16:34 PM   IRAQ
THURSDAY, 14 NOVEMBER 2019
 به په‌له |◀   تورکیا هاوبەشێکی متمانەپێکراو نییە بۆ پێوەندیی ئابووری لەگەڵ هەرێمی کوردستان
MONDAY, 14 OCTOBER 2019 - 10:48
مه‌زڵووم كۆبانێ: له‌ نێوان سازش و جینۆسایدی خه‌ڵكدا ژیانی خه‌ڵک هه‌ڵده‌بژێرین

به‌شی سووریا- فه‌رمانده‌ی گشتیی هێزه‌كانی سووریای دیموكراتیک "هه‌سه‌ده‌" باس له‌ چه‌ند پێشنیارێكی ڕووسیا و سووریا ده‌كات كه‌ به‌ كوردی سووریا ڕاگه‌یێندراوه‌ و ده‌ڵێت: "له‌ نێوان سازش و جینۆسایدی خه‌ڵكدا، ژیانی خه‌ڵک هه‌ڵده‌بژێرین".

کوردپرێس:

مه‌زڵووم كۆبانێ فه‌رمانده‌ی گشتیی هه‌سه‌ده‌ له‌ بابه‌تێكدا نووسیوێتی: "ڕووسه‌کان و ده‌وڵه‌تی سووریا ژماره‌یێک پێشنیاریان كردووه‌ كه‌ ده‌كرێت ژیانی ملیۆنه‌ها كه‌سی ژێر ده‌سه‌ڵاتی ئێمه‌ بپارێزن. ئێمه‌ متمانه‌مان به‌ به‌ڵێنه‌كانیان نییه‌ به‌ڵام ئه‌وه‌ی ڕاستی بێت زه‌حمه‌ته‌ بزانیت كه‌ ده‌بێت متمانه‌ به‌ كێ بكه‌یت".

فه‌رمانده‌ی گشتیی هه‌سه‌ده‌ ده‌شڵێت: "ده‌زانین ئه‌گه‌ر له‌گه‌ڵ ئه‌وان كار بكه‌ین ده‌بێت سازشی به‌ئازار بۆ مۆسكۆ و به‌شار ئه‌سه‌د بكه‌ین به‌ڵام ئه‌گه‌ر له ‌نێوان سازش و جینۆسایدی خه‌ڵكی خۆماندا یه‌كێكیان هه‌ڵبژێرین ئه‌وا به‌دڵنیاییه‌وه‌ ژیانی خه‌ڵكی خۆمان هه‌ڵده‌بژێرین".

مه‌زڵوم كۆبانێ ده‌شنووسێت: "ئه‌و هۆكاره‌ی وایكرد له‌گه‌ڵ ئه‌مریكا بین بریتییه‌ له‌ باوه‌ڕمان به‌ دیموكراسی. ئێمه‌ له‌م قه‌یرانه‌ی ئێستا تووڕه‌ و بێ‌ئومێدین. خه‌ڵكه‌كه‌مان هێرش ده‌كرێته‌ سه‌ری و سه‌لامه‌تییان جێگه‌ی نیگه‌رانیی ئێمه‌یه‌. دوو پرسیار ده‌مێننه‌وه‌: چۆن بتوانین به‌ باشترین شێوه‌ خه‌ڵكی خۆمان بپارێزین؟ ئایا هێشتا ئه‌مریكا هاوپه‌یمانمانه‌؟"

ئێواره‌ی ڕۆژی یه‌کشه‌ممه‌ 13ی تشرینی یه‌که‌می 2019 به‌ڕێڤه‌به‌ری خۆسه‌ری باکوور و ڕۆژهه‌ڵاتی سووریا له‌ ڕاگه‌یێندراوێکدا ڕای‌گه‌یاند که‌ گه‌یشتوونه‌ته‌ ڕێككه‌وتن له‌گه‌ڵ دیمه‌شق تا سوپای سووریا به‌ درێژاییی سنووری سووریا و توركیا جێگیر بكرێت.

ده‌قی نووسراوه‌که‌ی مه‌زڵووم عه‌بدی، فه‌رمانده‌ی گشتیی هێزه‌كانی سووریای دیموكرات

له‌ ده‌ریای پشێوی و شه‌ڕی ناوخۆ له‌ سووریا، جیهان ناوی هێزه‌كانی ئێمه‌ی بیست، ئه‌و كات من وه‌كوو فه‌رمانده‌ی گشتیی هێزه‌كان كارم ده‌كرد، ئه‌وان 60 هه‌زار جه‌نگاوه‌ری سووری ڕاسته‌قینه‌ بوون، كاری زۆرمان كرد بۆ ئه‌وه‌ی نه‌خزێینه‌ نێو تووندوتیژی و ڕه‌گه‌زپه‌رستی، ماوه‌ی پێنج ساڵ به‌رگریمان له‌ به‌هاكانی دیموكراتی و فره‌ڕه‌نگی كرد و به‌ هیچ شێوه‌یێک هیچ جه‌نگاوه‌رێک ته‌قه‌ی به‌ ئاراسته‌ی سنووری توركیا نه‌كردووه‌، سه‌رباز و فه‌رمانده‌ ئه‌مریكییه‌كانیش شایه‌دن له‌سه‌ر توانای جه‌نگاوه‌رانمان.

چه‌ندین جار به‌ هێزه‌كانمانم ڕاگه‌یاندووه‌ که‌ پێش هه‌موو لایه‌نێک ئێوه‌ په‌یوه‌ستن به‌ شه‌ڕی دژی داعشی تیرۆریست، چونكه‌ ئه‌وان خاكی ئێمه‌ داگیر ده‌كه‌ن، گوند و شاره‌كانمان تاڵان ده‌كه‌ن، خوێنمان حه‌ڵاڵ ده‌كه‌ن و ژنه‌كانمان ده‌كه‌نه‌ كه‌نیزه‌ک، ئه‌و تیرۆریستانه‌ له‌ زۆربه‌ی ناوچه‌كانی سه‌ر زه‌وی هاتوون، هه‌میشه‌ جه‌ختمان ده‌كرده‌وه‌ سه‌ربازانی سوپای ئه‌مریكی و هێزه‌ هاوپه‌یمانه‌كان هاوبه‌شی ئێمه‌ن له‌و شه‌ڕه‌، به‌ڵام له‌ هه‌مانكاتدا میوانی خۆشه‌ویستن له‌ وڵاته‌كه‌مان، له‌به‌ر ئه‌وه‌ ده‌بێ زۆر هۆشیار بین بۆ دوورخستنه‌وه‌ی سه‌ربازانی سوپای ئه‌مریكی و هاوپه‌یمانانی له‌ ڕووبه‌ڕووبوونه‌وه‌ی هه‌ر مه‌ترسییێک، ئاشكراشه‌ له‌ پێناو ڕزگاركردنی مرۆڤایه‌تی له‌و مه‌ترسییه‌ 11 هه‌زار جه‌نگاوه‌ر و فه‌رمانده‌مان كوژراون.

له ‌گه‌رمه‌ی شه‌ڕی نه‌ته‌وه‌یی و ڕه‌گه‌زی كه‌ ته‌ڕ و وشک پێكه‌وه‌ ده‌سووتێنێ له‌ وڵاته‌كه‌مان له‌ سووریا، به‌های ئه‌خلاقی و سیاسیی خۆمان له‌ده‌ست نه‌داوه‌ و كارمان له‌سه‌ر بونیادنانی هێزێكی ڕووخێنه‌ری هاوشێوه‌ی ڕێكخراوه‌كانی (non- state Actor) نه‌كردووه‌، ڕێكخراوی قاعیده‌مان ڕووخاند، هه‌روه‌ها داعشیشمان له‌ناو برد، كارمان له‌سه‌ر پێكهێنانی حكوومه‌تێكی ناوخۆییی فره‌ڕه‌نگ كردووه‌، هاوكاریمان كردووه‌ له‌ بونیادنانه‌وه‌ی دامه‌زراوه‌ خزمه‌تگوزارییه‌ ناوخۆییه‌كان به‌ هاوبه‌شی كورد، عه‌ره‌ب و سریان، چه‌مكی ناسنامه‌ی سووریای دیموكراتمان وه‌كوو چوارچێوه‌یێک بۆ كۆكردنه‌وه‌ی سه‌رجه‌م پێكهاته‌كانی سووریا خستووه‌ته‌ڕوو و ئه‌وه‌ چه‌مكی ئێمه‌ بووه‌ بۆ سیاسه‌ت و چاره‌سه‌ری سیاسی.

چه‌ند ڕۆژێكه‌ ئه‌و هێزانه‌ی سه‌ركردایه‌تییان ده‌كه‌م، شه‌كه‌تن له به‌رگری كردن له‌ سێیه‌كی خاكی سووریا، له ‌به‌رده‌م هێرشی توركی پاڵپشت به‌ گرووپه‌ جیهادییه‌كان، ئه‌و ڕووبه‌ره‌ كه‌ شوێنی پارێزراوی ئه‌و نه‌ته‌وانه‌ بووه‌ كه‌ له‌ دوو سه‌ده‌ی ڕابردوو ڕووبه‌ڕووی كۆمه‌ڵكوژی توركی بوونه‌ته‌وه‌ له‌ كورد و سریان و ئاشووری و ئه‌رمه‌ن، هه‌روه‌ها ئێمه‌ ئه‌و وڵاته‌ له ‌مه‌ترسیی میلیشیاكانی نزیک له‌ ئێران ده‌پارێزین، له ‌كاتێكدا زیاتر له‌ 12 هه‌زار تیرۆریستی ڕێكخراوی داعشی له‌خۆگرتووه‌ كه‌ له‌ ماوه‌ی چه‌ندین قۆناخی شه‌ڕ ده‌ستگیر كراون، ئه‌گه‌ر وه‌زاره‌تی ده‌ره‌وه‌ی ئه‌مریكا پابه‌ند بایه‌ به‌ به‌ڵێنه‌كانی له ‌به‌رامبه‌ر ئێمه‌، توركیا نه‌یده‌توانی ئه‌و ئۆپه‌راسیۆنه‌ ئه‌نجام بدات كه‌ ناوه‌ڕۆكه‌كه‌ی ئه‌وه‌یه‌ له‌ ناوچه‌ سنوورییه‌كان بكشێینه‌وه ‌و پێگه‌كانی به‌رگریمان وێران بكه‌ین به‌ڵام ئه‌وه‌ی لێره‌ ڕووی دا ئه‌وه‌یه‌ سینگ ڕووت بووین له ‌به‌رده‌م خه‌نجه‌ری توركی.

کاتێک جیهان سستی نواند له‌ پێشكه‌شكردنی هاوكاری، ئه‌مریكا ده‌ستی هاوكاری بۆ درێژ كردین، ئه‌وه‌ش جێگای ڕێز و ستایشی ئێمه‌یه‌، چه‌ند ساڵێک تێپه‌ڕین دۆناڵد ترامپ باس له‌ گه‌ڕانه‌وه‌ی سه‌ربازانی بۆ وڵات ده‌كات، ئێمه‌ له‌وه‌ تێده‌گه‌ین، هه‌موو مرۆڤێک ده‌خوازێت بگه‌ڕێته‌وه‌ ماڵه‌وه‌، كوڕ بۆ باوه‌شی باوانی، باوک تامه‌زرۆی بینینی منداڵه‌كانیه‌تی، دڵدار تامه‌زرۆی خۆشه‌ویسته‌كه‌یه‌تی، ده‌مه‌وێ بڵێم ئه‌وه‌ی ئێمه‌ لێره‌ پێویستمان بوو، ئه‌وه‌ نه‌بوو سه‌ربازی ئه‌مریكی له‌گه‌ڵمان بجه‌نگێ، ئیمه‌ ئه‌وه‌ ده‌زانین ئه‌مریكا پۆلیسی جیهان نییه‌، به‌ڵام ئه‌وه‌ی پێویستمان پێی بوو و هه‌مووشمان ده‌زانین ئه‌مریكا توانای هه‌یه‌، بوونی ئه‌مریكا گرێنتی بوو بۆ چاره‌سه‌ری سیاسی، ئێمه‌ ده‌زانین ئه‌و هێز و هه‌ژموونه‌ی هه‌یه‌تی توانای ده‌ستپێكردنی دیالۆگی سیاسی هه‌یه‌ بۆ گه‌یشتن به‌ چاره‌سه‌رێكی هه‌میشه‌یی له ‌نێوان ئێمه‌ و توركیا.

بڕوامان به‌ دیموكراتیه‌ت هه‌یه‌ وه‌كوو چه‌مک، هه‌روه‌ها ئێمه‌ش كراوه‌ین بۆ به‌ بنه‌ماكردنی هه‌ر پڕۆژه‌یێكی دیموكراتی، به‌ڵام ئێمه‌ کاتێک ڕووبه‌ڕووی ئه‌و هێرشه‌ و مه‌ترسی كۆمه‌ڵكوژی ده‌بینه‌وه‌ بژارده‌كانمان تاوتوێ ده‌كه‌ین، ڕه‌نگه‌ ناچار بین چاو به‌ هاوپه‌یمانییه‌تییه‌كانماندا بخشێنینه‌وه‌، چونكه‌ مه‌ترسیی داعش هێشتا ماوه‌، هه‌روه‌ها زیندانییه‌کانیان و كه‌مپه‌كانیشیان بریتین له‌ بۆمبێكی ته‌وقیتکراو و نازانین كه‌ی به‌ ئێمه‌ و جیهاندا ده‌ته‌قێته‌وه‌.

له‌ ژێر سێبه‌ری مه‌ترسیی ئه‌و كۆمه‌ڵكوژییه‌ی ڕووبه‌ڕووی گه‌له‌كه‌مان ده‌بێته‌وه‌ به‌هۆی هێرشی توركی، پێده‌چێت ڕووسیا و ده‌وڵه‌تی سووریا بیرۆكه‌ و پێشنیازیان هه‌بێت بۆ ڕزگاركردنی گیانی ملیۆنان كه‌س له‌ گه‌له‌كه‌مان، بۆیه‌ ڕه‌نگه‌ ناچار بین ئاراسته‌مان به‌ره‌و دیمه‌شق و مۆسكۆ بگۆڕین، ئه‌گه‌ریش هه‌یه‌ ده‌ستبه‌رداری هه‌ندێک له‌ مافه‌كانمان بین، به‌ڵام كاتێک دوو بژارده‌ت له ‌به‌رده‌م بێت له ‌نێوان كۆمه‌ڵكوژی نه‌ته‌وه‌یی و ده‌ستبه‌رداربوون له‌ هه‌ندێک ماف، به‌دڵنیاییه‌وه‌ ڕزگاركردنی گه‌ل له‌ كۆمه‌ڵكوژی باشترینه‌، هه‌وڵ بۆ سووریایێكی دیموكراتی نوێی بێ كێشه‌ ده‌ده‌ین كه‌ په‌یوه‌ندی باشی له‌گه‌ڵ وڵاتانی جیهان هه‌بێت، هه‌ر ئه‌وه‌ش هانیداین هاوپه‌یمانی له‌گه‌ڵ ئه‌مریكا بكه‌ین، به‌ڵام پاراستنی گه‌ل هه‌میشه‌ له ‌سه‌رووی هه‌موو شتێكه‌وه‌یه‌.

ئێستا سووریا چه‌ند ڕێگه‌یێکی له‌پێشه‌، شه‌ڕی خوێناوی نه‌ته‌وه‌یی نوێ، یان داهاتوویێكی پارێزراو و چاره‌سه‌ری سیاسی، ئه‌مه‌ش له‌سه‌ر بڕیاری ئه‌مریكی ڕاده‌وه‌ستێ، كشانه‌وه‌ی بێ‌چاره‌سه‌ر ده‌بێته‌ هۆی شه‌ڕ و كوشتن و وێرانكاری زیاتر، به‌ڵام مانه‌وه‌ی به‌ گرێنتی ده‌بێته‌ هۆی چاره‌سه‌ری سیاسی، بڕوامان به‌ سووریایێكی نوێی دیموكراتی هانده‌ری بنه‌ڕه‌تی بوو كه‌ وایكرد هاوپه‌یمانی له‌گه‌ڵ ئه‌مریكا بكه‌ین، به‌ڵام ئێستا ئێمه‌ بێ ئومێد بووین، به‌هۆی ئه‌و هێرشه‌ دڕاندنه‌ی گه‌له‌كه‌مان ڕووبه‌ڕووی ده‌بێته‌وه‌، هه‌ر ئه‌وه‌ش كاری له‌ پێشينه‌مان دیاری ده‌كات بۆ به‌رگری كردن پێش بیركردنه‌وه‌ له ‌هه‌ر شتێک.

مه‌زڵووم عه‌بدی

فه‌رمانده‌ی گشتیی هێزه‌كانی سووریای دیموكرات

 

کۆدی هه‌واڵنێر: 60103

کليه حقوق اين پایگاه اطلاع‌رسانی متعلق به «خبرگزاری کردپرس» بوده و هرگونه استفاده از مطالب آن با ذکر منبع بلامانع است.

©2017 kurdpress. All rights reserved.
Designed & Powered By Atlas Samaneh - طراحی و توسعه توسط اطلس سامانه