پێکدادانێک لەنێوان هێزەکانی تورکیا و YPG لە سەر سنووری سووریا ڕوویدا
بەشی سووریا- وەزارەتی بەرگریی تورکیا ئیدیعا دەکات ژمارەیەک لە هێزەکانی YPG لە پێکدادانەکانی ئەمڕۆی سنووری ماردین و سووریا گیانیان لەدەست داوە.

بەپێی هەواڵی کوردپرێس، وەزارەتی بەرگریی تورکیا لە راگەیاندراوێکدا ئیدیعای کردووە کە ٧ ئەندامی یەکینەکانی پاراستنی گەل (YPG) لە نێوان سنووری سووریا و ماردین گیانیان لەدەست داوە.

بەپێی راپۆرتەکەی سوزجۆ، وەزارەتی بەرگریی تورکیا بانگەشەی ئەوەی کردووە، سەرەتا هێرشەکان لەلایەن هێزەکانی یەپەگەوە دەستیپێکردووە و ژمارەیەک هاوەنیان فڕێداوەتە سەر زەوییە بەتاڵەکانی سنووری ماردین، دواتریش هێزە سەربازییەکانی تورکیا وەڵامی ئەو هێرشانەیان داوەتەوە.

هەروەها وەزارەتی بەرگریی تورکیا لە ڕاگەیاندراوێکی دیکەدا بانگەشەی ئەوەی کردووە کە لە شەڕ و پێکدادانەکانی ئەم دواییەی کوردستانی عێراقدا ٧ ئەندامی پارتی کرێکارانی کوردستان (PKK) گیانیان لەدەست داوە.

بەپێی ئیدیعاکانی وەزارەتەکە یەکێک لە کوژراوەکانی پەکەکە ئازاد یاندی-یە بە ناوی نهێنیی سورو ئامەد کە بەرپرسی لۆجێستیکی ناوچەی گاڕە بووە.