێوی شه‌نگال وه‌ستاند و YPGه‌ش له‌ سووریاوه‌ به‌ره‌و شه‌نگال کۆریدۆرێکی کرده‌وه‌ و ئێزدییه‌کانی ڕزگار کرد له‌ حاڵێکدا که‌ پارتی نه‌یده‌توانی متمانه‌که‌ی خۆی لای خه‌ڵک وه‌ده‌ست بهێنێته‌وه‌ HPG مه‌شقی به‌ ئێزدییه‌کان ده‌کرد و یارمه‌تییانی دا تاکوو YBSیان پێکهێنا. ئه‌گه‌رچی هێزی پێشمه‌رگه‌ له‌ ئاکامدا گه‌ڕایه‌وه‌ و سه‌دان که‌سی له‌ شه‌ڕ دژ به‌ داعشدا له‌ده‌ست دا به‌ڵام ئێزدییه‌کان به‌و حاڵه‌شه‌وه‌ وه‌فاداری په‌که‌که‌ن. سه‌باره‌ت به‌ پێوه‌ندییه‌کانی تورکیا له‌ ئاڵوگۆڕه‌کانی شه‌نگال میدیای لایه‌نگری په‌که‌که‌ به‌رده‌وام ده‌ڵێن: هێرش بۆ سه‌ر شه‌نگال به‌ ڕێنمایی تورکیاوه‌ ڕووی دا و پێشمه‌رگه‌کانی ROJ له‌ ڕاستیدا ئه‌ندامی هه‌واڵگریی نیشتمانیی تورکیا (میت) بوون.
لێدوانی سه‌رکرده‌کانی تورکیا سه‌باره‌ت به‌وه‌ی که‌ ناکرێت ئیزنی شه‌نگال بدرێت که‌ بکرێته‌ قه‌ندیلی دووهه‌م -مه‌کۆی سه‌ره‌کی کورده‌کان له‌ کێفی قه‌ندیل له‌ باکووری عێراق- له‌ خۆیدا ڕۆڵی تورکیا پشتڕاست ده‌کاته‌وه‌.
به‌ وته‌ی ئه‌و سه‌رچاوه دیپلۆماتیکه‌ پایه‌به‌رزانه‌ی له‌گه‌ڵ میدیاکانی تورکیا وتووێژیان کردووه‌ ئه‌نقه‌ره‌ به‌رده‌وام درێژه‌ به‌ هاوکارییه‌کانی خۆیان له‌ به‌رانبه‌ر ئاماده‌بوونی په‌که‌که‌ له‌ شه‌نگال و مه‌خمووری عێراق ده‌ده‌ن. کاتێک که‌ ئۆپه‌راسیۆنی مووسڵ کۆتایی پێبێت هێزه‌کانی پێشمه‌رگه‌ ده‌توانن هێز بنێرنه‌ شه‌نگال و مه‌خموور. ئه‌گه‌ر بێتو ده‌وڵه‌تی کوردستانی عێراق پێویستی به‌ یارمه‌تی تورکیا ببێت ئه‌م وڵاته‌ له‌ ده‌وروبه‌ری که‌رکووک و هه‌ندێک له‌ ناوچه‌کانی باکوور بنکه‌ی سه‌ربازی بۆ مه‌شق و ڕاهێنان پێکده‌هێنێت.
وه‌یسی حاکیناک جێگری سه‌رۆک وه‌زیرانی تورکیا مانگی دیسێمبێر ڕایگه‌یاند: ئێمه‌ هه‌رگیز ئیزن ناده‌ین قه‌ندیلێکی نوێی له‌ شه‌نگال بخولقێندرێت. گه‌وره‌ترین هیوای ئێمه‌ سه‌رکه‌وتنی بارزانییه‌ به‌ڵام ئه‌گه‌ر ئه‌مه‌ش ڕوو نه‌دات هه‌رچی پێویست بێت له‌ ڕێگای سوپای تورکیاوه‌ ئه‌نجامی ده‌ده‌ین. هه‌وڵی سه‌ربازی دژ به‌ شه‌نگال ئاسان نابێت چوونکه‌ ئه‌م شاره‌ سنووری دیاریکراو و پێناسه‌کراوی سه‌ربازی نییه‌. ته‌نانه‌ت ده‌شتوانێت شه‌ڕ و پێکدادانێکی توندتر له‌ نێوان کورده‌کاندا ده‌ستپێبکات. حکوومه‌تی به‌غداش ئه‌و هه‌نگاوه‌ وه‌کوو هێرشێک وه‌سف ده‌کات.
ویلایه‌ته‌ یه‌کگرتووه‌کان و ڕووسیا نایانه‌وێت -لانیکه‌م تا ئه‌و کاته‌ی مه‌ترسی داعش بوونی هه‌یه‌- کورده‌کان شه‌ڕ له‌گه‌ڵ یه‌کتر بکه‌ن. ئاش به‌تاڵی شه‌نگال له‌لایه‌ن ئه‌مه‌ریکاوه‌ ئه‌نجام بوو. حکوومه‌تی ناوه‌ندی عێراق که‌ له‌سه‌ر خواستی کورده‌کان بۆ مانه‌وه‌ له‌و ناوچانه‌ی جێناکۆکین پشتیوانی له‌ YBS ده‌کات. به‌غدا که‌ ساڵی ڕابردوو مووچه‌ی هێزه‌ ئێزدییه‌کانی بڕیبوو، دیسانه‌وه‌ ده‌ستی کردووه‌ به‌ دانی مووچه‌که‌ له‌به‌ر ئه‌وه‌ی تورکیا نایه‌وێت ئێزدییه‌کان وابه‌سته‌ی په‌که‌که‌ بن.
ڕه‌نجی ئێزدییه‌کان له‌ قه‌تلوعام و فرۆشیانی ژنه‌ ئێزدییه‌کان له‌ بازاڕی به‌رده‌داری داعشدا له‌ هه‌موو جیهاندا ده‌نگی داوه‌ته‌وه‌ و پشتیوانییه‌کانی ئه‌ورووپا له‌ YBS هاتۆته‌ئاراوه‌. وڵاتێکی ئه‌ندامی یه‌کێتیی ئه‌ورووپا پێنج هه‌زار ده‌ست یۆنیفۆرمی سه‌ربازی بۆ هێزه‌کانی به‌رخۆدانی ئێزدی له‌ شه‌نگال ده‌نێرێت. کۆتایی هاتنی شه‌ڕی نێوان په‌که‌که‌ و پارتی ئاسان نییه‌. له‌ ڕوانگه‌ی زۆرینه‌ی هاووڵاتیانه‌وه‌ هه‌ر ئه‌وه‌ی که‌ خوێن نه‌ڕژێت خۆی به‌ جۆرێک سه‌رکه‌وتن دێته‌ ئه‌ژمار.
 
سه‌رچاوه‌: ئه‌لمانیتۆر
وه‌رگێڕان له‌ فارسییه‌وه‌: سروور خدری
 
کۆدی هه‌واڵنێر: 60103

کۆدی بابه‌ت: 70371  |  به‌روار: ۱۳۹۵/۱۲/۲۳  |  کاتژمێر: 12 : 7

FaceBook   Twitter   Delicious   Digg   Buzz   Google Bookmarks   ˜áæÈ  
ناردنی بۆچوون
ناو و شۆره‌ت:
ئیمه‌یل:
بۆچوون:
بۆچوونی نێردراو‬
هه‌واڵی پێوه ندیدار
دوایین هه‌واڵه‌کان
ئێزدییه‌کان له‌ ترسی شه‌ڕ ناوێرن بگه‌ڕێنه‌وه‌ شه‌نگال
ده‌بێت پاکێجی گه‌شتیاری بۆ سه‌رمایه‌دانه‌رانی که‌رتی تایبه‌ت له‌ مله‌ی سه‌ڵوات‌ئاوای سنه‌ ئاماده‌ بکرێت
دوو داواکاریی نوێنه‌ری شنۆ و نه‌غه‌ده‌ له‌ سه‌رۆک کۆمار سه‌باره‌ت به‌ ئه‌هلی سوننه‌ و ئیتنیکه‌کان
ناڕه‌زایی پاڵێوراوانی شۆرای شاری کرماشان له‌ حاڵی لێکدانه‌وه‌دایه‌
له‌سه‌دا 74ی خه‌ڵکی هه‌رێمی کوردستان پشتیوانی له‌ ڕیفراندۆم ده‌که‌ن
داوا له‌ به‌غدا ده‌کرێت هه‌مبه‌ر هه‌ڕه‌شه‌ی جوداخوازانه‌ی مه‌سعوود بارزانی کاردانه‌وه‌ی هه‌بێت
فوئاد مه‌عسووم و به‌رهه‌م ساڵح له‌سه‌ر چاره‌سه‌ری کێشه‌ی به‌غدا- هه‌ولێر جه‌خت ده‌که‌نه‌وه‌
گردبوونه‌وه‌ی ناڕه‌زایی پاڵێوراوانی شۆرای شاری ئیلام به‌ ده‌ره‌نجامی هه‌ڵبژاردنه‌کان
کۆچی دوایی نەوشیروان مستەفا بکرێتە دەرفەتێک بۆ چارەسەرکردنی کێشەکانی کوردستان/ حەویجە خەریکە دەکرێتە پایتەختی داعش لە عێراق
ئه‌ده‌بیاتی کوردی له‌ ئه‌ده‌بی فارسییه‌وه‌
رەنگە گۆڕانیش وەک پەکەکەی دوای ئۆجەلان بێت
ئامانجی ئه‌مریکا له‌ پشتیوانیی سه‌ربازیی کورده‌کانی سووریا
فەرمانگەیێکی چاکسازی بۆ جێبەجێکردنی پڕۆژەی ھەیکەلی نوێی وەزارەتی پێشمەرگە دروست دەکرێت
دوو ئه‌ندامی پارتی دیموکراتیکی گه‌لان له‌ سه‌روبه‌ندی ده‌رکردن له‌ په‌رله‌مانی تورکیان
به‌ توندی ده‌ستێوه‌ردانی سه‌ربازی له‌ سووریا ئیدانه‌ ده‌که‌ین
ئیمکانات