ئەمریکا و ڕووسیا بەدوای کەمکردنەوەی گرژییەکان لەنێوان تورکیا و کوردانی سووریادان
بەشی جیهان- ئەندامێکی ڕێکخراوی ئاشوورییەکانی سووریا دەڵێت ئەمریکا و ڕووسیا داوایان لە تورکیا و کوردەکانی سووریا کردووە دەست هەڵبگرن لە دروست کردنی بەرەی سەربازیی دژ بە یەکتر.

بەپێی هەواڵی کوردپرێس، گرژییەکانی لە باکووری سووریا بەهۆی پێکدادانی نێوان هێزە کوردییەکانی سووریا و سوپای تورکیا زیاتر بوونەتەوە و تورکیا هەڕەشەی کردووە ئۆپەراسیۆنێکی دیکەی سەربازی لەدژی کوردەکان دەست پێدەکات. ئەمەش لە حاڵێکدایە هێزەکانی ئەمریکا و ڕووسیە لەناوچەکەدا بوونیان هەیە.

گابریل مووسە، ئەندامێکی ڕێکخراوی ئاشوورییەکانی سووریا باس لە هەوڵەکانی ڕووسیا و ئەمریکا دەکات و بۆ ڕێگری کردن لە دەستپێکی شەڕێکی دیکە لە باکووری سووریا لەنێوان کوردەکان و ئەرتەشی تورکیا.

ناوبراو بە ئاژانسی فەرمیی ئاشوورییەکانی وتووە مۆسکۆ و واشنتۆن بۆ هێور کردنەوەی دۆخەکە هەوڵەکانیان چڕ کردۆتەوە.

ئەو ئەندامەی ڕێکخراوی ئاشوورییەکانی سووریا هەروەها باس لەوە دەکات کە بەهۆی پێکدادانەکانی نێوان هێزەکانی سەربە تورکیا و هێزە کوردەکانەوە تا ئێستا ژمارەیێک لە گوندی ئاشوورییەکان خەساریان بەرکەوتووە.