عەبدولڕەحمان ئاپۆ ئەندامی لیژنەی ناوەندیی پارتی دیموکراتی کوردستانی سووریا (PDK.S) لە گفتوگۆ لەگەڵ کوردپرێسدا ئاماژەی دا بە ڕێککەوتنی نێوان ڕەوتە کوردییەکانی سووریا لەسەر بنەمای یەکگرتن و وتی: دانوستانەکان ڕاگیراون و لایەنی بەرامبەرمان هەوڵی نادروست دەدات و ئاستەنگ لەبەردەم دانوستانەکاندا دروست دەکات کە نیشاندەری هەوڵ دان بۆ ڕێێکەوتن نییە.

ناوبراو درێژەی دا: هەندێک هەڵمەت لەوان ئاگربەردان لە نووسینگەکانی ئەنجومەنی نیشتمانیی کورد (ENKS) لە کوردستانی سووریا و هێرش کردنەسەر دەروازەی سێمالکا-فیشخابوور لەلایەن گرووپێک ناسراو بە گەنجانی شۆڕشگێڕ و ڕەفتاری هاوشێوەی ئەم ڕەفتارانە هیچ خزمەتێک بە بەرژەوەندیی کوردەکان لە سووریا ناکات.

عەبدولڕەحمان ئاپۆ زیاتر وتی: ئێمە دەزانین هەموو ئەو هێز و گرووپانەی کە لەژێر ناوی ئیدارەی خۆسەر دەناسێندرێن، سەربە پارتی کرێکارانی کوردستان (PKK)ن و ئەم حزبە ناهێڵێت هیچ ڕێککەوتنێک لەنێوان ئەنجومەنی نیشتمانیی کورد و حزبەکانی سەربە پارتی یەکێتیی دیموکراتیک (PYD) بکرێت، لەسەر ڕێککەوتنی دهۆک کە ساڵی 2014 بە ئامادەبوونی جەنابی مەسعوود بارزانی ئەنجام درا.

ناوبراو وەبیری هێنایەوە: بەڵام بە بڕوای من لە کۆتاییدا بە هاوکاریی هێزە نێونەتەوەییەکان و ئەمریکا ڕێککەوتنێکی نوێ لەسەر بنەمای ڕێککەوتنی دهۆک دەکرێت.