ئاشتیخوازیی تورکیا بەهۆی ئەو دۆخە خراپەوەیە کە تێیکەوتووە
بەشی جیهان- ساڵح موسلیم پێیوایە لێدوانەکانی وەزیری دەرەوەی تورکیا سەبارەت بە گفتوگۆی ئاشتی لەگەڵ حکوومەتی سووریا نیشانەی گۆشەگیری و دۆخی نالەباری سیاسیی تورکیایە.

بەپێی هەواڵی کوردپرێس، وتەکانی مەولوود چاوشئۆغڵو وەزیری دەرەوەی تورکیا سەبارەت بە پێویستیی گفتوگۆی ئاشتی لەنێوان ئۆپۆزسیۆنی سووریا و حکوومەتی ناوەندی ئەو وڵاتە و هەروەها ئەنقەرە و دیمەشق کاردانەوەی توندی ئۆپۆزسیۆنی سووریای بەدوای خۆیدا هێنا.

لایخۆیەوە ساڵح موسلیم، سەرۆکی پارتی یەکێتی دیموکراتیکی سووریا و یەکێک لە سەرکردە باڵاکانی کورد لە سووریا، کاردانەوەی بەرامبەر بەم لێدوانە نیشان دا و وتی: ئاشتیخوازیی تورکیا بەهۆی ئەو دۆخە خراپە سیاسییەیە کە تێیکەوتووە.

ناوبراو بە ماڵپەڕی ڕوانگەی مافی مرۆڤی سووریای ڕاگەیاندووە، ئەم جۆرە لێدوانانە لەم کاتەدا نیشانەی شکستهێنانی سیاسیی تورکیایە.

سەرکردەکەی پەیەدە دەشڵێت: تورکیا لە ئێستادا هیچ هاوپەیمانێکی نییە و لەلایەن وڵاتانی رۆژئاوایشەوە گۆشەگیریی بەسەردا سەپاوە.

سەبارەت بە بۆچوونی بەڕێوەبەرایەتیی خۆسەری کورد لە سووریا، لەبارەی ئاشتی وتی: واشتی دەستەواژەیەکی بەربڵاوە کە مانای زۆری هەیە و لە ئێستادا مومکین نییە.