بەپێی هەواڵی کوردپرێس، کتێبەکە بەناوی "کورسییە سپییەکەی دەمیرتاش" بڵاو کراوەتەوە کە لەلایەن زینار گاراڤیل ڕاوێژکاری پێشووی ڕۆژنامەوانی دەمیرتاشەوە نووسراوە.

کورسییە سپییەکەی دەمیرتاش وردەکاریی ئەو ساتەی تێدا باس کراوە کە دەمیرتاش لەکاتی دەستگیرکردنی‌ و دوورخستنەوەی لە ماڵەکەی، دوو کچەکەی دەلال ‌و دیلدا-ی لەباوەش کردووە.

کاراڤیل لەکتێبەکەیدا باسی ئەو پەرەسەندنە سیاسیی‌ و کۆمەڵایەتییانە دەکات کە لەدوای زیندانی کردنی سەڵاحەدین دەمیرتاش لە نۆڤەمبەری ساڵی 2016وە هاتوونەتە ئاراوە، کتێبەکە هەندێک لەو ڕووداوانەی گێڕاوەتەوە کە لەیادی خەڵکدا نەماون.

لەکتێبەکەدا باسی زۆر لەو بابەتانەش کراوە کە هاوڕێیانی زیندان، پارێزەر، خوشک ‌و برا و هاوسەرەکەی گێڕاویانەتەوە، نووسەر دەڵێت: "کتێبەکە بەرهەمی کارێکی بەبەهایە، چیرۆکی سیاسییەکە کە دڵی لەناو جەماوەردا لێ دەدات".