فەرماندەی گشتیی هەسەدە: ئومێد وایە سوید و فینلاند بەردەوام بن لە هاوکاریکردنی ئیدارەی خۆسەری
بەشی سووریا- فەرماندەی گشتیی هێزەکانی سووریای دیموکرات رایگەیاند، ئومێدی وایە سوید و فینلاند بەردەوام بن لە هاوکاریکردنی ئیدارەی خۆسەری  و هێزەکانی سوریای دیموکرات.

بەپێی هەواڵی کوردپرێس، مەزڵوم کۆبانی فەرماندەی گشتیی هێزەکانی سووریای دیموکرات ئەمڕۆ لە کۆنفرانسێکی رۆژنامەنووسیدا لەگەڵ ژمارەیەک رۆژنامەنووسی سوید و وڵاتانی دیکەی جیهان، باسی لە مەرجی تورکیا بۆ سوید و فینلاند کرد بۆ بوونە ئەندام لە ناتۆ و ئاماژەی بەوەدا، "تائێستا ئێمە هیچ گۆڕانکارییەکمان لە حکوومەتی سویدەوە بەرامبەر ئیدارەی خۆسەری باکوور و رۆژهەڵاتی سووریا هەست پێنەکردوە، بۆیە ئێمە سوپاسی پشتیوانی سیاسی و مەعنەوی ئەو وڵاتە دەکەین کە لە شەڕی داعش بۆ ئێمەی پێشکەش کرد".
کۆبانێ هۆشداری دەدات لەوەی تورکیا قەیرانی ئۆکرانیا و داواکارییەکەی سوید و فینلاند بۆ بونە ئەندامی ناتۆ، بۆ "قازانجی خۆی دەقۆزێتەوە" و لەم کاتەشدا ئەنقەرە مەترسییەکانی لەسەر ناوچەکانیان زیاتر بوون.

ناوبراو باسی لەوەش کرد، ئومێدی وایە سوید و فینلاند بەردەوام بن لە هاوکارییەکانیان بۆ بەرەنگاربونەوەی تیرۆر، پەیوەست بە پەسەندکردنی مەرجەکانی تورکیاش لەلایەن ئەو دوو وڵاتە بۆ ئەوەی بتوانن ببنە ئەندامی ناتۆ، وتی: "باوەڕم وایە ئەوە پرسێکی ناوخۆییە و ئێمە ڕێز لە بڕیاری ئەوان دەگرین، بەڵام باوەڕمان وایە تورکیا دۆخی شەڕی رووسیا و ئۆکرانیا و داواکارییەکەی سوید و فینلاندی وەک هەلێک قۆستوەتەوە و دەیەوێت لە بەرژەوەندی خۆی بەکاریانهێنێت".
فەرماندەی گشتی هێزەکانی سووریای دیموکرات (هەسەدە) باسی لەوەش كرد، هەسەدە هەڕەشەکانی تورکیای بە جددی وەرگرتووە و خۆی بۆ هەموو هێرشێکی گریمانەکراو ئامادە کردووە، بەتایبەت کە ئەو ناوچانەی ئەنقەرە دەیەوێت هێرشیانبکاتەسەر بریتین لە تل رەفعەت و مەنبج کە ئاسمانی ئەو دوو ناوچەیەش لەلایەن رووسیاوە کۆنتڕۆڵ کراون، بۆیە هۆشداری دەدەن لەوەی هەر هێرشێک ئاوارە بوونی سەدان هەزار کەسی لێدەکەوێتەوە.