ئەمینداری وەزارەتی پێشمەرگە: درۆنە بۆمبڕێژکراوەکە لە ناوچەیێکی مەخموورەوە ئاراستە کرابوو
بەشی عێراق و هەرێمی کوردستان- ئەمنیداری گشتیی وەزارەتی پێشمەرگە رایگەیاند، ئەو درۆنە بۆمبڕێژکراوەی کە چەند رۆژێک لەمەوبەر لەسەر یەکێک لە باڵەخانەکانی فڕۆکەخانەی نێودەوڵەتیی تەقیبووەوە لە ناوچەیەکی مەخموورەوە، ئاراستەکرابوو.

کوردپرێس:

جەبار یاوەر ئەمنیداری گشتیی وەزارەتی پێشمەرگە لە لێدوانێکی رۆژنامەوانییدا ئەو ھێرشەی کە چەند رۆژێک لەمەوبەر، بە درۆنی بۆمبڕێژکراو کرابوویەوە سەر فڕۆکەخانەی نێودەوڵەتیی هەولێر بە کردەیێکی تیرۆریستیی وەسف کرد و وتی: "درۆنە بۆمبڕێژکراوەکە لە ناوچەیێکی مەخموورەوە، ئاراستە کرابوو".

وتیشی: "تا ئێستا لیژنەکانی لێکۆڵینەوە لە ھێرشەکانی سەر فڕۆکەخانەی نێودەوڵەتیی ھەولێر، نەگەیشتوون بە ھیچ سەرەداوێک کە ببێتە مایەی دەستگیرکردنی ئەنجامدەرانی ھێرشەکان".

راشیگەیاند کە ژمارەیێک لایەن ھەوڵی تێکدانی رەوشی ئەمنیی وڵات دەدەن و ھێزەکانی ھاوپەیمانیی نێودەوڵەتیی دژبە داعش بەپێی رێککەوتن لەگەڵ حکوومەتی فیدراڵ لە ھەرێمی کوردستان جێگیر کراون کە پاڵپشتی پێشکەش بە ھێزە ئەمنییەکان و پێشمەرگە دەکەن لە شەڕی دژبە داعش.

رۆژى ١٤ی ئەم مانگە، وەزارەتی ناوخۆی ھەرێم رایگەیاند کە بە درۆنی بۆمبڕێژکراو ھێرشکراوەتە سەر فڕۆکەخانەی نێودەوڵەتیی ھەولێر.