نەوتی هەرێمی کوردستان ڕادەستی کۆمپانیا ناوخۆییەکان دەکرێت
بەشی جیهان- بەگوێرەی ڕاپۆرتێکی ڕۆیتێرز، حکوومەتی هەرێمی کوردستان بەنیازە دوو کۆمپانیای ناوخۆی یەکیان بۆ بەرهەم هێنان و ئەوی دیکەش بۆ بەبازاڕی کردنی نەوت دابمەزرێنێت.

بەپێی هەواڵی کوردپرێس، بەرپرسانی باڵای هەرێمی کوردستان بە ڕۆیتێرزیان وتووە حکوومەتی هەرێم لە گەرمەی گرژییەکان لەگەڵ حکوومەتی ناوەندیی عێراق و گوشار خستنەسەر کۆمپانیا بیانییەکان لەلایەن بەغداوە؛ بەنیازە دوو کۆمپانیای نەوتی بۆ سامانپێدان بە نەوتی خۆی دابمەزرێنێت.

بەگوێرەی ڕاپۆرتەکەی ڕۆیتێرز حکوومەتی هەرێمی کوردستان دەیهەوێت کۆمپانیایەک لەژێر ناوی KROC بۆ دەرهێنانی نەوت و کۆمپانیایە لەژێر ناوی KOMO بۆ بەبەزاڕی کردن و فرۆشتنی نەوت دابمەزرێنێت.

وتەبێژێکی حکوومەتی هەرێمی کوردستان بە ڕۆیتێرزی وتووە حکوومەتی هەرێم ئەم بابەتەی لە کۆبوونەوە لەگەڵ نوێنەرانی حکوومەتی ناوەندیی عێراق هێناوەتە ئاراوە.