کوردپرێس:
رۆژی سێشەممە 22ی کانوونی یەکەمی 2020 عەبدولغەنی ئەسەدی سەرۆكی دەزگای ئاسایشی نیشتمانیی عیراق سەردانی هەولێری كرد و لەگەڵ رێبەر ئەحمەد وەزیری ناوخۆی هەرێم كۆبوەوە.
لەبارەی ئامانجی سەردانەكەی بۆ هەرێمیش، ئەسەدی ئاماژەی بەوەكردوە، بۆ فراوانكردنی بنكەی هەماهەنگیی ئەمنیی و كاركردنە لە روبەرێكی هاوبەشی فراوانتر. هەروەها دوپاتیكردوەتەوە، پێویستە پەلوپۆی هەماهەنگیی ئەمنی تەواوی پارێزگاكانی عیراق بگرێتەوە، بە هەرێمی كوردستانیشەوە.
بەرپرسە عیراقییەكە وتوشیەتی، رۆحیەتێكی بەرزی ئامادەبونیان بینیوە بۆ هەماهەنگیی ئەمنی لەنێوان دەزگای ئاسایشی نیشتمانیی عیراق و دەزگا ئەمنییەكانی هەرێمی كوردستان، هەروەك جەختی لە ئامادەیی بەغدا كردوەتەوە بۆ فراوانتركردنی هەماهەنگییەكان، بەشێوەیەك لە خزمەتی ئاسایش و ئارامیدا بێت.
گەڕاندنەوەی ئاوارەكانیش یەكێك بوە لەو پرسانەی لەنێوان هەردوولادا قسەی لەسەركراوە، لەو روانگەیەشەوە سەرۆكی دەزگای ئاسایشی نیشتمانیی عیراق رایگەیاندوە، بەغدا و هەولێر كاردەكەن بۆ گەیشتن بە چارەسەری كێشەی گەڕاندنەوەی ئاوارەكان.
Your Comment