بەپێی هەواڵی کوردپرێس، دەستەی سەربەخۆیی مافەکانی مرۆڤ لە هەرێمی کوردستان لە راگەیەندراوێکدا ئەمڕۆ یەکشەممە بڵاویکردوەتەوە: "ڕۆژی شەممە 6ی (ئاب/8)ی 2022 لە هەندێک شار و شارۆچکەی هەرێمی کورستان ژمارەیەک هاوڵاتی گردبوونەوە بەناوی خستنەڕووی چەند داواکاریەک و گەیاندنی بە بەرپرسانی حکوومەت و یەکە ئیداریەکان، لە هەندێک شوێن گرژی تێکەوت و ژمارەیەک هاوڵاتی و ڕۆژنامەنووس لەلایەن دەزگا ئەمنیەکانەوە دەستگیرکران، ئێمە لەدەستەی مافی مرۆڤ لەیەکەم ساتی خۆپیشاندانەکان لەسەر خەت بووین و لەڕێگەی تیمەکانمان چاودێری بارودۆخەکەمان دەکرد".

ئاماژەی بەوەش کردووە،"پشتیوانی لە هەر خۆپیشاندان و گردبوونەوەک دەکەین لە چوارچێوەی ڕێکارە یاساییەکان و مۆڵەت دراو لەلایەن یەکە ئیداریەکانی پارێزگا و شار و شارۆچکەکان، خۆپیشاندان بەمافێکی ئاسایی دەزانین بۆ داوا کردنی ماف و خستنەڕووی کێشەکانی هاوڵاتیان و یەکێکە لە سیماکانی دیموکراسی، بەگوێرەی بەدواداچونەکانمان و لێدوانی بەرپرسانی ئیداری شارەکانیش ئەو خۆپیشاندانانە مۆڵەتی بۆ وەرنەگیراوە و ڕێکارە پێویستیەکانی بۆ نەکراوە بەفەرمی".

لەبەشێکی دیکەی راگەیەندراوەکەدا هاتووە "ژمارەیەک ڕۆژنامەنووس دەستگیر کراون بەبێ فەرمانی دادوەر کە ڕێگە پێدراو نیە و پێچەوانەی یاسای ڕۆژنامەگەری و بنەماکانی مافی مرۆڤە، چوونکە کاری ڕۆژنامەنووسان ڕووماڵ کردنی ڕووداو و چالاکی و هەواڵ و بابەتە ڕۆژنامەوانیەکانە ناکرێت بەهیچ بیانویەک ڕوبەڕوی دەستگیرکردن ولێدان ببنەوە و بەپێچەوانەوە دەبێت ئاسانکاریان بۆ بکرێت، جگە لەوەش لەهەندێک شوێن و ناوچە ژمارەیەک هاوڵاتی مەدەنی دەستگیرکراون و دواتر ئازاد کراون و بەدواداچونی زیاتر دەکەین تا دڵنیابینەوە کە هیچ کەسێک لەسەر خۆپیشاندانەکان دەستگیر نەکراوەو لەلایەن دەزگا ئەمنیەکان نەماوە".

لە کۆتایی راگەیەندراوەکەی دەستەی سەربەخۆیی مافەکانی مرۆڤ هاتووە، لە هەندێک شوێن دەزگا ئەمنیەکان بەجل و ئۆتۆمبێلی مەدەنی خەڵکیان دەستگیر کردوە و داوای ناسنامەیان لە خەڵک کردووە ئەوەش دورە لە کاری فەرمی و دەبێتە مایەی ترس و نائومێدی لای هاوڵاتی کە پێویستە دەزگا ئەمنیەکان ناسنامەیان دیار بێت و خۆیان بناسێنن بە جلوبەرگ و ئۆتۆمبێلی فەرمی، چونکە ئەو جۆرە حاڵەتانە بۆ ناوبانگی هەرێمی کوردستان لە دەرەوەش باش نابێت بەتایبەت لەڕاپۆرتەکانی تایبەت بە مافی مرۆڤ وە مافی هاوڵاتیشە بزانی ئەو هێزە کێیە دەستگیری دەکات".