رێگە نادەین پارتی بە کەڵک وەرگرتن لە زۆرینەی پەرلەمانی بریار لەبارەی هەڵبژاردن لێبدات
بەشی عێراق و هەرێمی کوردستان- جێگری سەرۆکى فراكسیۆنی یەكێتی ڕایگەیاند رێگە نادەین پارتی بەتەنھا و بەپێی ویست و بەرژەوەندییە حیزبییەکانی خۆی بریاری لێبدات.

بەپێی هەواڵی کوردپرێس، فراكسیۆنی پارتی لە پەرلەمانی كوردستان ڕایگەیاند، ئەگەر سەرۆكی پەرلەمان پرسی هەمواری یاسای هەڵبژاردن و كاراكردنەوەی كۆمسیۆنە نەخاتە بەرنامەی كارەوە زۆرینەی پەرلەمانی بەكاردەهێنن.

لە وەڵامی سەرۆكی فراكسیۆنی پارتیدا، لوقمان وەردی، جێگری سەرۆکى فراكسیۆنی یەكێتی لە پەرلەمانی كوردستان لە نووسینێكدا کە لەلاپەڕەی خۆی فەیەسبوک بڵاویکردوەتەوە نووسیویەتى: "عەقلیەتی بڕیاری تاکرەویی حیزبیی، ھەرێمی کوردستانی بەم رۆژە گەیاند، بۆیە ئێمە چ وەکوو فراکسیۆنی یەکێتیی لە پەرلەمانی کوردستان ، چ وەکوو هێزێکی رەسەنی گۆڕەپانی سیاسیی کوردستانیش، بروامان وایە دەبێت کۆتایی بە تاکرەویی لە بریاردانی سیاسیی بۆ ئاییندەی گەلەکەمان و پرسە نیشتمانییەکانمان بهێنرێت و بە ئەرکی نیشتمانیی و دیموکراسییانەشی دەزانین کە ڕووبەرووی تاکڕەویی سیاسیی ببینەوە".

ناوبراو ئاماژەى بەوەش کردووە، ئەزموونی چەند ساڵەی رابردوو پێمان دەڵێت ھەموو ئەو بریارە سیاسی و ئابوورییانەی بە تاکرەویی حیزبیی و  دوور لە کۆدەنگی نیشتمانیی هێز و حزبە سیاسییەکانی کوردستان دراون، سەرەنجام بە شکست کۆتاییان پێهاتووە و هاونیشتمانیان باجیان داوە و تاکرەویی بڕیاردانی حیزبیی، بۆتە مایەی کێشە و نەھامەتی و مالوێرانی بۆ گەلەکەمان و گەرانەوەمان چەند هەنگاوێک بۆ دواوە.

وەردی دەشڵێت "لە ئێستاشدا بانگەشە کردنی پارتی چ وەک حزب چ وەک فراکسیۆنێکی پەرلەمانی بۆ بریاری تاکڕەویی لە پرسی ھەڵبژاردنی پەرلەمانی کوردستان دا، کە پرسێکی تەواو  نیشتمانییە و پەیوەندیی بە ئایندەی سیاسی  و حوکمرانی ھەرێمی کوردستانەوە ھەیە ، سەرەرای ئەوەی پەیوەستە بە چارەنوسی میللەتەکەمان و ژیان و گوزەرانی ھاوڵاتیان".

جێگری سەرۆکى فراکسیۆنى یەکێتى جەخت دەكاتەوە، كە ڕێگەنادەن پارتی وەک لایەنێکی سیاسی بەتەنھا و بەپێی ویست و بەرژەوەندییە حیزبییەکانی خۆی بریاری لێبدات و هەڵبژاردن بۆ مەرامی حیزبیی بەکاربهێنێ، بەڵکو دەبێت بریاری بەکۆمەڵ و بەشەراکەتی سەرجەم ھێزەسیاسیەکان بدرێت و گەڕانەوە بۆ دواوە نییە و ئاییندەی گەلەکەمان و پێکهاتەی خولی داهاتوی پەرلەمان وا دەخوازێت پەلە بکەین لە هەموارکردنەوەی یاسای هەڵبژاردن بۆ فرە بازنەیی و پاکردنەوەی تۆماری دەنگدەران و هەروەها نوێنەرایەتی کردنی راستەقینەی پێکهاتە رەسەنەکانی کوردستان.