«ئەحمەد شێخۆ» ئەندامی دەستەی سەرۆکایەتیی پارتی یەکێتیی دیموکراتیک (PYD) لە گفتوگۆ لەگەڵ کوردپرێسدا ئاماژەی دا بە بژاردەکانی بەردەست کورد لە ئەگەری کشانەوەی ئەمریکا لە کوردستانی سووریا و ڕایگەیاند: بەهیچ شێوەیێک دۆخی کوردستانی سووریا یان باکوور و ڕۆژهەڵاتی سووریا هاوشێوەی ئەفغانستان نییە و ناکرێت پێکەوە بەراوەرد بکرێن چوونکە لە ئەفغانستاندا ئەمریکا بەڕێوەبەر بوو و هەر ئەمریکایش تاڵیبانی بۆ ئەو وڵاتە گەڕاندەوە.
ناوبراو درێژەی دا: لێرەدا بەڕێوەبەریی پێچەوانەی ئەفغانستانە و هەر لەسەرەتای گۆڕانکارییەکانی سووریاوە ئێمە متمانەمان بە کەس نەکرد و دەستمان بۆ کەس درێژ نەکردەوە و پشتمان بە گەلەکەمانەوە بەست.
ئەحمەد شێخۆ جەختی کردەوە: تاکوو ئەمڕۆیش هەر بەم شێوەیە بووە و خەڵک بنەمای بوونی ئەم ئیدارەی و سیتەمە بوون. هاتنی ئەمریکایش بۆ کوردستانی سووریا پاش سەرکەوتنەکانی هێزەکانی ئێمە بوو بەسەر تیرۆریستاندا، بەتایبەت بەرخۆەدانی مێژوویی کۆبانی پێش هاوکاریی ئەمریکا و هاوپەیمانان بۆ هێزەکانی ئێمە بوو.
ئەندامەکەی دەستەی سەرۆکایەتیی PYD وەبیری هێنایەوە: ئێمە بەشێکین لە سووریا و چارە کردنی پرسی کورد لە سووریا بەسراوە بە چارەسەر کردنی پرسی سووریا بەگشتی. ئێمە هەمیشتە لایەنگری گفتوگۆی نێوان ڕەتەکانی سووریا بووین و خوازیاری ئەوەین پرسی سووریا بە شێوەی سیاسی چارەسەر بکرێت.
ناوبراو جەختی کردەوە: ئێمە دەزانین کە هێزە بیانییەکان مانەوەیان لە ناوچەکەدا کاتییە و کاریگەریی لەسەر هەندێک بابەت هەیە، بەڵام لە کۆتاییدا خەڵکی سووریان کە دەتوانن پێکەوە ڕێککەون و چیدی پێویستیان بە هێزی بیانی نەبێت و ئەگەر هێزە بیانییەکان لە سووریا بکشێنەوە کاریگەرییەکەی هێندەی ئەفغانستان نییە.
Your Comment