باڵیۆزی ئێران: هێرشە مووشەكییەكە دژی سەروەریی عێراق نەبوو بەڵکوو بنکەیەکی ئیسرائیل کرایە ئامانج
بەشی ئێران- باڵیۆزی كۆماری ئیسلامی ئێران لە بەغدا ڕایگەیاند هێرشە مووشەكییەكەی ئەم دواییەی هەولێر دژی سەروەریی عێراق نەبوو، بەڵکوو بنکەیەکی ئیسرائیل کرایە ئامانج و کاردانەوەیێک بوو لەدژی زایۆنییەکان.

بەپێی هەواڵی کوردپرێس، ئیرەج مەسجدی، باڵیۆزی كۆماری ئیسلامیی ئێران لە بەغدا رایگەیاند "ئەم هێرشەی بۆ سەر هەولێر ئەنجامدراوە هاوشێوەی ئەو هێرشەیە كە كرایە سەر بنكەی سەربازیی عەین ئەسەد و لەوەڵامی تیرۆركردنی سەردار قاسم سولەیمانی فەرماندەی پێشوی سوپای قودسی ئێران، ئەم هێرشە بەئامانجی سەروەریی عێراق نەبووە، بەڵكوو ئەمریكیەكان كە خاكی عێراقیان داگیر كردووە سەروەری عێراقیان بەئامانج گرتووە".

ناوبراو ئاماژەی بەوەكردووە: "ناتوانین دەستبەرداری ئاسایشی وڵاتەكەمان بین و بۆ ئەو بابەتەش چەندینجار بەرپرسانی هەرێمی  كوردستانمان ئاگادار كردوەتەوە، ئێمە دەمانەوێت عێراق ڕێگری لە چالاكی ئیسرائیل بكات كە ئاسایشی ئێمە بكاتە ئامانج، بەڵام ئەگەر كار نەكات ئێمە هەنگاو دەنێین و ڕێگەش نادەین كوردستانی عێراق بكرێتە بنكەیەكی ئیسرائیلی لە ناوچەكەدا".

مەسجدی جەختی کردەوە: "لەو هێرشەی سوپای پاسدارانی ئێران، ئامانجمان بەزاندنی سەروەری خاكی عێراق نەبوو، بەڵكوو ئیسرائیلیەكان و ناوەندی مۆسادمان كردە ئامانج".