یەکێتیی نیشتمانی ئامادەیە گفتوگۆ لەگەڵ هەموو لایەنە کوردستانییەکان بکات بە پارتیشەوە
بەشی عێراق و هەرێمی کوردستان- ئەندامێکی یەکێتیی نیشتمانیی کوردستان، ڕایگەیاند: ئێمە سوپاسی هەموو دامودەزگا حکوومەتییەکانی عێراق و هەرێمی کوردستان دەکەین بەهۆی هەڵویستی دروستیان لەبارەی ئەو دۆخەی عێراق تێیکەوتووە.

بەپێی هەواڵی کوردپرێس، مەحموود خۆشناو لە گفتوگۆ لەگەڵ رۆژنامەی "المدی" عێراقی رایگەیاند، لایەنە سیاسییەكانی عێراق لە رووداوەكانی ئەم دواییەدا پابەندبوون بە دانبەخۆدا گرتن و هەوڵیان داوە بە مەبەستی رێگریكردن لە خوێنڕشتن لە عێراق لە بانگەشەی تۆڕە کۆمەڵایەتییەکان دووربكەونەوە، دەشڵێت: موقتەدا سەدر، سەرۆکی رەوتی سەدر رێگری لە رژانی خوێنی عێراقییەکان کرد.

ناوبراو ئاماژەی دا بەوەی کە عێراق ڕووبەڕووی چەندین تەحەدا بوویەوە، بەڵام ڕێگری کرا لەوانەی ویستیان دۆخی ناوخۆی وڵات تێکبدەن و بەنزین بەسەر ئاگردا بکەن.

ناوبراو ئاماژەی بەوەش کرد کە یەکێتیی نیشتمانی ئامادەیە گفتوگۆ لەگەڵ هەموو لایەنە کوردستانییەکان بکات بە پارتیشەوە بە ئامانجی دەربازبوون لە قەیرانی ئێستای وڵات و پێکهێنانی حکوومەتی نوێ.