هاوپەیمانی نێودەوڵەتی گەورەترین پاڵپشتیکەری PKK و YPGن/ لەبارەی سووریاوە مۆڵەت لەکەس وەرناگرین
بەشی تورکیا- سەرکۆماری تورکیا، رەجەب تەیب ئەردۆغان هاوپەیمانی نێودەوڵەتی بە سەرۆکایەتیی ئەمریکا بە گەورەترین پاڵپشتیکەری PKK و YPG ناو دەبات.

بەپێی هەواڵی کوردپرێس، سەرکۆماری تورکیا، رەجەب تەیب ئەردۆغان لە دوای سەردانەکەی بۆ تورکمانستان، لە کاتی گەڕانەوەیدا و لەناو فڕۆکە ڕایگەیاند لەبارەی سووریاوە مۆڵەت لەکەس وەرناگرین.

ئەردۆغان گوتی: "دەمانەوێت سووریا و تورکیا و رووسیا بەیەکەوە هەنگاو بنێن، بۆ ئەمەش سەرەتا پێویستە رێکخراوە هەواڵگرییەکانمان و دواتر وەزیرەکانی بەرگریی و دەرەوەمان کۆببنەوە.

ناوبراو درێژەی دا با دوای کۆبوونەوەکانی ئەوان ئێمەش وەک سەرکردەکانی (تورکیا، سووریا و رووسیا) کۆ ببینەوە. داوام لە پوتین کرد ئێمە وەک سەرکردەکانی (تورکیا، سووریا و رووسیا) کۆ ببینەوە، ئەویش پێی باش بوو. بەم جۆرە دەست دەکەین بە زنجیرەی کۆبوونەوەکان".

ئەردۆغان هەروەها دەربارەی بیرە نەوتییەکانی سووریا ئاماژەی بەوە دا کە بیرە نەوتییەکان لەلایەن هێزەکانی هاوپەیمانانەوە پارێزراون و گوتی: "لەلایەن رێکخراوی تیرۆریستییەوە بە رژێم دەفرۆشرێت. تائێستا ئاراممان گرت، بەڵام ئیدی ئارامیمان نەماوە".