بەپێی هەواڵی کوردپرێس، به‌گوێره‌ی راگه‌یه‌ندراوێكی سه‌رۆكایه‌تی هه‌رێم، ئێواره‌ی ڕۆژی پێنجشه‌ممه نێچیرڤان بارزانی، سه‌رۆكی هه‌رێمی كوردستان، پێشوازیی له لویجی دی مایۆ وه‌زیری ده‌ره‌وه‌ی ئیتاڵیا و شاندێكی دیپلۆماسی و سه‌ربازیی یاوه‌ری كرد.
له كۆبونه‌وه‌کەدا كه باڵیۆزی ئیتاڵیا له عێراق، كونسولیان له هه‌ولێر ئاماده‌ی بوون، وه‌زیری ده‌ره‌وه‌ی ئیتاڵیا باسی له به‌سه‌ركردنه‌وه‌ی هێزه‌كانی وڵاته‌كه‌ی له عێراق كرد و جه‌ختی له به‌رده‌وامیی پشتگیریی ئیتاڵیا بۆ عێراق و هه‌رێمی كوردستان كرده‌وه، هه‌روه‌ها ستایشی ڕۆڵی پێشمه‌رگه‌ی له تێكشاندنی داعش و میوانپه‌روه‌ریی هه‌رێمی كوردستان و حه‌واندنه‌وه‌ی ئاواره و په‌نابه‌ران كرد.
وه‌زیری ده‌ره‌وه‌ی ئیتاڵیا، نێچیرڤان بارزانی بۆ سه‌ردانێكی فه‌رمی بانگهێشتی ڕۆما كرد، هه‌روه‌ها له‌باره‌ی په‌یوه‌ندییه‌كانی عێراق و هه‌رێمی كوردستانیشه‌وه له‌گه‌ڵ ئیتاڵیا، هه‌ردوولا خواستی هاوبه‌شیان بۆ بره‌ودان به په‌یوه‌ندییه‌كان و فراوان كردنی بواره‌كانی هاریكاریی هاوبه‌ش دووپات كرده‌وه، به‌تایبه‌تیش له‌ڕووی ئابووری و كولتورییه‌وه.
لای خۆیه‌وه نێچێرڤان بارزانی وێڕای پیرۆزبایی له گه‌ل و حكوومه‌تی ئیتاڵیا به‌بۆنه‌ی هاتنه‌وه‌ی جه‌ژنی له‌دایكبوونی حه‌زره‌تی مه‌سیح و ساڵی تازه‌وه، سوپاس و پێزانینی هه‌رێمی كوردستانی بۆ پشتگیریی ئیتاڵیا له عێراق و هه‌رێمی كوردستان له شه‌ڕی دژی داعشدا، هه‌روه‌ها بۆ مه‌شق و ڕاهێنانی پێشمه‌رگه و هاریكاریی مرۆییی ئیتاڵیا دووپات كرده‌وه.
دۆخی سیاسی و هه‌ڵبژاردنه‌كانی ئه‌نجومه‌نی نوێنه‌رانی عێراق، ئه‌نجامی هه‌ڵبژاردن و هه‌وڵه‌كانی دامه‌زراندنی حكوومه‌تی داهاتوو، پێشهاته‌كانی شه‌ڕی دژی داعش و مه‌ترسییه‌كانی تیرۆر، په‌یوه‌ندییه‌كانی هه‌ولێر ـ به‌غدا و گفتوگۆی چاره‌سه‌ركرنی كێشه‌كانیان، دۆخ و گرنگیی پاراستنی ئارامی و سه‌قامگیریی ناوچه‌كه به‌گشتی و چه‌ند پرسێكی دیكه‌ی جێی بایه‌خی هاوبه‌ش، ته‌وه‌رێكی دیكه‌ی كۆبوونه‌كه بوو.
Your Comment