کوردپرێس:

ستران عەبدوڵڵا سەرپەرشتیاری مەکتەبی ڕاگەیاندنی یەکێتیی نیشتمانیی کوردستان لەبارەی هاوپەیمانێتیی نێوان گۆڕان و یەکێتی لە هەڵبژاردنی داهاتووی پەرلەمانی عێراق بە کوردپرێسی گوت: هاوپەیمانێتییەکە چەند مانگێک پێش ئێستا ئیمزا کرا و هەڵمەتی کەمپێن لە 9ی مانگەوە لە شاری کەرکووکەوە دەستی پێکرد سەبارەت بەو بایەخەی کە شاری کەرکووک لە یادەوەریی خەڵکی کورددا هەیەتی کەمپێنەکە لەوێوە دەستی پێکرد. ئەم هاوپەیمانێتییە چەند لایەنێکی هەیە: یەکیان ئەوەیە کە بنچینەی هەر دوو حیزب یەک بوون و بەشێک بوون لە بزووتنەوەی سیاسیی کوردستان کە شۆڕشی نوێیان پێکهێنا دژی ڕژێمی ئەوسای سەدام حوسێن. خاڵی دووهەمیش ئەوەیە هەردوولا دەرک بەوە دەکەن کە پێویستە هێزەکانی کوردستان هیچ نەبێ بۆ هەڵبژاردنی پەرلەمانی عێراق هێزە کوردییەکان یەکگرتوو بن چوونکە ئەو هەڵبژاردنە پێویستی بە یەکڕیزی هەیە و پێویستی بۆ ئەوە هەیە کە چ بۆ مافەکانی کورد لە بەغدا و چ بۆ دەستەبەرکردنی دیموکراسی هەڵوێستەکانمان یەک بخەین. بۆیە ئەو هاوپەیمانێتییە لە سەر ئەو بنچینەیە دامەزرا.

باڤڵ تاڵەبانی هاوسەرۆکی یەکێتی لە دیدارێک لەگەڵ ڕۆژنامەوانان باسی ئەوەی کردبوو دەیەوێت لە پارتیی بباتەوە و ببنە گەورەترین هێزی کوردستان و تەنانەت لەگەڵ گۆڕان بە یەکجاری یەک بگرنەوە. ستران عەبدوڵڵا لەبارەی ئەم بابەتە و لەبارەی بوونی ئیرادەیێکی وا لە نێو سەرکردایەتیی یەکێتی بە کوردپرێسی گوت: باڤڵ تاڵەبانی هاوسەرۆکی یەکێتیی نیشتمانیی کوردستان نوێنەرایەتیی ئەو ئیرادەیە دەکات کە سەرکردایەتیی یەکێتی و یەکێتییەکان هەیانە بۆ ئەوەی لەگەڵ بزووتنەوەی گۆڕان هەموو ئاستەکانی پێکەوەیی تاقی بکەینەوە. لەو کاتەوەی ڕێککەوتنی دەباشان لە نێوان هەر دوو خوالێخۆشبوو مام جەلال و کاک نەوشیروان مستەفا ئیمزا کرا تا ئێستا کە پێویست دەکات بە هەلومەرجێکی تازەوە پێکەوە بین لە ئاستی بەغدا و تا ئەوەی کە شوێنێک بۆ یەکڕیزیی هێزەکانی یەکێتی و گۆڕان بێتە ئاراوە. سەرکەوتنی ئەم هاوپەیمانێتییە ڕێگا بۆ هەماهەنگیی زیاتری هەردوو لا دەکاتەوە چوونکە ئەم هاوپەیمانێتییە تەنها بۆ هەڵبژاردن نیە بەڵکوو بۆ دوای هەڵبژاردنیشە. ئومێدی ئێمە وەکوو یەکێتییەکان ئەوەیە یەک بگرینەوە و ئومێد دەکەین ئەو ئیرادەیە لای برادەرانی گۆڕانیش ببێ بەڵام هەموو شتێک لە کاتی خۆیدا دەکرێت و هەموو ئاشتییێک دوو لایەنی پێویستە و پێم وایە گۆڕانیش چاوەڕێی ئەوە دەکەن کە ئەم پێکەوەییەمان لەم قۆناغەدا بەرهەمی هەبێ. بۆ ئەوەی ئەوانیش بە هەمان ئارەزوو و تین و تاوی یەکێتییەکان و بە هەمان شێوەی کاک باڤڵ ئێعلانی کرد پێکەوە ئەم یەکگرتنەوە ڕوو بدات.

سەرپەرشتیاری مەکتەبی ڕاگەیاندنی یەکێتیی نیشتمانیی کوردستان لەبارەی ناکۆکییەکانی نێو هاوسەرۆکانی یەکێتی گوتی: لە ئێستادا هەموو کۆششەکانی یەکێتییەکان و هەموو هێزە سیاسییەکانی کوردستانیش ڕووی لە هەڵبژاردنەکانی عێراقە.

ستران عەبدوڵڵا لەبارەی ئەگەری فراوانتر کردنی هاوپەیمانێتییەکەیان و ئەگەری پێکهێنانی هاوپەیمانێتی لەگەڵ هێزە سیاسییەکانی تری کوردستان و بەتایبەت پارتی بۆ یەکڕیزیی کورد لە بەغدا بە کوردپرێسی گوت: ئێمە چاوەڕێی دەرەنجامەکانی ئەم هەڵبژاردنە دەکەین و هیوامان ئەوەیە کە هەڵبژاردنەکان لە عێراقیش و لە هەرێمی کوردستانیش بە شێوەیێک بەڕێوە بچێت کە هەم بەشە دیموکراسییەکەی تێدا پارێزراو بێت و هەم بە هێمنی و ئارامی بڕواتە پێشەوە و ڕایەڵەیێک لە هێزە سیاسییەکانی کوردستان ببێ کە پێکەوە بەرژەوەندییەکانی خەڵکی کوردستان بەرنە پێشەوە. ئەو کاتە هەم یەکێتی و هەم گۆڕان و هەم هێزە سیاسییەکانی دیکەش دەرفەتیان هەبێ بۆ قسە لە سەر ئایندەی نوێنەرایەتیی کورد لە بەغدا و ئایندەی هێزە سیاسییەکانی دیکەش لە بەغدا.

یەکێتیی نیشتمانیی کوردستان لە کەرکووک سەنگێکی قورسی هەیە. کوردپرێس پرسیاری ئەوەی کرد کە یەکێتی چۆن دەڕوانێتە قەزیەی کەرکووک و هەڵبژاردنەکانی داهاتووی پەرلەمانی عێراق لەو پارێزگایە. سەرپەرشتیاری مەکتەبی ڕاگەیاندنی یەکێتی لەو بارەیەوە بە کوردپرێسی گوت: ئێمە بە ئومێد و بە ئامادەکاریی زۆرەوە وەکوو هاوپەیمانێتیی کوردستان دەمانەوەێت لانی کەم بەشی کورد و بەشی دیموکراسیخوازانی کەرکووک کورسییەکانی ئەو پارێزگایە بچنینەوە. بۆ یەکێتییەکان و بۆ گۆڕانیش، کەرکووک چەقی بزووتنەوەی سیاسیی کوردستان پێکدەهێنێت و پردێکیش دەبێت لە نێوان هەرێمی کوردستان و بەغدا بۆ ئایندەی حوکمڕانی کردن و جێبەجێ کردنی ئەو خاڵە دەستوورییانەی کە دەمێکە دوا کەوتووە بە تایبەتی لە کەرکووک لە چوارچێوەی مادەی 140 و لە چوارچێوەیێکدا کە نوێنەرایەتیی ئیرادەی خەڵکی کەرکووک بکات نەک وەکوو ئێستا کە پارێزگارێک بە وەکالەت ئیدارەی دەکات.

ناوبراو لە کۆتاییدا دیسان هیوای ئەوەی خواست هەڵبژاردنەکانی عێراق لە کەشێکی ئارام و شێنەییدا بەڕێوە بچێت.