بەپێی هەواڵی کوردپرێس، بەڕێوەبەری کەمپی بەردەڕەش بە رووداوی راگەیاند، ئاگادار کراینەوە مێرمنداڵێکی تەمەن 13 ساڵ لە کەمپی ئاوارە کوردەکانی سووریا لە دهۆک لە خێمەیەک کۆتایی بە ژیانی خۆی ھێناوە.

بەڕێوەبەری کەمپی بەردەڕەش ئاماژەی بەوەش کرد، دایک و باوکی مێرمنداڵەکە بۆ چارەسەر کردنی منداڵێکی دیکەیان چووبوونە لای پزیشک لە دەرەوەی کەمپەکە کاتێک رووداوەکە روویداوە و تاوەکوو ئێستا ھۆکارەکەی دیار نییە.

بارزان ئەحمەد، یەکێکە لە موختارەکانی کەمپی بەردەڕەش، سەبارەت بە خێزانی مێرمنداڵەکە گوتی، خەڵکی قامشلۆن و پێنج کەسن کە دایک و باوک و دوو کوڕ و کچێکن.

کەمپی بەردەڕەش دەکەوێتە باشووری قەزاکە، ئێستا 754 خێزانی کوردستانی سووریای تێیدا نیشتەجێن، کە ژمارەیان دەبێتە 3250 کەس و لە کۆتایی ساڵی 2019 بەھۆی ھێرشی تورکیا بۆسەر ناوچەکانی گرێ سپی و سەرێکانی تێیدا نیشتەجێ بوون.