بەپێی هەواڵی کوردپرێس، بەگوێرەی ڕاگەیەنراوێکی نووسینگەی بافڵ تاڵەبانی لە دیدارێکدا لە محەمەد شیاع سوودانی دوایین پەرەسەندنە سیاسییەکان، هەنگاوەکانی پێکهێنانی حکوومەتی نوێ و کۆتایی هێنان بە چەقبەستوویی سیاسی لە عێراق تاوتوێ کرا و هەردوولا جەختیان لە یەکخستنی هەوڵە نیشتمانییەکان کردەوە لەپێناو دروست کردنی حکوومەتێکی بەهێز و خزمەتگوزار کە پارێزەری مافی هەمووان بێت.
ئاماژە بەوەش کراوە، لە دیدارەکەدا بافڵ تاڵەبانی روانینی حزبەکەی سەبارەت بە حوکمڕانی و بەڕێوەبردنی وڵات روونکردەوە و وتی: "هەوڵی ئێمە لەپێناو سەرخستنی پرۆسەی سیاسی و ئیدارەدانێکی باشترە، دەمانەوێت حکوومەتی نوێ خزمەتی زیاتری هەموو هاوڵاتییان بکات بەبێ جیاوازی و رووبەڕووی گەندەڵی و نایەکسانی ببێتەوە".
بەگوێرەی ڕاگەیەنراوەکە، داواشی کرد، "مافە دەستوورییەکانی کورد جێبەجێ بکرێن و پێشێل نەکرێن، چوونکە بەهیچ شێوەیەک سازش لەسەر مافی هاوڵاتییانمان ناکەین".
ئەوەش هاتووە، لە بەرامبەردا محەمەد شیاع سوودانی ستایشی رۆڵی یەکێتی و هەوڵەکانی بافڵ تاڵەبانیی کرد بۆ کۆتایی هێنان بە گرژی و ناکۆکییەکان.
Your Comment