کوردپرێس:

ڕۆژی چوارشەمە 20ی ڕەشەمەی 1399 حەسەن ڕۆحانی سەرۆککۆماری ئێران لە لێدوانێکدا باسی ڕێککەوتنی ئەتۆمی کرد و بە بەرپرسانی ئیدارەی بایدەنی ڕاگەیاند کە پێویست ناکات شەرم بکەن باشتر وایە بگەڕێنەوە بۆ یاسا و سزاکانی سەر ئێران بوەستێنن.

ڕۆحانی لە لێدوانەکەیدا گوتیشی ئەگەر لایەنی ئەمریکی واز لە یاساشکێنی بهێنێت و بگەڕێتەوە بۆ ڕێککەوتنی ئەتۆمی و پێبەندییەکانی جێبەجێ بکات ئەوا ئێرانیش دەستبەجێ پێبەندبوونەکەی دەست پێدەکاتەوە و بە تەواوی جێبەجێی دەکات.

سەرۆککۆماری ئێران زیادیشی کرد: پێویستە ئەمریکا لەوە تێبگات کە لە 20ی کانوونی دووهەمی 2021ەوە ئیدارەی نوێی بایدەن دەستی بە کار کردووە و هەر ڕۆژێک کە زیاتر تێدەپەڕێت یاساشکێنیی ئەمریکا زیاتر دەبێت.

ڕۆحانی ئاماژەی بە سزاکانی ئەمریکا دژی ئێران کرد و ڕایگەیاند: ئێمە سێ ساڵ شەڕی ئابووریمان تێپەڕاند و هەمووان بۆیان دەرکەوت کە ئێران لە ژێر گوشاردا چۆک بۆ دانوستان دانادات و گوشارەکانی ئەمریکا کاریگەر نەبوون بۆیە باشتر وایە ئەمریکا واز لە یاساشکێنی بهێنێت و بگەڕێتەوە بۆ یاسا و پێبەند بێت بە ڕێککەوتنی ئەتۆمی.

شایانی باسە تیمی بایدەن سەرۆکی نوێی ئەمریکا لە کاتی هەڵبژاردنەکاندا بانگەشەی زۆری بۆ مەسەلەی ڕێککەوتنی ئەتۆمی لەگەڵ ئێران کرد و ڕایگەیاندبوو کە ئەگەر ببێتە سەرۆکی ئەمریکا دەگەڕێتەوە بۆ ڕێککەوتنی ئەتۆمی بەڵام سەرباری تێپەڕبوونی زیاتر لە 2 مانگ تا ئەم کاتەش ئیدارەی بایدەن سزاکانی سەر ئێرانی هەڵنەوەشاندۆتەوە و داوای دانوستان لەگەڵ ئێران دەکات بەڵام ئێرانیش ئەو مەرجەی داناوە کە سەرەتا پێویستە ئەمریکا سزاکان هەڵبوەشێنێتەوە و بگەڕێتەوە ڕێککەوتنی ئەتۆمی ئەو کات لە چوارچێوەی 5 کۆ یەک-دا دەتوانن قسە لەگەڵ یەکتر بکەن.