توركیا لە سنووری هەولێر ١٢ هاوڵاتی هەرێمی دەستگیر کرد
بەشی عێراق و هەرێمی کوردستان- سوپای توركیا لە ناوچەی برادۆستی سنووری پارێزگای هەولێر ١٢ هاوڵاتی هەرێمی کوردستانیان دەستگیر کرد.

بەپێی هەواڵی کوردپرێس، سوپای توركیا لە ناوچەی برادۆست 12 هاوڵاتی هەرێمیان دەستگیر كرد، ئەو کەسانەی دەستگیر کراون خەڵکی گوندەکانی دیلا، مالماڵۆک و میدان-ی سەر بە شارەدێی سیدەکانی سەر بە شارۆچکەی سۆرانی پارێزگای هەولێرن.

کەسێک نزیکی خانەوادەی ئەو هاوڵاتیانە، هەواڵەکەی بۆ شارپرێس پشتڕاستکردەوە ڕاگەیاندووە، ئەمڕۆ وەکوو ڕۆژانی ڕابردوو ژمارەیەک هاوڵاتی گوندی دایلا و شەپان مالماڵۆک و مەیدان، بە مەبەستی هێنانی گژوگیای بەهاری سەردانی چیا و شاخ و تەپۆڵکەکانی سنووری برادۆست دەکەن، بەڵام لەلایەن ژمارەیەک سەربازی سوپای تورکیاوە دەستگیر دەکرێن و ئەشکەنجە دەدرێن .

ئەو هاوڵاتییە كە نەیویست ناوی بڵاوبكرێتەوە وتیشی: ماوەی چەند کاتژمێرێکە لەلایەن سوپای تورکیا دەستگیرکراون و دوای ئەشكەنجەدانیان، ویستویانە لە ڕێگای هەلیکۆپتەر بیانگوازێتەوە بۆ وڵاتی تورکیا، بەڵام لە شوێنکدا لەو ناوچەیە تەحویلی بارەگایەکی هێزەکانی پێشمەرگە کراون، تائێستاش هاوڵاتیەکان نەگەڕاونەتەوە ناو خانەوادەکانیان و چارەنووسیان نادیارە.

دەستگیر كردنی ئەو هاوڵاتیانە لەكاتێكدایە کە مەسروور بارزانی، سەرۆكی حكوومەتی هەرێمی كوردستان ڕۆژی سەردانی توركیای كرد و لەگەڵ ڕەجەب تەیب ئەردۆغان، سەرۆكی توركیا كۆ بویەوە.