10:40 PM   IRAQ
TUESDAY, 15 OCTOBER 2019
 به په‌له |◀   ڕوانگه‌ی سووری بۆ مافه‌کانی مرۆڤ: هه‌سه‌ده‌ گونده‌کانی سه‌رێکانی کۆنترۆڵ کرده‌وه‌
THURSDAY, 10 OCTOBER 2019 - 00:37
بزووتنەوەی گۆڕان لەبارەی ئوپەراسیۆنەکەی تورکیا لە خاکی کوردستانی سووریا هاتە دەنگ

بەشی عێراق و هەرێمی کوردستان- بزووتنەوەی گۆڕان لە پەیامێکدا رایگەیاندووە،"جێبەجێکردنی ئۆپەراسیۆنە سەربازیەکانی تورکیا بۆ سەر رۆژئاوای کوردستان بە توندی ئیدانە دەکەین و بڕوامان وایە ئەم پرۆسەیە نەک خزمەت بە سەقامگیریی سیاسیی لە ناوچەکە ناکات، بەڵکوو دەبێتە هۆی قووڵبوونەوەی کێشەکان و کارەساتی مرۆیی و ئاوارەبوونی سەدان هەزار خەڵکی سیڤیل بەدوای خۆیدا دەهێنیت".

کوردپرێس:

ڕۆژی چوارشەمە 9ی تشرینی یەکەمی 2019 پاش دەستپێکی ئوپەراسیۆنی سەربازیی سوپای تورک بۆ سەر خاکی کوردستانی سووریا بزووتنەوەی گۆڕان لە هەرێمی کوردستان بەیاننامەیێکی بڵاو کردەوە و وێڕای ئیدانەکردنی توندی ئوپەراسیۆنەکە، ڕایگەیاند ئەو ئوپەراسیۆنە دەبێتە هۆی نائارامیی ناوچەکە و ئاوارابوونی هاووڵاتییانی کوردی سووریا و کارەساتی مرۆییی لێدەکەوێتەوە.

دەقى پەیامەکەی بزووتنەوەی گۆڕان:

"رۆژئاوا تەنیا نیە

جێبەجێکردنی ئۆپەراسیۆنە سەربازیەکانی تورکیا بۆ سەر رۆژئاوای کوردستان بە توندی ئیدانە دەکەین و بڕوامانوایە ئەم پرۆسەیە نەک خزمەت بە سەقامگیری سیاسیی لە ناوچەکە ناکات، بەڵکو دەبێتە هۆی قوڵبونەوەی کێشەکان و کارەساتی مرۆیی و ئاوارەبونی سەدان هەزار خەڵکی سیڤیل بەدوای خۆیدا دەهێنیت، هاوکاتیش دەرفەتێک دەبێت بۆ خۆرێکخستنەوەی شانە نوستوەکانی داعش و بەهێزکردنەوەی گروپە تیرۆریستەکان لەناوچەکە و شکاندنی ئیرادەی نەتەوەیەکی ئازا کە بەخوێنی خۆیان بەرگریان لە ئازادییەکانیان کردوە.

رۆژئاوای کوردستان کە قوربانییێکی زۆریان داوە بۆ پاراستنی خاکەکەیان لەچنگی گروپە تیرۆریستیەکان و لەبری هەمو جیهان شەڕی داعشیان کردوە، شایەنی قەرەبوکردنەوە و لالێکردنەوەی کۆمەڵگای نێودەوڵەتین، نەک پەلاماردانی تورکیا و جێبەجێکردنی پرۆسەی داگیرکاری، ئەمەش بەرپرسیارێتی ئەنجومەنی ئاسایش و نەتەوە یەکگرتوەکان و هاوپەیمانانی دژی داعشە، کە رێ لە پرۆسەی داگیرکاری دەوڵەتی تورک بگرن و رێگربن لە ئەگەرە نەخوازراوەکان کە روبەڕووی کورد و پێکهاتەکانی دیکەی ئەو ناوچانە دەبنەوە.

کێشەی کورد، بە شەڕ و داگیرکاری و ئۆپەراسیۆنی زەمینی و ئاسمانی چارەسەرناکرێت، رێگەی ئاشتییانە و گرتنەبەری لێکتێگەیشتن کلیلی چارەسەری کێشەکانی ناوچەکەیە. ئەم دۆخە وادەخوازێت هەمو لایەک بە گیانی بەرپرسیارێتی سیاسیی و ئەخلاقی و مرۆیی مامەڵە لەگەڵ کەیسی رۆژئاوای کوردستان بکەن و ئەگەرەکانی جەنگ و ماڵوێرانی و خوێن رشتن و کارەساتی مرۆیی دوور بخەنەوە.

ئێمە لە بزوتنەوەی گۆڕان، سەرباری ناڕەزایەتی توندمان بۆ ئەو هێرشە دوژمنکاریەو پشتگیری تەواومان بۆ خەبات و مافی رەوای گەلەکەمان و دانیشتوانی رۆژئاوا، لەهەمان کاتدا داوا لەسەرجەم هێزە سیاسیەکانی کوردستان و حکومەتی هەرێم و عێراق و جەماوەر دەکەین، کە لەم ساتەوەختە هەستیارەدا پشت و پەنای رۆژئاوا بن و بەهەمو شێوازێکی خەباتی دیبلۆماسی و سیاسی و مەدەنی و جەماوەری ئەوپشتگیریەی خۆیان پێشان بدەن و هەرێمیش هەمو جۆرە کۆمەکێک بۆ هاوڵاتیانمان لە رۆژئاوا فەراهەم بکات. هاوکات داوای دەست پێکردنی کەمپینی جەماوەری بەرفراوان ئەکەین هەم بۆ ناڕەزایەتی دەربڕین دژ بەو داگیرکاریەو هەمیش بۆ پشتگیری مادی و مەعنەوی گەلەکەمان لە رۆژئاوا. داواش لە رەوەندی کوردی ئەکەین بە هەمو شێوازێکی مەدەنی خۆپیشاندان و ناڕەزایەتی دەربڕن و یارمەتی خێرا بۆ رۆژئاوا کۆ بکەنەوە."

 

بزوتنەوەی گۆڕان

10/9/2019

کۆدی هەواڵنێر: 60101

کليه حقوق اين پایگاه اطلاع‌رسانی متعلق به «خبرگزاری کردپرس» بوده و هرگونه استفاده از مطالب آن با ذکر منبع بلامانع است.

©2017 kurdpress. All rights reserved.
Designed & Powered By Atlas Samaneh - طراحی و توسعه توسط اطلس سامانه