بەپێی هەواڵی کوردپرێس، سەرۆکایەتی هەرێمی کوردستان لە راگەیەندراوێکدا بڵاویکردەوە، نێچیرڤان بارزانى، سه‌رۆکى هه‌رێمى کوردستان له دوا ڕۆژى سه‌ردانیدا بۆ بەریتانیا، له له‌نده‌ن له‌گەڵ شێخ محه‌مه‌د بن زاید، جێنشینی ئه‌بووزه‌بی و جێگری فه‌رمانده‌ی گشتیی هێزه چه‌کداره‌کانی ئیمارات و سه‌رۆکی ئه‌نجومه‌نی ڕاپه‌ڕاندنی ئه‌بوزه‌بییه‌وه، له شوێنى مانه‌وه‌ى پێشوازى لێکرا.
لە راگەیەندراوەکەدا ئاماژە بەوەش کراوە په‌یوه‌ندییه‌کانى هه‌رێمى کوردستان و عێراق له‌گه‌ڵ ئیمارات، دۆخى سیاسى و هه‌ڵبژاردن و پێشبینییه‌کان بۆ داهاتووى عێراق، سه‌ردانى هه‌ردوولا بۆ له‌نده‌ن و کۆبوونه‌وه و گفتوگۆیان له‌گه‌ڵ بۆریس جۆنسۆن، سه‌رۆک وه‌زیرانى بەریتانیا، دوایین پێشهات و په‌ره‌سه‌ندنه‌کانى ناوچه‌که به‌گشتى و چه‌ند پرسێکى جێى بایه‌خى هاوبه‌شیان تاوتوێ کرد.
لەراگەیەندراوەکەدا هاتووە، له کۆبوونه‌وه‌که‌دا هه‌ردوولا جه‌ختیان له پته‌و کردنى دۆستایه‌تى و په‌یوه‌ندییه‌کان له هه‌موو بواره‌کاندا کرده‌وه و له‌سه‌ر گرنگیى بره‌ودان به هه‌وڵه‌کان و هاریکارى و کارى هاوبه‌ش له‌پێناو پاراستنى سه‌قامگیرى و چارەسه‌رکردنى کێشه و ئاڵۆزییه‌کانى ناوچه‌که‌دا هاوڕا بوون و له‌مباره‌یه‌وه بیرورایان ئاڵوگۆڕ کرد.
Your Comment