‌کوردپرێس‌ :: Kurdpress News Aganecy


کۆدی بابه‌ت: 71965  |  بڕوار: ۱۳۹۶/۲/۱  |  کاتژمێر: 14 : 29

نوێنەری پاری دیموکراتی کوردستان لە ئەنجومەنی نوێنەرانی عێراق:

کوردەکان شەرعییەتی سەربەخۆیی لە هیچ لایەنێکی عێراقی وەرناگرن/ وتەکانی حەکیم بۆتە هۆی نیگەرانی

بەشی عێراق و هەرێمی کوردستان- نوێنەری پارتی لە پەرلەمانی عێراق لە کاردانەوە بە وتەکانی سەرۆکی ئیئتیلافی نەتەوەیی عێراق لەسەر ئەوەیکە تەنیا ئیسرائیل سەربەخۆیی هەرێمی کوردستان بە فەرمی دەناسێت، وتی: ئەم وتەیە تەنیا لە بەرژەوەندیی ئیسرائیلە.

بەپێی هەواڵی کوردپرێس بە گێرانەوە لە بنکەی هەواڵدەریی "‌صوت العراق"، شاخەوان عەبدوڵڵا لە لێدوانێکی ڕۆژنامەوانیدا وتیشی: بنەماڵەی حەکیم پێشتر پشتیوانیی تەواوی خۆیان لە مافی کوردەکان ڕاگەیاندووە و ئەوەی کە سەید عەمار وتوویەتی تەنیا ئیسرائیل سەەربەخۆیی هەرێمی کوردستان بە فەرمی دەناسێت کۆمەڵێک نیگەرانیی درووست کردووە.
شاخەوان عەبدوڵڵا ئاماژەی بەوە کرد کە کوردەکان شەرعییەتی سەربەخۆیی هەرێمی کوردستان لە سەید عەمار حەکیم و هیچ لایەنێکی دیکەی عێراقی وەرناگرن و بۆخۆیان لەمبارەوە بڕیار دەدەن و پاشان ڕاشیگەیاند: دەمەوێ بە جەنابی حەکیم بڵێم بە هەڵەدا چووە کە وتوویەتی تەنیا ئیسرائیل سەربەخۆیی هەرێمی کوردستان بە فەرمی دەناسێت، چوونکە ژمارەیێکی زۆر لە وڵاتانی عەرەبی و جیهانیش لە پێکهاتنی وڵاتێکی کوردی پشتیوانی دەکەن.
ناوبراو جەختیشی کردەوە وتەکانی حەکیم بە شێوەیێک بانگەشە لە بەرژەوەندیی ئیسرائیل هەژمار دەکرێت.
 
کۆدی هەواڵنێر: 60108

کۆتایی هه‌واڵ / ‌کوردپرێس‌ :: Kurdpress News Aganecy

لینکی بابه‌ت: http://www.kurdpress.com/NSite/FullStory/?Id=71965