دادگای فیدڕاڵی عێراق دادبینی بۆ درێژکردنەوەی ماوەی پەرلەمان و حکوومەتی هەرێمی کوردستان دەکات
بەشی عێراق و هەرێمی کوردستان- پەرلەمانتاری پێشووی گۆڕان لە پەرلەمانی بەغدا ڕایگەیاند، دادگای باڵای فیدڕاڵیی عێراق وادەی دادبینی بۆ پێداچوونەوە بە سکاڵای نادەستوری بوونی درێژکردنەوەی ماوەی پەرلەمان و حکوومەتی هەرێم دیاری کرد.

بەپێی هەواڵی کوردپرێس، یووسف محەمەد لە ڕوونکردنەوەیەکدا  ڕایگەیاند: "پاش ئەوەی ڕۆژی ٧ی تشرینی دووەمی ٢٠٢٢  داوایەکمان تۆمار کرد سەبارەت بە نادەستوری بونی درێژکردنەوەی ماوەی پەرلەمان و دەرکردنی یاسای بەردەوام بونی خولی پێنجەمی پەرلەمانی کوردستان ژمارە ١٢ی ساڵی ٢٠٢٢، دادگای باڵای فیدراڵی رۆژی ١٨ی کانونی یەکەمی ٢٠٢٢ی دیاری کرد بۆ دادبینیی دۆسییەکە."

ناوبراو دەشڵێت: "بە ڕەچاوکردنی چەند بڕیارێکی پێشوی دادگای فیدڕاڵی و، ئاماژەدان بە دژوەستانەوەی درێژکردنەوەی ماوەی ئەنجومەنە ھەڵبژێردراوەکان لەگەڵ ئیرادەی گەل و بنەماکانی دیموکراسی و بەند و مادەکانی دەستور، چاوەڕێ ئەکەین کە دادگاکە دواجار بڕیاری نادەستوری بونی درێژکردنەوەی ماوەی پەرلەمان دەربکات".