یەکگرتووی ئیسلامى: کۆنگرەکەى هەولێر هەوڵێکی دوژمنکارانەیە بەرامبەر بە هەرێمی کوردستان
بەشی عێراق و هەرێمی کوردستان- یەکگرتووی ئیسلامیی کوردستان لەبارەی کۆنگرەی ئاسایی کردنەوەی پەیوەندیی لەگەڵ ئیسرائیل کە لە هەولێر بەڕێوەچوو ڕایگەیاند کۆنگرەکەى هەولێر هەوڵێکی دوژمنکارانەیە بەرامبەر بە هەرێمی کوردستان.

بەپێی هەواڵی کوردپرێس، لە راگەیێندراوێکدا، ئەنجوومەنی جێبەجێ کردنی یەکگرتووی ئیسلامیی کوردستان رایگەیاندوە: "جێگەی داخە کە لە پایتەختی هەرێمی کوردستاندا، کۆنگرەیێکی پیلانگێڕانەی ئاوا ببەسترێ لەلایەن کەسانێکی نەکراو و ناحەز بە دۆزی رەوای گەلەکەمان، بەناوی کۆنگرەی ئاشتی و ئاساییکردنەوەی پەیوەندی لەگەڵ قەوارەی داگیرکاری ئیسرائیل."

یەکگرتووی ئیسلامى ئیدانەی بەڕێوەچوونى ئەو کۆنگرەیە دەکات و ئاماژەى بەوە کردوە، بەتووندی ئەو کارە پیلانگێڕییە مەحکووم دەکەن و بە هەنگاوێکی دووژمنانەی دەزانن بۆ ناشرین کردن و تێکدانی دۆستایەتی گەلانی ناوچەکە و یەکسان کردنی ستەمکار و ستەملێکراو."

هەروەها یەکگرتوو پێشیوایە کە کۆنگرەکە دەبێتە پاساو بۆ پەلامارێکی دیکەی ناحەزانی هەرێمی کوردستان و ئەزموونەکەی و داواش لە لایەنە پەیوەندیدارەکان دەکات کە "چاوکراوەتربن و رێگە نەدەن هەرێمەکەمان ببێتە مەیدانی ململانێی خەڵکان و مۆڵگەی پیلانگێڕی لەسەر حیسابی مافی میلـلەتەکەمان.