نامانەوێت ENKS بچێتە ڕیزی دوژمنانمانەوە ئەوان دەبێت بزانن تورکیا دوژمنی کوردە
بەشی سووریا- سەرۆکی پارتی ڕۆژی دیموکراتی کورد لە سووریا دەڵێت: ئێمە بڕوامان بە درێژەدان بە گفتوگۆی کورد-کوردی لەنێوان ئەنجومەنی نیشتمانی کورد (ENKS) و حزبەکانی یەکێتی نیشتمانیی کورد (PYNK)ە و دەبێت ئەنەکەسە دەرک بەمە بکات کە تورکیا دوژمنی گەلی کوردە.

کۆفان کەنعۆ سەرۆکی پارتی ڕۆژی دیموکراتی کورد لە سووریا لە گفتوگۆ لەگەڵ کوردپرێسدا ئاماژەی دا بە داهاتووی دانوستانی نێوان ئەنجومەنی نیشتمانی کورد (ENKS) و حزبەکانی یەکێتی نیشتمانیی کورد (PYNK) و وتی: پاش دەستبەکار بوونی ئیدارەی بایدن و گۆڕینی باڵیۆزی ئەمریکا لە ناوچەکە و نوێنەری ئەمریکا لە دانوستانەکاندا، گفتوگۆکان ڕاگیران. لە چەن مانگی ڕابردوودا حزبەکانی یەکێتیی نیشتمانی و ئەنجومەنی نیشتمانی هەریەکەو بەشێوەی جیاجیا لەگەڵ نوێنەری ئەمریکا کۆبوونەتەوە و لەبارەی چۆنیەتی دەستپێکردنەوەی دانوستانەکان گفتوگۆیان کردووە.

ناوبراو درێژەی دا: ئێمە وەکوو پارتی ڕۆژ و حزبەکانی یەکێتیی نیشتمانی و بەڕێوەبەرایەتی خۆسەر داوای گفتوگۆی سازێنەر و جیدین. ئێمە نامانەوێت ئەنجومەنی نیشتمانی لە بەرەی دوژمناندا بێت و دەمانەوێت هاوڕا بن لەگەڵ برایانی خۆیان. دوژمنانی کورد هیچ کات بیر لە بەرژەوەندیی گەلی کورد ناکەنەوە و بەردەوام کێشەمان بۆ دروست دەکەن.

ناوبراو زیاتر وتی: پێویستە ئەنەکەسە دەرک بەمە بکات کە تورکیا دوژمنی کوردە و ئەگەر هێزەکان نەبن هیچ کات دان بە بوونی کورددا نانێت.

کۆفان کەنعۆ جەختی کردەوە: ئێمە بڕوامان بە درێژەی گفتوگۆ هەیە و بەڕێگاچارەیێکی دەزانین بۆ یەکگرتن و بە ئەنجام گەیشتنی هەوڵی کوردەکان بۆ گەیشتن بە مافەکانیان. دانوستانەکان بۆ ئێمە جدیە و هیوادارین کە برایانی ئەنجومەنی نیشتمانیش بڕیارەکانیان لە تورکیا دەرنەکەن بەڵکوو لە کوردستانی سووریا بڕیار بەن و کەس خاوەنی بڕیاری ئەوان نەبێت.