کوردپرێس:
فەرهاد تەلۆ سەرۆکی پارتی یەکێتیی لیبراڵی کوردستانی سووریا لە لێدوانێکدا بۆ کوردپرێس ئاماژەی بە ناکۆکییەکانی نێوان پارتی و پەکەکە کرد و گوتی: تورکیا دوژمنی کوردەکانە و پەکەکە تەنها بیانوویێکە بۆ ئەوەی هێرش بکاتە سەر ناوچە کوردییەکان.
ناوبراو گوتیشی: ئەردۆغان کار لە سەر چاوچنۆکی و فرەخوازیی خۆی دەکات و ئەگەر دەڵێت شەڕی تیرۆر دەکات تەنها بۆ ئەوەیە شەرعیەت بە کارەکانی خۆی بدات.
فەرهاد تەلۆ زیادی کرد: باشتر وایە هیچ لایەنێکی کوردی وا بیر نەکەنەوە کە تورکیا دەستی دۆستایەتیی بۆ لایان درێژ دەکات. بەرپرسانی تورکیا خۆ دەبوێرن لەوەی ناوی هەرێمی کوردستان بەزاردا بهێنن و بە باکووری عێراق ناوی دەبەن.
ناوبراو ئاشکراشی کرد: هێرشەکانی ئەم دواییەی تورکیا دژی بارەگاکانی پەکەکە تەنها بە مەبەستی ئەوە ئەنجام دراوە کە تورکیا نفووزی زیاتر بکاتە هەرێمی کوردستان. ئەردۆغان و تورکیا ئەمڕۆکە بە بیانووی شەڕی پەکەکە چەند بەشێکی کوردستانی سووریایان داگیر کردووە و ئامانجیان ڕوونە ئەوەش داگیرکردنی خاکە.
Your Comment