دوو حزبی سەرەکیی کوردستان تا ئێستا هیچ ڕێککەوتنێکیان لەسەر دوو پۆستی حکوومەتی فیدراڵ نەکردووە
بەشی عێراق و هەرێمی کوردستان- ئەندامێکی یەکێتیی نیشتمانیی کوردستان دەڵێت: تا ئێستا هیچ ڕێککەوتنێک لە نێوان حزبەکەی و پارتی دیموکراتی کوردستان سەبارەت بە وەزارەتەکانی ژینگە، ئاوەدانکردنەوە و نیشتەجێکردنی لە کابینەی سوودانی نەکراو.

 بەپێی هەواڵی کوردپرێس، شێرزاد سەمەد، لە گفتوگۆ لەگەڵ ئاژانسی هەواڵی "مەوازین نیووز"دا ڕایگەیاندووە، بافڵ تاڵەبانی، سەرۆکی یەکێتیی نیشتمانیی کوردستان، هەفتەی ڕابردوو سەردانی بەغدای کردووە و لەگەڵ ڕێبەرانی ڕەوتە سیاسییەکان کۆبووەتەوە و چەند پرسێکیان تاوتوێ کردووە، لەوانەش دوو پۆستی وەزارەتی ئاوەدانکردنەوە و ژینگە.

ناوبراو ئاماژەی بەوەش کرد: ئەم گفتوگۆیانە هیچ ئەنجامێکی نەبووە و هیچ لێکتێگەیشتنێک سەبارەت بە ئەم وەزارەتانە لە نێوان هەردوو لایەنەکەدا نەبوو ؛ چونکە ناکۆکی و کێشەی ئەو دوو حزبە تەنها بەدەست هێنانی ئەو وەزارەتانە نییە.

سەمەد ئاماژەی بەوەش کرد، شاندێکی پارتی دیموکراتی کوردستانیش لەم دواییانەدا سەردانی بەغدای کردووە، بەڵام ئەم سەردانەش سەرکەوتوو نەبووە.