کوردپرێس:
بەدران چیاکورد بریکاری ئەنجومەنی جێبەجێکاری ئیدارەی خۆسەری باکوور و خۆرهەڵاتی سووریا دەڵێت هەڵوێستی ڕووسیا بەرامبەر ئیدارەکەی ئەوان ناڕوونە و یەکلا نەکراوەتەوە.
چیاکورد لە دیمانەیێکدا کە لەگەڵ ئاژانسی هاوارنیوز کردوویەتی وەڵامی پرسیارێکی داوەتەوە سەبارەت بە هەڵوێستی ڕووسیا بەرامبەر ئیدارەی خۆسەری کوردی لە باکووری سووریا و دەڵێت: بەتەواوی ئاشکرا نیە کە سیاسەتی ڕووسیا لەبارەی ئیدارەی خۆسەری کوردی چییە. نەقبووڵی کردووە و نە داوای هەڵپێچانیشی کردووە.
ناوبراو گوتیشی: ڕووسەکان لە دیدارەکاندا بە کوردیان وتووە لەبارەی دانوستانمان لەگەڵ دیمەشق دەستوەردان ناکەن چ دانوستانەکە لەبارەی ئیدارەی خۆسەر بێت و چ لەبارەی فیدراڵیەت و خۆبەڕێوەبەرییشەوە بێت.
چیاکورد زیادیشی کرد: ئاشکرایە کە ڕووسیا لە ئەنجامدا حەز بەوە دەکات هەموو سووریا لە کۆنتڕۆڵی دەوڵەتی ناوەندیدا بێت بەڵام دژایەتیی جیدیی دامەزران و درێژەدان بە حەیاتی ئیدارەی خۆسەریشی نەکردووە.
ناوبراو هەر لەو بارەیەوە گوتیشی: لە ڕاستیدا خواستی سەرەکیی ڕووسیا ئەوە نیە کە ناوچەکە بە شێوەی خۆسەر ئیدارە بکرێت. ڕووسیا مافی فەرهەنگی قبووڵ دەکات. جگە لەمەش هیچی تر لەبارەی موقیفەکانی ڕووسیاوە نازانین.
Your Comment