شەڕی ئاویی تورکیا لە دژی 5 ملیۆن دانیشتووی باکووری سووریا/لە کوردستانی سووریا کۆنگرەی نێودەوڵەتی ئاو بەڕێوەدەچێت
بەشی سووریا- بەبەشداری 300 کەس لە کەسایەتییەکانی ئیدارەی خۆسەر و نوێنەری رێکخراوە مرۆیی و نێودەوڵەتییەکانی بواری ئاو لە پارێزگای حەسەکە کۆنگرەی نێودەوڵەتی ئاو لە کوردستانی سووریا دەستیپێکرد.

بەپێی هەواڵی کوردپرێس، ئەمڕۆ دووشەممە کۆنگرەی نێودەوڵەتی ئاو لەلایەن زانکۆی رۆژئاڤا و ناوەندی فورات بۆ توێژینەوە بەهاوکاری ئیدارەی خۆسەر بەڕێوەدەچێت.

لە کۆنگرەکەدا کێشەکانی ئاو لە ناوچەکانی باکووری سووریا تاوتوێ دەکرێن کە لەئەنجامی وشک کردنی ئاوی ڕووباری فوڕات و دەستبەسەرداگرتنی وێستگەیێکی سەرەکیی ئاو لەلایەن تورکیاوە، هاوڵاتیانی باکووری سووریا ڕووبەڕووی کەم ئاوی بوونەتەوە و زیانی بە ژینگەی ناوچەکە گەیاندووە.

پێشتر ئەنجومەنی جێبەجێکاری حەسەکە داوای لە کۆمەڵگەی نێودەوڵەتی کردبوو کە دەستوەردان بکەن و فشار لەسەر تورکیا دروست بکەن بۆ کردنەوەی ئاوی عەلۆک، لەبەر ئەوەی مەترسی لەسەر ژیانی ملیۆنێک و 500 هەزار کەس دروست دەکات.

وێستگەی عەلۆک 10 کیلۆمەتر لە سەرێکانییەوە دوورە و دەکەوێتە رۆژهەڵاتی شارەکە، وێستگەکە لە 30 بیری ئاو پێکدێت کە سەرچاوەی سەرەکیی ئاوی حەسەکە و دەوروبەرین.

 

سەرچاوە: ماڵپەڕی خەندا