بەپێی هەواڵی کوردپرێس، حسێن ئه‌میر عه‌بدوڵڵاهیان وه‌زیری دهرهوهی ئێران و فوئاد حسێن هاوتا عێراقییەکەی، له په‌یوه‌ندیه‌کی ته‌له‌فۆنیدا پرسی به بیابانبوون و وشکه‌ساڵی و ڕێگاکانی ڕووبه‌ڕووبوونه‌وه‌یان تاوتوێ کرد.
لەمبارەوە وه‌زاره‌تی دهرهوهی عێراق له ڕاگه‌یه‌ندراوێکدا بڵاویکرده‌وه، فوئاد حسێن له میانی په‌یوه‌ندییه‌کی ته‌له‌فۆنیدا له‌گه‌ڵ حسێن ئه‌میر عه‌بدوڵاهیان له‌باره‌ی گۆڕانکارییه‌کانی که‌شوهه‌وای ناوچه‌که و ئه‌و خۆڵبارینه‌ی که له ماوه‌ی چه‌ند ڕۆژی ڕابردودا عێراق و ئێرانی گرته‌وه گفتوگۆیان کرد.
هه‌ر به‌گوێره‌ی راگه‌یه‌ندراوه‌که، هه‌ردوو وه‌زیری دهرهوهی عێراق و ئێران پێداچوونه‌وه‌یان به گرنگترین ئاسته‌نگه‌کانی که‌شوهه‌وادا کرد که ڕووبه‌ڕووی ناوچه‌که ده‌بێته‌وه، وه‌ک تۆز و خۆڵ و وشکه‌ساڵی و به بیابانبوون و که‌مبوونه‌وه‌ی جۆراوجۆری زینده‌وه‌ره‌کان و ڕێگاکانی ڕووبه‌ڕووبوونه‌وه‌یان، به ئامانجی که‌مکردنه‌وه‌ی کاریگه‌رییه‌کانی دیارده‌ی گۆڕانی که‌شوهه‌وا و دابین کردنی ژینگه‌یه‌کی ته‌ندروست و گونجاو بۆ مرۆڤایه‌تی.
ئه‌وه‌ش خراوه‌ته‌ڕوو، بۆچوونه‌کان ئاڵوگۆڕ کران له‌سه‌ر دوایین پێشهاته‌کانی ناوچه‌که، جه‌ختیش له‌سه‌ر گرنگی تێپه‌ڕاندنی قه‌یرانه‌کان به‌ره‌و چاره‌سه‌ری ئاشتیانه بۆ به‌دیهێنانی ئاواته‌کانی سه‌قامگیری و ئاسایشی ناوچه‌که کرایه‌وه.
هه‌ر به‌گوێره‌ی راگه‌یه‌ندراوه‌که، هه‌ردوو وه‌زیری دهرهوهی عێراق و ئێران رێککه‌وتوون له‌سه‌ر ئه‌نجامدانی کۆبوونه‌وه‌ی نێوان شاندێکی ته‌کنیکی عێراقی و ئێرانی له به‌غدا بۆ لێکۆڵینه‌وه له‌و ئاسته‌نگانه‌ی که رووبه‌ڕووی هه‌ردوو وڵات ده‌بێته‌وه له داهاتودا، جه‌ختیشیان له به‌رده‌وامیدان به دیالۆگ و فراوانکردنی گفتوگۆکان بۆ وڵاتانی دیکه‌ی ناوچه‌که کرده‌وه.
له‌ڕاگه‌یه‌ندراوه‌که‌شدا سه‌باره‌ت به پرسی ئاو ئه‌وه‌خراوه‌ته‌ڕوو، له‌گفتوگۆکه‌ی نێوان فوئاد حسێن و حسێن ئه‌میر عه‌بدولهه‌یان باس له پرسه‌کانی ئاو و پێشکه‌وتن و په‌ره‌پێدانی سه‌رچاوه‌کانی کرا بۆ خزمه‌تکردنی به‌رژه‌وه‌ندییه‌کانی هه‌ردوو وڵاتی دراوسێ.
Your Comment