لە ناوچە سنوورییەکانی هەرێمی کوردستان سەربازێکی تورکیا کوژرا
بەشی تورکیا- وەزارەتی بەرگریی تورکیا کوژرانی سەربازێکیان لە شەڕی پەکەکە لە ناوچە سنوورییەکانی هەرێمی کوردستان و تورکیا راگەیاند.

بەپێی هەواڵی کوردپرێس، لە راگەیەندراوێکدا وەزارەتی بەرگریی تورکیا ئاشکرای کرد: سەربازێکی پیادە بەناوی رەشاد ئەرگین لە ناوچه‌ی ئۆپه‌راسیۆنی چنگ-قفڵ، لە ئەنجامی دەستڕێژی گولـلەی چەکدارانی پەکەکە کوژراوە".

وەزارەتی بەرگری تورکیا ئاماژەی بەوەکردووە، لەکاتی دەستڕێژی گولـلەی چەکدارانی پەکەکە، سەربازەکەیان برینداربووە و گەیەندراوەتە نەخۆشخانە، دواتر بەهۆی سەختی برینەکەیەوە گیانی لەدەست داوە.

شایانی باسە لە 18/4/2022، سوپای تورکیا ئۆپەراسیۆنێکی لە رێگەی وشکانی و ئاسمانیەوە بەناوی "چنگ-قفڵ" بۆ سەر بنکە و بارەگاکانی پەکەکە لە ناوچەکانی زاپ، مەتین و ئاڤاشین دەستپێکرد.