بەپێی هەواڵی کوردپرێس، ئیحسان عەبدولجەبار وەزیری نەوتی عێراق راگەیەنراوێکی بڵاو کردەوە و تیایدا هاتووە، لە پاریسی پایتەختی فەرەنسا دەستەی داوەری کردنی سەربە ژووری بازرگانی نیودەوڵەتی کۆتا دانیشتنی خۆی لەبارەی ناکۆکی نێوان عێراق و تورکیای سەبارەت بە رێککەوتنی بۆری نەوتی نێوان دوو وڵات ساز کرد.
ناوبراو ئاماژەی بەوەش داوە، عێراق پێداگری دەکات لەسەر بەدەستهێنانی مافەڕەواکانی لەو سامانە نیشتیمانییەی هەیەتی بە گوێرەی یاسا و پەیماننامە نێودەوڵتییەکان.
عەبدولجەبار دەشڵێت، عێراق رێز لەو بڕیارە دادپەروەرانە دەگرێت کە دادگاکان و لایەن پەیوەندیدارەکان دەریدەکەن سەبارەت بە سنووربەزاندنەکان و ناکۆکییەکان، بەوانەشەوە کە پەیوەندیدارن بە سامانی نەوتییەوە.
لە بەشێکی دیکەی راگەیەنراوەکەدا هاتووە، ژووری بازرگانی نێودەوڵەتی چاودەخشێنێتەوە بەو سکاڵایەی عێراق دژی تورکیا تۆماری کردووە لەبارەی ئە سەرپێچییانەی کردوویەتی لەبارەی هێڵی نەوتی عێراق -تورکیاوە کەلە ساڵی ١٩٧٣ لەسەری رێککەوتوون.
دەشڵێت، بەگوێرەی رێککەوتنەکە پێویستە لایەنی تورکی پابەندبێت بەسەرجەم رێنماییەکانی عێراقەوە پەیوەست بە جموجوڵی نەوتی خاو و لەهەموو بنکەکاندا لە هەڵگرتن و مامەڵەپێوەکردن و گەیشتنی بە کۆتا وێستگە.
راگەیەنراوەکەی وەزیری نەوتی عێراق ئەوەشی خستووەتەڕوو، دەستەی دادوەری دوای ئەوەی گوێبیستی داواکاری لایەنەکان بوو، دۆسییەکەی داخستووە و چاوەڕێ دەکرێت لەچەند مانگی کەمی داهاتوودا بڕیاری کۆتایی لەبارەی دۆسییەکەوە بدات.
Your Comment