جموجوڵی زەمینی لەلایەن تورکیاوە بۆ هێرش کردن نابینرێت
بەشی سووریا- ڕۆژنامەنووسی مەیدانی لە باکووری سووریا دەڵێت: هیچ چەشنە جموجوڵ و کۆکردنەوەی هێزەکانی تورکیا بۆ هێرشی زەمینی لەدژی ناوچەکانی ژێر کونترۆڵی کوردانی سووریا نابینرێت.

لورنس شەعیر شرۆڤەکاری سیاسی و ڕۆژنامەنووسی سووریا لە وەڵامی پرسیارێکی کوردپرێسدا کە ئایا پاش هەڕەشەکانی ئەردۆغان ئەرتەشی تورکیا و گرووپە چەکدارەکان بۆ هێرش کردنەسەر کوردستانی سووریا جووڵەیان پێکراوە؛ ڕایگەیاند: ئەردۆغان بەردەوام هەڕەشەی لە باکووری سووریا کردووە و پاشان جووڵەی بە هێز کردووە بەڵام ئەمجارەیان پاش هەڕەشە زارەکییەکانی سەرۆکی تورکیا، ئەمریکا و ڕووسیا بە ئاشکرا دژی ئەو وتانە وەستان.

ناوبراو درێژەی دا: هەڵویستی جیهانی هەمبەر هەڕەشەکانی ئەردۆغان ڕوون و ئاشکرا بوو و بە "نا"یەکی گەورە وەڵامیان دایەوە.

لورنس شەعیر وتیشی: جووڵە لەسەر سنوورەکان و کۆکردنەوەی هێز نابینرێت بەڵام هەموو ڕۆژێک تۆپخانەکانی ئەرتەشی تورکیا و گرووپە چەکدارەکان ناوچە سنوورییەکان و گوندەکان تۆپباران دەکەن و تاکوو ئێستا ژمارەیێک زۆر کوژراو و برینداری لێکەوتۆتەوە.

ناوبراو جەختی کردەوە: ئامانجی تورکیا نائەمن کردنی کوردستانی سووریا و ئاوارە کردنی خەڵکەکەیەتی.

ئەم ڕۆژنامەوانە عەرەبە کە دانیشتووی قامیشلۆیە وەبیری هێنایەوە: هیچ چەشنە جموجوڵ و کۆکردنەوەی هێزەکانی تورکیا بۆ هێرشی زەمینی لەدژی ناوچەکانی ژێر کونترۆڵی کوردانی سووریا نابینرێت و ئەمریکا و ڕووسیا بە ئاشکرا دژی ئەو هێرشە وەستاون.