کوردپرێس:

یەکەمین ڕومان کوردیی ئیلام, هووز مڵاکەت, ده نۆسه‌ر خاس و هێزدار ئیلامی, زه‌هرا ئومیدی, کتاو دیاری و وەر چەم گرێگه ک ده لایەن نەشر باشور بڵاو بووه. ئێ کتاوه, چنە زوانێ شرین و ڕەوهاتەیلێ دڵبقرچن ک تا کڕ ئاخرێ نەخوەنیت, نیەنەیتەێ زەمین.

وە کار بردن دەمتەقە و دەم دشمین و خاس و خڕاو دەم مەردم, زوان داستان ڕەوان و ڕاسگانیەو کردگه.

شیوەێ ڕوایەت بێشتر وە شکڵ تەک گوییه و ده زوان شەخسیەت ئەوەڵ داستان ک هه یه,دەسمیەتێگە ئەڕا شییه‌و کردن و ناسانن بێشتر شەخسیەتەیل داستان.

شەخسیتەیل داستان ده نامنی ڕەوهاتەیل و کارەساتەیل, وە خاسی ڕەوز کەن و باڵا گرن.

ڕاوی داستان زاڕووه و هه‌یه بۆه‌سه مدوو داوه‌ری نه‌کردن و راس و پاک بۆن روایه‌ت. داستان ده ئاخرەو شروو دووگ و جگ‌جگ ئەڵگەردێگەو دما.

ڕومان هووز مڵاکەت دە بارەێ نەزانی و زۆ باوڕ بوون مه‌ردمێگه ک کەفنه شوون دەم دروو بڕێ چاچووڵه باز درروزن ک نانێان ها ده نەفام بۆن مەردم چه‌م و گووش بەسیاگ.

زەهرا ئومیدی, تەقەلا کردگه ک وە نیشان داین حاڵ و ڕووژ مەردم و ئەو دەر خسن پێشت پەردەێ کار و زنەی ئێ ئاێمەێله ک وە بەشدار و دوواکەر نام دراوردنه, جنایه‌ت و کوڵاوبەرداریان نیشانمان بێگ.

ئێ کتاوه بخوەنن تا وه دو دارای گەپمان ک ده هۆره‌و چگنه, ئیمان بێارن‌‌؛ یەکێ ئازداری زوان کوردی ئەڕا نۆسانن ڕومان مودرن ئمڕوو و دوێم زانست و هێزداری ژنەیل نۆسه‌ر وڵاتمان ک تۆه‌نن ده ئاسووەیل بەرز و ڕووشن ئەده‌بیات بدرەوشن.