ئەگەر قوباد تاڵەبانی راست دەكا با لە حكوومەت بكشێتەوە
بەشی عێراق و هەرێمی کوردستان- ئەندامێكی فراكسیۆنی پارتی دیموكراتی كوردستان لە پەرلەمانی كوردستان، وەڵامی گوتەبێژی یەكێتیی نیشتمانیی كوردستانی دەداتەوە و پێی رادەگەیەنێت، ئەگەر قوباد تاڵەبانی راست دەكات، با لە حكوومەتی هەرێمی كوردستان بكشێتەوە.

بەپێی هەواڵی کوردپرێس، گوتەبێژی یەکێتیی نیشتمانیی کوردستان لە دوایین لێدوانیدا بانگەشەی ئەوەی كردووە گوایە حزبەكەی گلەیی لە كابینەی نۆیەمی حكوومەتی هەرێمی كوردستان هەیە و تا ڕەوینەوەی، بەشداری لە حكوومەت ناكەن.

لە بەرامبەردا مەلا جیهاد حەسەن، پەرلەمانتاری پارتی، بە باسنیوزی راگەیاند، حکوومەتی هەرێمی كوردستان ناتوانێت چاوپۆشی لە تیرۆر و کاری تیرۆریستی بکات لەبەر خاتری ئەوەی نیگەرانییەکانی سەرۆکایەتیی یەکێتی بڕەوێنێتەوە.

ڕوونیشی كردەوە، قوباد تاڵەبانی بۆ پاراستنی خۆی و براکەی لە تێوەگلانی بابەتی تیرۆر، ئامادەیە هەموو ئەزموونی کوردستان بخاتە مەترسییەوە، هەر بۆیەش هەڕەشەی ئەوەی لە وەزیر و بەرپرسانی تیمی یەكێتیی نیشتمانیی كوردستان لە حكوومەت كردووە، دەوام نەكەن، بەڵام ئەگەر قوباد تاڵەبانی راست دەكات، با لە حكوومەت بكشێتەوە.

بە بڕوای ئەو، ئەم كارە هەرزەكارانەی بافڵ و قوباد تاڵەبانی دەیكەن، لە ئەنجامدا بە زیانی یەکێتی تەواو دەبێت.

جەختیشی كردەوە: "سەرانی یەکێتی سەرەڕای ئەوەی بە هەموو جۆرێک هەوڵی دابەشکردنی کوردستان دەدەن، تا ئێستا کەس حیسابی بۆ نەکردوون و دەزانن کە رۆژ بە رۆژ لاواز و لاوازتر دەبن و کەسیان لەگەڵ نەماوە".