کوردەکان ئامادەن لەگەڵ هەموو لایەنە نیشتمانییەکانی سووریا دانوستان بکەن
بەشی جیهان - بەرپرسی پەیوەندییەکانی دەرەوەی ئیدارەی خۆبەڕێوەبەری کورد لە سووریا ڕایدەگەیەنێت، کورد ئامادەیە لەگەڵ هەموو ئەو گرووپانەی کە پابەندن بە پاراستنی سەروەریی خاکی سووریا و یەکڕیزی ئەو وڵاتەوە؛ دانوستان بکات.

بەپێی هەواڵی کوردپرێس، بەدران چیا کورد، بەرپرسی پەیوەندییەکانی دەرەوەی ئیدارەی خۆبەڕێوەبەری کورد لە باکوور و باکووری ڕۆژهەڵاتی سووریا ڕایدەگەیەنێت، کورد لە پێناو پاراستنی سەقامگیری و ئارامیی وڵات و نەهێشتنی تیرۆریستان، ئامادەی دانوستان لەگەڵ هەموو گرووپە نەتەوەییەکانە لە سووریا.

ناوبراو بە ماڵپەڕی ڕوانگەی مافی مرۆڤی سووریای وتووە، پێویستە زلهێزە بیانییەکانی کە گلاون بە قەیرانی سووریا و هەروەها وڵاتانی عەرەبی هاوکار بن بۆ بەدیهێنانی ئاشتی و سەقامگیری لە سووریا و لەناوبردنی پیلانە جیایخوازانەکان.

ئەو بەرپرسە کوردە جەختیشی کردەوە کە ڕێگاچارەی سیاسی و دانوستانی سووری-سووری دوو بنەمای سەرەکین بۆ گەیشتن بە ئاشتی و سەرقامگیریی سووریا.

بەدران چیا کورد ئەوەشی ڕاگەیاند کە کورد بۆ جێگیر کردی ئاشی لە سووریا ئامادەیە بۆ دانوستان لەگەڵ هەموو گرووپە نیشتمانییەکانی ئەو وڵاتە.