ئۆپۆزیسیۆنی سووریا بووکەڵەی دەستی تورکیایە
بەشی سووریا- ئەندامی لیژنەی ناوەندیی پارتی دیموکراتی کورد لە سووریا (P.D.K.S) دەڵێت: ئۆپۆزیسیۆنی سووریا دەسەڵاتێکی نییە و تەنها بووکەڵەی دەستی تورکیایە.

گەلۆ عیسا ئەندامی لیژنەی ناوەندیی پارتی دیموکراتی کورد لە سووریا (P.D.K.S) لە گفتوگۆ لەگەڵ کوردپرێسدا ئاماژەی دا بە سیاسەتەکانی ئیدارەی خۆسەر لە دانوستان لەگەڵ دیمەشدا و ڕایگەیاند: لە ئێستادا ڕووسیا دەتوانێت گەرەنتیکەری دانوستانی نێوان کورد و حکوومەتی ناوەندیی سووریا بێت بەڵام زۆر متمانە بە ڕووسیا ناکرێت چوونکە خۆی بە دۆست و هاوبەشی سیاسیی دیمەشق دەزانێت و دەیهەوێت قەیرانی سووریا لە بەرژەوەندیی حکوومەتی ناوەندیی کۆتایی پێبێت.

ناوبراو درێژەی دا: بەپێی گرێبەستی 2254ی نەتەوە یەکگرتووەکان کە بۆ سووریا پەسەند کراوە، چەند دانوستانێک لەنێوان ئۆپۆزیسیۆنی سووریا و حکوومەتی ناوەندی لەسەر دەستووری نێوی سووریا خەریکە بەڕێوەدەچێت، بەڵام ئەو گرووپە ئۆپۆزیسیۆنانەی لە ژێنێڤ ئامادەبوونە نە دەسەڵاتیان بەدەستەوەیە و نە ڕۆڵێک دەگێڕن و تەنها بووکەڵە نمایشیی دەستی تورکیان.

گەلۆ عیسا ڕاشیگەیاند: لە ئێستادا باشتر وایە کە ئۆپۆزیسیۆنی سووریا و گرووپە پاڵپشتکەرەکانیان لە ژێنێڤ تا ڕادەیەک ڕیئالیستی تر بە قەیرانی سووریادا بڕوانن و شاندێک بۆ دانوستان لەگەڵ حکوومەتی ناوەندی ئامادە بکەن کە دەسەڵات و هێزیان لە سووریا بەدەستەوە بێت، بەتایبەتیش زۆر گرینگە کە دەوری ئەنجومەنی سووریای دیموکرات و هێزەکانی سووریای دیموکرات بەهەند وەربگیردرێت و نەتەوە یەکگرتووەکانیش دەرک بەم پرسە بکەن.

ئەندامەکەی لیژنەی ناوەندیی پارتی دیموکراتی کورد لە سووریا (P.D.K.S) لەبارەی ڕۆڵی ڕووسیا لە دانوستانەکاندا جەختی کردەوە: لە ئێستادا دانوستانێک لەنێوان حکوومەتی ناوەندی و ئیدارەی خۆسەردا بەڕێوەناچێت، بەڵکوو دانوستان لەنێوان ئیدارەی خۆسەر و ڕووسیا خەریکە بەڕێوەدەچێت. ڕووسیا لەلایەکەوە بەناوی حکوومەتی ناوەندیی سووریا دانوستان دەکات و لەلایەکی دیکەوە خۆی بە گەرەنتیکاری دانوستانەکان دەزانێت.

گەلۆ عیسا وەبیری هێنایەوە: ئەم سیاسەتەی ڕووسیا تاکۆتایی سەرکەوتوو نابێت بەڵام ڕەنگە بەشێوەی کورت خایەن بەشێک لە کێشەکان چارەسەر بکات. باشترین ڕێگاچارەی بۆ گەرەنتی کردنی دانوستان لەگەڵ حکوومەتی ناوەندی ئەمەیە کە نەتەوەیەکگرتووەکان و هێزە نێودەوڵەتییەکان بەگوێرەی گرێبەستی 2254ی ئەو ڕێکخراوەیە، هێزە ڕاستەقینەکانی ئۆپۆزیسیۆونی سووریا واتا ئیدارەی خۆسەر و ئەنجومەنی سووریا دیموکرات لە دانوستانەکانی ژێنێڤدا بەشدار بکەن تاکوو بەرژەوەندیی هەموو گرووپەکان لەبەرچاو بگیردرێت.