ڕۆژنامەنووسێکی دیاری تورکیا: ئەگەر سنوور نامووسی وڵاته، تورکیا لە سنوورەکانی عێراق و سووریا چی دەکات؟
بەشی تورکیا- سەرۆکی جەهەپە لەم دوایییەدا دروشمێک دووپات دەکاتەوە و دەڵێت: "سنووری وڵات نامووسە". ڕۆژنامەنووسێکی بەرجەستەی تورکیاش لێی دەپرسێت ئەگەر سنوور نامووسە ئێوە چی دەکەن لە سنوورەکانی عێراق و سووریا؟

کوردپرێس:

کەمال قلیچدار ئوغڵو سەرۆکی پارتی کۆماریخوازی گەل (جەهەپە) کە سەرۆکایەتیی ئوپۆزسیۆنیش دەکات لە چەند لێدوانێکیدا بە دروشمی "سنوورەکان نامووسی وڵاتن"هەوڵی داوە سۆزی نەتەوەپەرستان و ڕەگەزپەرستانی توندڕەوی نێو تورکیا دژی پەنابەرانی ئەفغان و سووریا لە وڵاتەکەی بجووڵێنێت.

جان دوندار ڕۆژنامەنووسی بەناوبانگی تورکیا کە پێشتر کەیسی یارمەتیی تورکیا بۆ داعش و نوسرەی جووڵاندبوو و بەڵگەی ناردنی چەکی بۆ ئەو گرووپە تیرۆریستییانە ئاشکرا کردبوو، لە دادگای تورکیا سێ جار زیندانی هەتاییی بۆ بڕایەوە و ئێستاش بە بڵاوکردنەوەی ڤیدیۆیێک دروشمەکەی سەرۆکی جەهەپە دەباتە ژێر پرسیار.

دوندار بە قلیچدار ئوغڵۆی گوتووە ئەگەر سنوورەکان نامووسی وڵاتن ئەی ئێوە لە سنوورەکانی عێراق و سووریا خەریکی چین؟ بۆچی ئێوە لە هێرشەکانی تورکیا دژی سووریا دەستتان لەگەڵ حکوومەت تێکەڵ کرد؟ ئەگەر سنوور لای ئێوە نامووسە، لای هاووڵاتییانی وڵاتانی دراوسێش نامووسە. ئێوە وشەی نامووستان سووک کردووە.